Beed Crime News: बीडमध्ये शिवसेना नेत्यावर प्राणघातक हल्ला; बिझनेस पार्टनर जीवावर उठला? मध्यरात्री 'त्या' माणसाने मदत मागितली अन्...

Beed Crime News: मध्यरात्री मदत मागण्याच्या बहाण्याने त्यांना घराबाहेर बोलावून दबा धरलेल्या हल्लेखोरांनी त्यांच्यावर प्राणघातक हल्ला केला. या हल्ल्यात विलास भारत म्हस्के (वय ३२) गंभीर जखमी झाले असून त्यांच्यावर रुग्णालयात उपचार सुरू आहेत.

Beed Crime News

Source : PTI

बीड : शहरालगतच्या पालवण गावात मध्यरात्री एक धक्कादायक प्रकार घडला आहे. शिवसेनेच्या वैद्यकीय मदत कक्षाचे बीड समन्वयक विलास भारत म्हस्के (वय ३२) यांच्यावर जीवघेणा हल्ला करण्यात आला आहे. मध्यरात्री मदत मागण्याच्या बहाण्याने त्यांना घराबाहेर बोलावून दबा धरलेल्या हल्लेखोरांनी त्यांच्यावर प्राणघातक हल्ला केला. या हल्ल्यात विलास भारत म्हस्के (वय ३२) गंभीर जखमी झाले असून त्यांच्यावर रुग्णालयात उपचार सुरू आहेत. आर्थिक व्यवहारातून व्यावसायिक भागीदारानेच हा हल्ला घडवून आणल्याचा संशय म्हस्के यांनी व्यक्त केला आहे.

नेमकं काय घडलं?

घटनेबाबत मिळालेल्या माहितीनुसार, विलास मस्के गुरुवारी रात्रीच्या सुमारास आपल्या घरामध्ये झोपलेले होते. मध्यरात्री त्यांच्या घराचा दरवाजा कुणीतरी वाजवला. यावेळी म्हस्के यांच्या बहिणीने दार उघडले असता, एका अनोळखी व्यक्तीने 'गाडीतील पेट्रोल संपले आहे, पेट्रोल हवे आहे,' असं सांगितले. अपरात्री एक अनोळखी व्यक्ती मदत मागत असल्याने विलास म्हस्के बाहेर आले. ते बाहेर येताच दबा धरून बसलेल्या अन्य चार ते पाच जणांनी अचानक त्यांच्यावर हल्ला केला. आरोपींनी डोक्यावर व हातावर वार केल्याने म्हस्के गंभीर जखमी झाले.

या प्रकरणी म्हस्के यांनी आपल्या व्यावसायिक भागीदारावर संशय व्यक्त केला आहे. आर्थिक व्यवहारातून निर्माण झालेल्या वादातूनच हा हल्ला घडवून आणल्याची शक्यता नाकारता येत नाही, असे पोलिसांचेही म्हणणे आहे. हल्ल्यात सामील असलेले पाच अनोळखी जण अद्याप फरार आहेत. विलास म्हस्के यांच्या तक्रारीवरून व्यावसायिक भागीदारासह पाच अनोळखी हल्लेखोरांवर बीड ग्रामीण पोलीस ठाण्यात गुन्हा दाखल करण्यात आला आहे. पोलीस अधिक तपास करत असून आरोपींना अटक करण्यासाठी प्रयत्न सुरू आहेत. या घटनेमुळे बीडमध्ये एकच खळबळ उडाली आहे.