Health Tips : पाठदुखी असेल तर हलक्यात घेऊ नका, हृदयविकाराचा झटका येण्याचा धोका असण्याची शक्यता; कसे ते जाणून घ्या
Health Tips : पाठीच्या खालच्या भागात अचानक दुखणे कधीकधी हृदयविकाराचा झटका सूचित करते.
Health Tips : आजकालच्या धकाधकीच्या जीवनात सगळीकडे ह्रदयविकाराच्या झटक्याचं (Heart Attack) प्रमाण मोठ्या प्रमाणात वाढलं आहे. शहरीकरण, बदलती जीवनशैली (Lifestyle) आणि खाण्यापिण्याच्या चुकीच्या सवयींमुळे 30 ते 40 वयोगटातील व्यक्तींमध्येही हृदयविकाराचे प्रमाण वाढत आहे. काही प्रकरणांमध्ये, लोकांना अचानक पाठदुखीचा त्रास होत असल्याचे दिसून येत आहे. कोणत्याही कारणाशिवाय तुम्हाला अचानक पाठदुखीचा त्रास सुरू झाला तर ते हलक्यात घेऊ नका. विशेषत: दुखण्याबरोबरच, श्वास घेण्यास त्रास, छातीत दाब किंवा वेदना जाणवत असल्यास ताबडतोब डॉक्टरांशी संपर्क साधावा. हे हृदयविकाराचा झटका, स्ट्रोक किंवा इतर गंभीर परिस्थितींचे लक्षण असू शकते. वेळीच उपचार सुरू करून जीव वाचवता येऊ शकतो. या संदर्भात अधिक माहिती जाणून घ्या.
पाठीत दुखणे हलक्यात घेऊ नका
हृदयविकाराचा झटका ही एक गंभीर स्थिती आहे. ज्यामध्ये हृदयाच्या धमन्यांमधील रक्त प्रवाह अचानक थांबतो. हे रक्तवाहिन्यांमधील अडथळ्यामुळे किंवा रक्ताच्या गुठळ्यांमुळे होऊ शकते. जेव्हा पुरेसे रक्त हृदयापर्यंत पोहोचत नाही, तेव्हा शरीराच्या इतर भागांमध्ये ऑक्सिजन आणि पोषक तत्वांची कमतरता निर्माण होते. यामुळे, हृदयविकाराच्या झटक्यादरम्यान, पाठ, हात, पोट किंवा मान अशा शरीराच्या कोणत्याही भागात अचानक तीव्र वेदना सुरू होतात. अशा वेदना सहसा खूप तीव्र असतात आणि हलके घेऊ नये. असे काही घडल्यास ताबडतोब डॉक्टरांशी संपर्क साधा.
हृदयविकाराची इतर लक्षणे
छातीत दुखणे किंवा दाब येणे : जडपणाच्या तक्रारी, छातीत जळजळ किंवा वेदना ही हृदयविकाराची सर्वात सामान्य लक्षणे आहेत.
श्वास घेण्यात अडचण येणे : श्वास घेण्यात अडचण किंवा धाप लागणे.
घाम येणे : अचानक घाम येणे किंवा थंडी वाजणे.
चक्कर येणे : कोणत्याही कारणाशिवाय अचानक चक्कर येणे आणि डोके हलके वाटणे.
भूक न लागणे : अनैसर्गिक भूक न लागणे.
उलट्या आणि मळमळ होणे : कोणत्याही कारणाशिवाय उलट्या आणि मळमळ होऊ शकते.
पाठदुखी : पाठीच्या खालच्या भागात अचानक दुखणे कधीकधी हृदयविकाराचा झटका सूचित करते.
यापैकी कोणतेही लक्षण हृदयविकाराच्या झटक्याचे लक्षण असू शकते, म्हणून सावधगिरी बाळगा आणि त्वरित डॉक्टरांचा सल्ला घ्या.
महत्त्वाच्या बातम्या :
टीप : वरील सर्व बाबी एबीपी माझा केवळ माहिती म्हणून वाचक-प्रेक्षकांपर्यंत पोहोचवत आहे. यातून एबीपी माझा कोणताही दावा करत नाही.
महत्त्वाच्या बातम्या
ट्रेंडिंग न्यूज
