‘तारक मामा अय्यो रामा’, गोकुळधाम सोसायटीतील घडामोडी आता युट्युब चॅनेलवर मराठी आणि तेलगुमध्येही उपलब्ध

अवघ्या काही तासात मालिकेला मिळाला प्रचंड प्रतिसाद, tmkoc युट्युब चॅनेलच्या सबस्क्रायबरची संख्या पोहोचली 70 लाखांच्यापलीकडे

संग्रहित छायाचित्र

मुंबई: नीला फिल्म प्रोडक्शन्स प्रायव्हेट लिमिटेडने प्रस्तुत लोकप्रिय शो तारक मेहता का उल्टा चष्मा (tmkoc) आता त्यांच्या अधिकृत युट्युब चॅनेलवर मराठीमध्ये ‘गोकुळधामची दुनियादारी’ आणि तेलगुमध्ये ‘तारक मामा अय्यो रामा’ या नावाने उपलब्ध आहे. गुढीपाडवा आणि उगादीच्या पवित्र मुहुर्तावर शुभारंभ झालेल्या या एपिसोडला काही तासातच युट्युब चॅनेलवर प्रेक्षकांचा भरघोस प्रतिसाद मिळाला. दरम्यान कार्यक्रमाच्या युट्युब सबस्क्रायबरची संख्या 70 लाखापेक्षा जास्त झाली आहे आणि वाढत्या प्रेक्षक संख्येमुळे चॅनेल लवकरच कार्यक्रमातील गेल्या 12 वर्षातील काही उत्तम क्षण या चॅनेल वर अपलोड करणार आहे. तारक मेहता का उल्टा चष्माचे लेखक आणि निर्माते श्री असित कुमार मोदी आहेत.

या कार्यक्रमाची ॲनिमेटेड सिरीज तारक मेहता का छोटा चष्मा (TMKCC) चे प्रक्षेपण 19 एप्रिलपासून Sony Yay चॅनेलवर सुरू होणार आहे. यामुळे तारक मेहता का उल्टा चष्मा हा एकमेव भारतीय शो असेल जो एकाचवेळी लाइव्ह ॲक्शन, ॲनिमेशन आणि दोन प्रादेशिक भाषांमध्ये एकाचवेळी सुरू आहे. येत्या काही महिन्यात नीला फिल्म प्रोडक्शन्स आणखी एका प्रादेशिक भाषेत हा कार्यक्रम सादर करणार आहे.

तारक मेहता का उल्टा चष्मा हा जगातील सर्वाधिक काळ दररोज प्रक्षेपित होणारा कॉमेडी शो ठरला असून यातील बहुतांश कलाकारांची नावे भारतात आणि इतर अनेक देशात घरोघरी पोहचली आहेत. 2008 मध्ये पहिल्यांदा प्रक्षेपित झालेला TMKOC 13 व्या वर्षातही सुरू आहे आणि या कालावधीत त्याचे 3,100 हून अधिक एपिसोड प्रक्षेपित झाले आहेत.

मागील कित्येक वर्षे या मालिकेनं प्रेक्षकांचं मनोरंजन केलं आहे. मालिकेतील प्रत्येक पात्रानं प्रेक्षकांच्या मनात आणि थेट त्यांच्या घरात हक्काचं स्थान मिळवलं आहे. त्यातच आथा विविधभाषी प्रेक्षकांसाठीसुद्धा ही मालिका प्रसारित केली जात असल्यामुळं लोकप्रियतेच्या बाबतीत मालिका पुन्हा बाजी मारत आहे.