![ABP Premium](https://cdn.abplive.com/imagebank/Premium-ad-Icon.png)
OBC Sabha : हिंगोलीतील ओबीसी सभेच्या पार्श्वभूमीवर प्रशासन अलर्ट; कायदा व सुव्यवस्थेची परिस्थिती हाताळण्यासाठी घेतला महत्वाचा निर्णय
OBC Sabha : जिल्ह्यातील 13 पोलीस स्टेशनसाठी प्रत्येकी एक याप्रमाणे 13 विशेष कार्यकारी दंडाधिकारी यांची नियुक्ती करण्यात आली आहे.
![OBC Sabha : हिंगोलीतील ओबीसी सभेच्या पार्श्वभूमीवर प्रशासन अलर्ट; कायदा व सुव्यवस्थेची परिस्थिती हाताळण्यासाठी घेतला महत्वाचा निर्णय OBC Sabha in Hingoli And Administration alert important decision was taken to handle law and order situation OBC Sabha : हिंगोलीतील ओबीसी सभेच्या पार्श्वभूमीवर प्रशासन अलर्ट; कायदा व सुव्यवस्थेची परिस्थिती हाताळण्यासाठी घेतला महत्वाचा निर्णय](https://feeds.abplive.com/onecms/images/uploaded-images/2023/11/25/a7e48308b8932bc1952399e2f801e2d91700895500257737_original.jpg?impolicy=abp_cdn&imwidth=1200&height=675)
हिंगोली : जालना (Jalna) येथील सभेनंतर आता हिंगोली (Hingoli) जिल्ह्यात उद्या ओबीसी बांधवांची सभा आयोजित करण्यात आली आहे. या सभेला मंत्री छगन भुजबळ (Chhagan Bhujbal) यांच्यासह अनेक ओबीसी नेते उपस्थित राहणार आहे. त्यामुळे या ओबीसी सभेच्या (OBC Sabha) पार्श्वभूमीवर जिल्ह्यातील कायदा व सुव्यवस्थेच्या परिस्थितीस तोंड देण्यासाठी विशेष कार्यकारी दंडाधिकारी यांची नियुक्ती करण्यात आली आहे. जिल्ह्यातील 13 पोलीस स्टेशनसाठी प्रत्येकी एक याप्रमाणे 13 विशेष कार्यकारी दंडाधिकारी यांची नियुक्ती करण्यात आली आहे. तर, जिल्हाधिकारी तथा जिल्हादंडाधिकारी जितेंद्र पापळकर यानी फौजदारी प्रक्रिया संहिता 1973 अन्वये ही नियुक्ती केली असल्याची माहिती प्रशासनाकडून देण्यात आली आहे.
शहरातील रामलीला मैदानावर 26 नोव्हेंबरला ओबीसी एल्गार महामेळाव्याचे आयोजन करण्यात आले आहे. या महामेळाव्यास जिल्ह्यातून व इतर जिल्ह्यातून मोठ्या प्रमाणात जनसमुदाय येण्याची शक्यता आहे. तसेच, महामेळाच्या ठिकाणी येणारा जनसमुदाय हा जिल्ह्यातील प्रत्येक पोलीस स्टेशन हद्दीतून वाहनाने मेळाव्याच्या ठिकाणी येणार आहे. तसेच, सभा संपल्यानंतर वाहनाने परत जाणार आहे. अशात, जिल्ह्यामध्ये मराठा आरक्षण संबंधाने प्रत्येक पोलीस स्टेशन हद्दीत साखळी उपोषण व गाव बंदीचे पोस्टर लावण्यात आलेले आहे. त्यामुळे यावरून वाद निर्माण होऊन अचानक उद्भवलेल्या कायदा व सुव्यवस्थेच्या परिस्थितीस तोंड देण्यासाठी बंदोबस्तातील अधिकाऱ्यांसोबत विशेष कार्यकारी दंडाधिकारी यांची आवश्यकता असते. त्यामुळे हिंगोली जिल्ह्यात 13 पोलीस स्टेशनसाठी प्रत्येकी एक याप्रमाणे 13 विशेष कार्यकारी दंडाधिकारी यांची नियुक्ती करण्यात आली आहे.
13 विशेष कार्यकारी दंडाधिकारी यांची यादी...
- हिंगोली शहर पोलीस स्टेशनसाठी उपविभागीय अधिकारी तथा उपविभागीय दंडाधिकारी उमाकांत पारधी
- हिंगोली ग्रामीण पोलीस स्टेशनसाठी हिंगोली उपविभागीय अधिकारी कार्यालयातील नायब तहसीलदार पी. एन. रुषी
- नरसी नामदेव पोलीस स्टेशनसाठी हिंगोली तहसीलदार तथा तालुका कार्यकारी दंडाधिकारी नवनाथ वगवाड
- बासंबा पोलीस स्टेशनसाठी हिंगोली महसूल विभागाचे नायब तहसीलदार नकुल पोळेकर
- वसमत शहर पोलीस स्टेशनसाठी वसमतचे उपविभागीय अधिकारी तथा उपविभागीय दंडाधिकारी डॉ.सचिन खल्लाळ
- वसमत ग्रामीण पोलीस स्टेशनसाठी वसमत उपविभागीय अधिकारी कार्यालयाचे नायब तहसीलदार अशोक भोजने
- हट्टा पोलीस स्टेशनसाठी वसमतचे तहसीलदार तथा तालुका दंडाधिकारी शारदा दळवी
- कुरुंदा पोलीस स्टेशनसाठी वसमतचे महसूल विभागाचे नायब तहसीलदार विलास तेलंग
- कळमनुरी पोलीस स्टेशनसाठी कळमनुरीचे उपविभागीय अधिकारी तथा उपविभागीय दंडाधिकारी क्रांती डोंबे
- बाळापूर पोलीस स्टेशनसाठी कळमनुरीच्या तहसीलदार तथा तालुका कार्यकारी दंडाधिकारी सुरेखा नांदे
- औंढा नागनाथ पोलीस स्टेशनसाठी तहसीलदार तथा तालुका कार्यकारी दंडाधिकारी विठ्ठल परळीकर
- सेनगाव पोलीस स्टेशनसाठी तहसीलदार तथा तालुका कार्यकारी दंडाधिकारी सखाराम मांडवगडे
- गोरेगाव पोलीस स्टेशनसाठी सेनगाव येथील महसूल विभागाचे नायब तहसीलदार डी. के. गायकवाड यांची नियुक्ती करण्यात आली आहे.
असेही आदेश...
उपविभागीय अधिकारी तथा उपविभागीय दंडाधिकारी यांनी नेमून दिलेल्या पोलीस स्टेशनशिवाय त्यांच्या उपविभागावर दंडाधिकारी म्हणून नियंत्रण ठेवावे. तहसीलदार तथा तालुका कार्यकारी दंडाधिकारी यांनी त्यांना नेमून दिलेल्या पोलीस स्टेशनशिवाय त्यांच्या तालुक्यात कार्यकारी दंडाधिकारी म्हणून नियंत्रण ठेवावेत, असेही आदेश देण्यात आले आहेत.
इतर महत्वाच्या बातम्या:
महत्त्वाच्या बातम्या
ट्रेंडिंग न्यूज
![ABP Premium](https://cdn.abplive.com/imagebank/metaverse-mid.png)
![उमेश अलोणे, एबीपी माझा](https://feeds.abplive.com/onecms/images/author/edf3be0fff591493dbcd992552913783.jpeg?impolicy=abp_cdn&imwidth=70)