Marathi Serial: Zee Marathi वर ‘दीपज्योती’ची धमाकेदार एन्ट्री; पूर्वा कौशिकचा सोज्वळ अंदाज चर्चेत!
प्रेक्षक ज्योतीला ही तितक्याच आपुलकीने एकसेप्ट करतील जसे माझ्या आधीच्या भूमिकेला केले आहे हीच अपेक्षा आहे.अशी आशा पूर्वाने व्यक्त केली.
Zee Marathi: झी मराठीवरील नव्या मालिकांच्या यादीत आता आणखी एका मालिकेची भर पडणार आहे. '' ही नवी मालिका 13 एप्रिलपासून प्रेक्षकांच्या भेटीला येत आहे. यात अभिनेत्री पूर्वा कौशिक ‘ज्योती’ या साध्या, सोज्वळ भूमिकेत दिसणार आहे. आपल्या आधीच्या हटके भूमिकांनंतर पूर्णतः वेगळ्या अवतारात येत असल्याने ही मालिका आणि पूर्वाचा नवा लूक दोन्ही सध्या चर्चेचा विषय ठरत आहेत. ‘ज्योती’ ही व्यक्तिरेखा साकारताना तिचा अनुभव, तयारी आणि भावना व्यक्त केल्या.
'शिवा 'नंतर दीपज्योती मालिकेत पूर्वाची एन्ट्री
"झी मराठीवर परत एकदा ‘दीपज्योती’सोबत येते आहे आणि माझ्या भूमिकेचं नाव आहे ‘ज्योती’. माझ्या आधीच्या भूमिकेपेक्षा ही खूप वेगळी भूमिका आहे. ज्योती ही खूप समजूतदार, गुणी, घरगुती आणि साधी, गोड अशी मुलगी आहे. तिला नटण्याची-सजण्याची आवड आहे आणि ती खूप सुंदर दिसते. तिला दोन बहिणी आणि एक भाऊ आहे आणि ती आईसोबत राहते. वडीलही आहेत, पण त्यांच्या व्यसनामुळे तिला त्यांच्यावर खूप राग आहे. ज्योतीची ही सोज्वळ भूमिका प्रेक्षकांना नक्की आवडेल.
ती पुढे म्हणाली," आधीही मी झी मराठीवर ‘शिवा’ नावाची भूमिका साकारली होती, जी खूप वेगळी होती आणि सर्वसामान्य मुलींसारखी नव्हती. त्यामुळे मला भीती होती की त्या भूमिकेनंतर मला पुन्हा मुख्य नायिकेची भूमिका मिळेल का. तसेच, पुन्हा एका साध्या मुलीच्या भूमिकेत प्रेक्षक मला स्वीकारतील का, असा प्रश्न मनात होता. पण झी मराठीने माझा हा समज मोडून काढला. त्यामुळे ‘ज्योती’च्या भूमिकेसाठी जेव्हा कॉल आला तेव्हा माझा आनंद गगनात मावेनासा झाला. तो क्षण शब्दांत सांगणं कठीण आहे."
भूमिकेची तयारी करणं तारेवरची कसरत
" ही भूमिका माझ्या आधीच्या भूमिकेपेक्षा पूर्णपणे वेगळी आहे. या भूमिकेसाठी तयारी करताना माझ्या मनात सतत माझ्या आधीच्या भूमिकेशी तुलना होत राहते. खऱ्या आयुष्यात माझा स्वभाव थोडा थेट आहे. ‘शिवा’ करताना मला एवढी तयारी करावी लागली नव्हती, जितकी ‘ज्योती’साठी करावी लागत आहे. ज्योती ही खूप समजूतदार, नाजूक आणि सोज्वळ मुलगी आहे. तिचं राहणीमान, वागणं आणि तिचा साधेपणा साकारण्यासाठी मला खूप मेहनत घ्यावी लागत आहे. ज्योतीचं बोलणं, वागणं, तिचे हावभाव, तिचं बघणं, राग व्यक्त करण्याची पद्धत, तिचा अबोला आणि तिचा साधेपणा – हे सगळं खूप सूक्ष्म आहे. या सगळ्याची तयारी करणं माझ्यासाठी सध्या तारेवरची कसरत आहे. पण ही भूमिका करताना मला खूप आनंदही मिळतो आहे. मला हळू बोलायचं आहे, शब्दांचा तोल राखायचं आहे आणि वागताना स्वतःला ओव्हर दाखवायचं नाही. साध्या मुलीची भूमिका करणं सोपं वाटत असलं तरी माझ्यासाठी ते आव्हानात्मक आहे. मी खूप मेहनत घेत आहे आणि ती प्रेक्षकांना नक्की दिसेल.
ज्योतीच्या भूमिकेबद्दल मनात भीती
प्रोमोला खूप चांगला प्रतिसाद मिळाला. मात्र, ज्योतीच्या भूमिकेबद्दल मला थोडी भीती आहे – मी कशी दिसेन आणि प्रेक्षकांना कितपत आवडेन याची. पण मी पूर्ण प्रयत्न करत आहे की प्रेक्षक ज्योतीवरही तितकंच प्रेम करतील. प्रेक्षकांमध्ये या भूमिकेबद्दल उत्सुकता आहे, याचा मला आनंद आहे. आम्ही सर्वजण पहिल्यांदा भेटलो तेव्हा एपिसोडचं वाचन होतं. तेव्हाच सगळ्यांची ओळख झाली. माझ्या बहिणींच्या भूमिका करणाऱ्या मानसी आणि सलोनी खूप छान आहेत. शूटिंगच्या पहिल्याच दिवशी असं वाटलं की आपण खूप दिवसांपासून एकत्र काम करत आहोत. संपूर्ण टीम पहिल्याच दिवशी खूप छान मिसळून गेली.”
प्रेक्षक ज्योतीला ही तितक्याच आपुलकीने एकसेप्ट करतील जसे माझ्या आधीच्या भूमिकेला केले आहे हीच अपेक्षा आहे. 'दीपज्योती' तुमच्या भेटीला येत आहे १३ एप्रिलपासून । दररोज रात्री ८ वा. सदैव तुमच्या झी मराठीवर.
महत्त्वाच्या बातम्या
