Tunisha Sharma : शिजानसोबतच्या प्रेमसंबंधातून तुनिषाची आत्महत्या; आईची तक्रार, शिझान पोलिसांच्या ताब्यात

तुनिषा शर्मा आत्महत्या प्रकरणी मोठं अपडेट समोर आलं आहे. तिच्यासोबत काम करणारा शिझान खानसोबत तिचे प्रेमसंबंध होते. त्या नैराश्यातून तिनं हे पाऊल उचललं आहे, असं पोलिसांनी म्हटलं आहे.

Written By : प्रभाकर कुडाळकर, एबीपी माझा | Edited By: निलेश झालटे | Updated at : 24 Dec 2022 10:13 PM (IST)

Tunisha Sharma

Tunisha Sharma Suicide Case : तुनिषा शर्मा आत्महत्या प्रकरणी मोठं अपडेट समोर आलं आहे. तिच्यासोबत काम करणारा शिझान खानसोबत तिचे प्रेमसंबंध होते. त्या नैराश्यातून तिनं हे पाऊल उचललं आहे. शिझान खानला चौकशीसाठी ताब्यात घेण्यात आलं आहे, असं सहायक पोलिस आयुक्त चंद्रकांत जाधव यांनी सांगितलं. पोलिसांनी तुनिषाच्या आईच्या तक्रारीवरुन शिझानविरोधात गुन्हा दाखल केला आहे.

अलीबाबा या मालिकेतील अभिनेता शिझान विरोधात तुनिषाच्या आईनं तक्रार दिली आहे. या प्रकरणात शिझानला पोलिसांनी ताब्यात घेतले असून, त्याच्याविरोधात आत्महत्येस प्रवृत्त केल्याप्रकरणी गुन्हा दाखल केला आहे. मिळालेल्या माहितीनुसार आज दुपारी शिजान आणि तुनिषा या दोघांनी एकत्र त्याच्या रूममध्ये जेवण केले. त्यानंतर शिझान हा सेटवर शूटिंगसाठी गेला आणि शिझानच्या रूममध्येच तिने आत्महत्या केली.

मिळालेल्या माहितीनुसार, टुनिशा शर्माच्या कुटुंबानं अली बाबाचा मुख्य अभिनेता शिझान खानवर आरोप केले आहेत. टुनिशा आणि शिजानचं अफेयर होतं. काही दिवसांपासून दोघांमध्ये वाद झाल्याची माहिती आहे. वळीव पोलीस ठाण्यात तुनिषाची आई विनिता शर्मा हिने अलिबाबा या मलिकेतील अभिनेता शिझान खान याच्या विरोधात तक्रार दिली आहे. आईच्या म्हणण्यानुसार शिजान आणि टुनिषा यांंचं प्रेमसंबंध होते. सध्या शिजानला पोलिसांनी ताब्यात घेतलं आहे.

या पार्श्वभूमीवर पोलिस आता शिझानची चौकशी करणार आहेत. तुनिषा शर्मा हिचा मृतदेह सध्या प्राथमिक तपासासाठी नालासोपारा प्राथमिक आरोग्य केंद्रात घेऊन गेले आहेत. तुनिषा शर्मा हिचा मृतदेहाची प्राथमिक तपासणी केल्यानंतर तिचा मृतदेह शवविच्छेदनासाठी मुंबईच्या जे.जे. रुग्णालयात घेऊन जाणार आहेत.

वसई पोलिसांनी सांगितलं की, आज दुपारी 3 वाजताच्या सुमारास तुनिषा मेकअप रुममधील बाथरुममध्ये लटकलेल्या स्थितीत आढळून आली. त्यानंतर सहकारी कलाकारांनी तिला जवळच्या दवाखान्यात नेले. मात्र तिथं डॉक्टरांनी तिला मृत घोषित केलं. पोलिस मात्र या घटनेचा आत्महत्या आणि हत्या या दोन्ही अंगानी तपास करत आहेत.