Jahnavi Killekar : 'आपली उंची किती, करिअर किती...', इतरांच्या करिअरवरुन बोलणाऱ्या जान्हवीला रितेश भाऊने झोडलं; आठवडाभरासाठी जेलमध्ये रवानगी

Bigg Boss Marathi Season 5 : जान्हवीच्या घरातील वागण्यावरुन रितेश देशमुखने तिला चांगलेच खडेबोल सुनावल्याचं पाहायला मिळालं आहे.

Bigg Boss Marathi Season 5

Source : instagram

Jahnavi Killekar on Bigg Boss Marathi Season 5  : बिग बॉसच्या (Bigg Boss Marathi) घरात अगदी पहिल्या आठवड्यातच निक्की वर्षा उसगांवकर यांच्यावर वैयक्तिक टीका केल्यानंतर रितेश देशमुखने तिला भाऊच्या धक्क्यावर चांगलच झापलं होतं. पण दुसऱ्या आठवड्यातही निक्कीचा तोच पवित्रा होता. तिच्यासोबत जान्हवी देखील अनेक स्पर्धकांवर वैयक्तिक टीका करत असल्याचं पाहायला मिळतंय. नुकतच सत्याचा पंचनामा या टास्कमध्ये तिने पंढरीनाथ कांबळे यांच्यावर केलेल्या वैयक्तिक टीकनंतर भाऊच्या धक्क्यावर तिला चांगलीच चपराक बसली. 

तुम्ही बाहेर ओव्हर अॅक्टिंग करता आणि आता इथे येऊनही तुम्ही ओव्हरअॅक्टिंग करत आहात, असं वक्तव्य जान्हवीने पॅडीला बोलताना केलं. तिच्या या व्कव्यानंतर सोशल मीडियावरही तिच्याविरुद्ध चांगलाच रोष व्यक्त करण्यात आला होता. त्यातच रितेश भाऊंनी तिची या आठवड्यातील भाऊच्या धक्क्यावरुन हकालपट्टी केली आणि आठवडाभर जेलमध्ये राहण्याचीही शिक्षा दिली. 

'आयुष्यभर जे कमावलं ते इथे घालवायला ते आलेत का?'

जान्हवीच्या या वागण्यावर रितेशने म्हटलं की, तुम्ही नाटकी आणि ढोंगी आहात. बाहेर लोकांना, मला सगळं दिसतंय. मागच्या वेळीही जे केलं ते मी आता इथे म्हणतो की, ते तुमचं नाटक होतं. तुम्ही सगळा मेलोड्रामा करता. कॅमेरे स्वत:कडे वळवण्याचा तुमचा प्रयत्न असतो. तुम्ही पॅडींची मागितलेली माफी मनापासून होती का? असाही प्रश्न रितेशने तिला विचारला. 

पुढे रितेशने म्हटलं की, जान्हवी तुम्ही मोठ्या कलाकारांसह छोट्या कलाकारांचाही अपमान करताय. कलाकार छोटा असो किंवा मोठा असो तो कलाकारच असतो. वर्षाताई आणि पॅडीभाऊंना आपण इथे का बोलावलं आहे? त्यांनी जे आयुष्यभर कमावलं ते घालवायला. त्यांच्यापेक्षा जर तुम्ही जास्त काम केलं असतं तर एकवेळ मी तुमचं ऐकलंही असतं. पण आपली उंची किती, आपलं करिअर किती हे पाहावं आधी. ह्याचं काही भान आहे की नाही. 

'घरीही तुम्ही अश्याच वागता का?' 

निक्कीच्या कॅप्टन्सीवेळी तिचं काहीही न ऐकण्याचा निर्णय आर्याने घेतला होता. कारण निक्कीनेही इतरांच्या कॅप्टन्सीवेळी तोच पवित्रा घेतला होता. त्यावर आर्याने पांघरुण नीट ठेवलं नाही म्हणून जान्हवीने राडा केला. त्यावर रितेशने तिला म्हटलं की, 'तुम्ही कोण व्हाईस कॅप्टन आहात का? तुम्ही आर्याचं पांघरुण खाली टाकलं आणि म्हणालात की मला पाय पुसायचे होते. घरीही असंच पांघरुण खाली टाकून त्यावर पाय पुसता का तुम्ही..'

ही बातमी वाचा :