Sanjay Shirsat : शिर्डीत गाड्यांनी भिकारी आणले जातात, नशेखोरांमुळे गुन्हेगारी वाढतेय; संजय शिरसाटांचे सुजय विखेंना समर्थन
Sujay Vikhe Patil On Shirdi Prasadalaya : कोणीही एखादं स्टेटमेंट केलं तर त्या विरोधात प्रतिक्रिया येतात. पण शिर्डीतील नेमका विषय काय होता हे आता कळल्याचं सामाजिक न्यायमंत्री संजय शिरसाट यांनी म्हटलं.
अहिल्यानगर : शिर्डी संस्थानच्या मोफत जेवणामुळे राज्यभरातील भिकारी शिर्डीत जमा झालेत या माजी खासदार सुजय विखे वक्तव्यावर वेगवेगळ्या प्रतिक्रिया येत आहेत. मात्र सुरुवातीला सुजय विखेंच्या वक्तव्यावर टीका करणारे सामाजिक न्यायमंत्री संजय शिरसाट यांनी आता सुजय विखेंच्या वक्तव्याचं समर्थन केल्याचं दिसून येतंय. सुजय विखेंनी आपल्याशी चर्चा करून हा विषय समजावून सांगितला, आपला गैरसमज झाला असं संजय शिरसाट यांनी सांगितलं. राज्यभरातील भिकारी शिर्डीत आणले जातात आणि त्यातील काही नशेखोर असल्याचं वक्तव्यही संजय शिरसाट यांनी केलं.
संजय शिरसाट म्हणाले की, सुजय विखेंनी भिकाऱ्यांसबंधी जे वक्तव्य केलं त्याला मी सुरुवातीला विरोध केला. मात्र सुजय विखे यांनी माझ्याशी चर्चा केल्यानंतर तो विषय स्पष्ट झाला. काही भिक्षेकरू हे शिर्डीत गाड्यांनी आणले जातात. त्यातील काही नशेखोर आहेत. ते व्हाईटनरची नशा करतात. अशा लोकांमुळे गुन्हेगारी वाढते आणि सुरक्षेचा प्रश्न निर्माण होतो. खरं तर पोलिसांनी याकडे लक्ष द्यायला हवे.
नेमकं काय म्हणारे सुजय विखे?
शिर्डीतील साईबाबा संस्थानने मोफत जेवण बंद करावे आणि मुलांच्या भवितव्यासाठी, शिक्षणासाठी ते पैसे वापरावेत अशी मागणी माजी खासदार सुजय विखे यांनी केली. मात्र ही मागणी करतेवेळी सुजय विखे यांनी वादग्रस्त वक्तव्य केलं. शिर्डी संस्थानच्या प्रसादालयात मोफत जेवण बंद करा, राज्यातील सगळे भिकारी मोफत जेवण्यासाठी शिर्डीत गोळा झालेत असं सुजय विखे म्हणाले. दरम्यान, सुजय विखेंच्या या वक्तव्यावर विरोधकांनी चांगलीच टीका केली.
मोफत जेवणामुळे मोस्ट वाँटेड क्रिमिनल्स शिर्डीत
आपल्या वक्तव्यावर ठाम असल्याचं सांगत सुजय विखेंनी त्यावर स्पष्टीकरण दिलं होतं. ते म्हणाले की, "मराठी भाषेमध्ये प्रत्येकजण वेगवेगळे अर्थ काढतो. मागील 3 वर्षांत शिर्डीतील 4000 हजार भिकाऱ्यांना पोलिसांनी अटक करून सुधारगृहात पाठवलं आहे. भिकारी याचा अर्थ भिकारीच जे पोलिसांच्या अहवालात सांगितलं आहे. शिर्डी विधानसभेत मला माझ्या महिला-भगिनी सुरक्षित ठेवण्याचा पूर्ण अधिकार आहे. साई संस्थानला माझी पुन्हा एकदा विनंती आहे की संस्थांनाच्या प्रसादालयातील आकारलेल्या पैशाचा वापर विकासासाठी आणि शिक्षणासाठी व्हावा."
साई भक्तांना हिणवण्याचा प्रयत्न कोणीही करत नाही. मोफत जेवणामुळे शिर्डीत अपराधी लोक, मोस्ट वाँटेड गुन्हेगार, जे साईभक्त नाहीत त्यांची वाढ होतेय. याचा त्रास ग्रामस्थांना होतोय असं सुजय विखे म्हणाले.
ही बातमी वाचा:
महत्त्वाच्या बातम्या
ट्रेंडिंग न्यूज
