मनसे अध्यक्ष राज ठाकरेंना 'मास्कद्वेष' अंगलट?; मास्क घालत नसल्यानं औरंगाबादेत तक्रार

मास्क घालत नसल्यानं मनसे अध्यक्ष राज ठाकरे यांच्या विरोधात औरंगाबादेत तक्रार दाखल करण्यात आली आहे. राज ठाकरे यांच्या मास्कविरोधी भूमिकेमुळं राज्यात कोरोना वाढल्याचा आरोप तक्रारीत करण्य़ात आला आहे.

औरंगाबाद : राज्यात पुन्हा कोरोनाचे रुग्ण वाढत चालले आहेत. अशात सरकारकडून सोशल डिस्टन्सिंग राखण्यासह मास्क लावण्यासंदर्भात वेळोवेळी निर्देश दिले जात आहेत. असं असताना मनसे प्रमुख राज ठाकरे मात्र जागोजागी विना मास्क फिरत असल्याचं दिसून येतं आहे. आता  राज ठाकरे यांची मास्कद्वेश अंगलट येण्याची चिन्ह दिसत आहे. विनामास्क फिरण्याप्रकरणी मनसे अध्यक्ष राज ठाकरे यांच्या विरोधात औरंगाबादच्या क्रांतीचौक पोलीस ठाण्यात तक्रार दाखल झाली आहे. राज ठाकरे यांच्या मास्क न घालण्याच्या आवाहनामुळे राज्यात कोरोना संसर्ग वाढला असून अ‍ॅड.रत्नाकर चौरे यांनी केली राज ठाकरे यांच्या विरोधात पोलिसात तक्रार दाखल केली आहे.

राज ठाकरे यांच्या विरोधात साथीचे रोग प्रतिबंधक कायदा 1897 अंतर्गत गुन्हा दाखल करण्याची मागणी यावेळी तक्रारदारांनी केली आहे. राज यांच्या मास्कविरोधी भूमिकेमुळं राज्यात कोरोना वाढल्याचा आरोप यात करण्य़ात आला आहे.

राज ठाकरे एका कार्यक्रमासाठी नाशिकमध्ये आले होते त्यावेळी त्यांनी पुन्हा एकदा विना मास्क दिसून आले होते. त्यावेळी त्यांनी कार्यकर्त्यांना देखील 'मास्क काढा' अशा सूचनाही दिल्या.

दरम्यान राज ठाकरे यांचे औरंगाबाद आणि पूर्व महाराष्ट्रात लोखो चाहते आहेत. त्यांमुळे त्यांना आदर्श मानून मास्क न घालण्याचा पायंडा चालू ठेवण्यास मागे पुढे पाहणार नाही. त्यामुळे औरंगाबादमध्ये लॉकडाऊन लागल्यास त्याला राज ठाकरे जबाबदार असतील असं तक्रारदार अ‍ॅड.रत्नाकर चौरे यांनी तक्रारीत म्हटलं आहे.

दरम्यान, राज ठाकरे यांनी यापूर्वीही अनेक ठिकाणी विनामास्क हजेरी लावल्याचं समोर आलं होतं. तसंच मी मास्क घालणार नाही, असं देखील त्यांनी सांगितलं होतं. मराठी भाषा गौरव दिनाच्या निमित्ताने मनसेच्या मराठी स्वाक्षरी मोहिमेच्या कार्यक्रमाला देखील ते विनामास्क उपस्थित होते. त्यावेळी त्यांनी म्हटलं होतं की, सगळ्या कार्यक्रमांना गर्दी होते. सरकारच्या कार्यक्रमांना गर्दी होते. ते तिथं धुडघुस घालू शकतात. शिवजयंती, मराठी भाषा दिनाच्या कार्यक्रमांना परवानगी नाकारली जाते. एवढं जर कोरोनाचं संकट पुन्हा येतंय असं दिसत असेल तर सगळ्या निवडणुका पुढे ढकला, असं राज ठाकरे म्हणाले. मी मास्क घालतच नाही, मी तुम्हालाही सांगतो, असं राज ठाकरे म्हणाले.

अजित पवारांची राज ठाकरेंवर टीका

उपमुख्यमंत्री अजित पवार यांनी विधानपरिषदेत बोलताना मास्क न घालणाऱ्या राज ठाकरेंवर टीका केली होती. ते म्हणाले की, "काही लोक तर सरळ म्हणतात मी मास्क घालणार नाही. अरं बाबा तुला काही कोरोना होणार नाही. पण तुझ्यामुळे दुसर्‍याला होईल त्याचं काय? दरेकर असे कसे तुमचे जुने नेते?" असे म्हणत अजित पवार यांनी राज ठाकरे यांच्यावर जोरदार टीका केली.