Ashok Kharat : अशोक खरातचा 'स्पेशल 26' पॅटर्न, आपल्याच भक्तांवर बोगस आयकर अधिकाऱ्यांकडून छापेमारी करायचा, तडजोडीच्या नावाखाली पैसे उकळायचा
Ashok Kharat Crime Case : श्रीमंत असलेल्या व्यावसायिक आणि उद्योगपतींवर अशोक खरातचे बोगस आयकर अधिकारी छापेमारी करायचे. नंतर अशोक खरात या प्रकरणात तडजोड करायचा अशी माहिती समोर आली आहे.
नाशिक : आतापर्यंत जादूटोणा, काळ्या जादूच्या नावाखाली लोकांना लुबाडणाऱ्या अशोक खरातचा (Ashok Kharat) आणखी एक प्रताप समोर आला आहे. बॉलिवूड चित्रपट 'स्पेशल 26' पॅटर्नप्रमाणे अशोक खरात हा आपल्याच श्रीमंत भक्तांकडे बोगस आयकर अधिकारी (Fake Income Tax Officers) पाठवायचा आणि त्यांना लुटायचा अशी माहिती समोर आली आहे. या प्रकरणी फसवणूक झालेले लोक समोर येऊन तक्रार करणार का याकडे लक्ष आहे.
शेकडो महिलांच्या लैंगिक शोषणाचा आरोप असलेल्या अशोक खरातवर आर्थिक फसवणुकीचे आरोपही करण्यात आले आहेत. या प्रकरणी एसआयटी तपास सुरू असून त्याचा आणखी एक कारनामा समोर आला आहे.
हिंदी सिनेमासारखा अशोक खरात याचा 'स्पेशल 26' पॅटर्न चर्चेत आला आहे. अशोक खरात हा त्याचे भक्त असलेले मोठे व्यावसायिक आणि उद्योजक हेरायचा. त्यानंतर त्यांच्याकडे बोगस आयकर अधिकारी पाठवायचा आणि त्यांना भीती घालायचा. नंतर तडजोड करण्याच्या नावाखाली तो भक्तांकडून मोठी रक्कम उकळायचा अशी माहिती समोर आली आहे.
आपल्याच भक्तांना नकली आयकर अधिकारी पाठवून त्यांना गंडा घातल्याचा प्रकार अशोक खरातने केला आहे. यानंतर आता फसवणूक झालेले भक्त तक्रार देण्यासाठी समोर येतात का ते पाहावं लागेल.
Vikas Diwate Case : विकास दिवटे प्रकरणाचा पुन्हा तपास
सन 2022 मधील एका प्रकरणात भोंदू खरातच्या अडचणीत वाढ होण्याची शक्यता आहे. 2022 मध्ये शिर्डी संस्थानचे कर्मचारी विकास दिवटे यांनी त्यांचं जीवन संपवलं होतं. याप्रकरणी पोलिसांनी न्यायालयात प्रस्ताव सादर केला. या प्रकरणाच्या फिर्यादीत नाव असताना भोंदू खरातचं चार्जशीटमधून नाव वगळण्यात आलं होतं.
मृत विलास दिवटे यांच्या भावाने दिलेल्या तक्रारीनंतर शिर्डी पोलीस अॅक्टिव्ह मोडवर आले आहेत. त्यामुळे या प्रकरणाचा पुन्हा तपास होण्याची चिन्हं आहेत. सरकारी वकिलांचा अभिप्राय घेऊन शिर्डी पोलीस पुढील कायदेशीर कार्यवाही करणार आहेत.
खरातविरोधात तक्रारींचा आकडा वाढला
अशोक खरात प्रकरणी स्थापन करण्यात आलेल्या हेल्पलाईनवर महिला आणि फसवणूक झालेल्याचा तक्रारीचा ओघ सुरूच आहे. लैंगिक छळ आणि बळकावलेल्या प्रॉपर्टीविरोधात तक्रारी येत आहेत. महिला अत्याचाराच्या तक्रारीचा आकडा वाढला असून आणखी 11 महिलांनी पुढे येत खरातवर लैंगिक शोषणाचे आरोप केले आहेत.
पतीच्या, मुलांच्या किंवा कुटुंबीयांच्या मृत्यूची भीती दाखवून महिलांना जाळ्यात ओढल्याचा आरोप पीडित महिलांनी केला आहे. या सर्व तक्रारींची शहानिशा करून एसआयटी पुढील कारवाई करणार आहे. भोंदू अशोक खरातविरुद्ध आतापर्यंत 13 गुन्हे दाखल झाले आहेत. त्यापैकी महिला अत्याचाराचे 8 तर फसवणुकीचे 4 गुन्हे आहेत.
ही बातमी वाचा:
महत्त्वाच्या बातम्या
