atul parchure death : 'आज आमचा अतुल गेला...', शाळेतल्या मित्र जाण्याने राज ठाकरे हळहळले...
atul parchure death : अतुल परचुरे यांच्या निधनानंतर मनसे अध्यक्ष राज ठाकरे यांची प्रतिक्रिया समोर आली आहे.
Atul Parchure death : अभिनेते अतुल परचुरे (atul parchure) यांनी सोमवार 12 ऑक्टोबर रोजी अखेरचा श्वास घेतला. अतुल परचुरे यांची कर्करोगाशी झुंज अपयशीच ठरली. अतुल परचुरे यांच्या निधनानंतर सिनेसृष्टीसह राजकीय वर्तुळातूनही शोक व्यक्त केला जात आहे. दरम्यान मनसे अध्यक्ष राज ठाकरे (Raj Thackeray) यांनीही अतुल परचुरे यांना श्रद्धांजली वाहिली आहे.
अतुल परचुरे यांनी राज ठाकरे हे शाळेतले मित्र होते. तेव्हापासूनची मैत्री ही अगदी आतापर्यंतच्या कठीण काळातही पाहायला मिळाली. अतुल परचुरे यांचं महाविद्यालयीन शिक्षण हे रुपारेल महाविद्यालयातून झालं. पण ते राज ठाकरेंसोबत बालमोहन शाळेतून शिक्षण घेतलं. त्यामुळे त्यांची मैत्री ही अगदी शाळेपासूनच होती. इतकच नव्हे तर राज ठाकरेंनी जेव्हा मनसे पक्षाची स्थापना केली त्यावेळी अतुल परचुरे यांनी मनसेच्या सदस्यत्वाचा फॉर्मही भरला होता.
'आज आमचा अतुल गेला...'
राज ठाकरे यांनी पोस्ट करत म्हटलं की, आज आमचा अतुल गेला.... एक उमदा नट आणि त्याहून महत्वाचं म्हणजे माझा एक जवळचा मित्र गेला. बाळाचे पाय पाळण्यात दिसतात म्हणतात तसं अतुलचं होतं. आम्ही सगळे बालमोहन शाळेचे विद्यार्थी. आम्ही शाळेत असतानाचा काळ असा होता की सिनेमाच्या जगातले राजेश खन्ना, अमिताभ बच्चन, विनोद खन्ना हे आमचे शाळेबाहेरचे हिरो पण अर्थात आमच्यापासून मैलांवरचे असलेले हिरो किंवा आम्ही त्यांचे चाहते म्हणू. पण शाळेत आम्ही ज्याचे चाहते होतो तो म्हणजे अतुल परचुरे. तो त्या काळात बजरबट्टू नावाच्या नाटकात काम करायचा . शाळेत असताना पण तो उस्फुर्त आणि उमदा नट. अतुल हा जन्मजात अभिनेता असं म्हणणं वावगं ठरणार नाही.
'आमच्यासाठी तो तेव्हाच एक सेलिब्रिटी होता !'
पुढे त्यांनी म्हटलं की, 'शाळेत असताना त्याचा आणि माझा फारसा मैत्र नव्हता, पण आमच्यासाठी तो तेव्हाच एक सेलिब्रिटी होता ! कॉलेजला गेल्यावर जरी आमची कॉलेजेस वेगळी होती तरी आमची मैत्री झाली आणि ती घट्ट पण होत गेली. अतुल हा खरा रंगकर्मी. कापूस कोंड्याची गोष्ट, नातीगोती, तरुण तुर्क म्हातारे अर्क, व्यक्ती आणि वल्ली अशा नाटकांमध्ये अतुलने जे काम केलं अफाट होतं. बरं अतुल इतका नशीबवान अभिनेता की, त्याचं व्यक्ती आणि वल्ली मधलं काम पु.ल. देशपांड्यांनी फक्त पाहिलं नाही तर त्याला दाद देखील दिली.'
'तेव्हा अतुलने पक्ष सदस्यत्वाचा फॉर्म देखील भरला..'
'मी जेव्हा पक्ष स्थापन केला, तेव्हा अतुलने पक्ष सदस्यत्वाचा फॉर्म देखील भरला होता. तेव्हाच्या राजकीय परिस्थितीत एखाद्या कलाकाराने असं पाऊल उचलणं हे धाडस होतं, पण ते त्याने दाखवलं. तो पुढे माझ्या कुटुंबाचा भाग बनला होता. कायम आनंदी, जरा जास्तच गुटगुटीत असा हा आमचा मित्र, ज्यावरून मी त्याला कायम चिडवायचो, असा अतुल जेव्हा कर्करोगाशी झुंज देऊन बाहेर आला आणि जेव्हा तो खंगला होता, तेव्हा तो आमच्या मित्रांपैकी कोणालाच बघवत नव्हता. पण अशा अवस्थेत सुद्धा तो आनंदी राहण्याचा प्रयत्न करत होता.'
'मी म्हणलं तसं अतुल हा प्रतिभावान कलावंत होता आणि वृत्तीने आनंदी होता. त्याने मराठी आणि हिंदी चित्रपट केले, टीव्ही मालिका केल्या, हिंदीत पण त्याने अनेक टीव्ही शो केले पण अतुल हा खरा रंगकर्मी. त्याचा रंगमंचावरचा वावर, त्याच्या विनोदाच्या टाईमिंगचा असलेला सेन्स सगळंच अप्रतिम होतं. अभिनयावर कमालीचं प्रेम असलेल्या अतुलने अकाली 'एक्झिट' घेतली, पण जाताना रंगभूमीपासून, सर्व मित्रांच्या आयुष्यातलं काही तरी निखळलं ही भावना ठेवून गेला. आमच्या या मित्राला माझी आणि महाराष्ट्र नवनिर्माण सेनेची विनम्र श्रद्धांजली', अशी पोस्ट राज ठाकरे यांनी केली आहे.
आज आमचा अतुल गेला.... एक उमदा नट आणि त्याहून महत्वाचं म्हणजे माझा एक जवळचा मित्र गेला. बाळाचे पाय पाळण्यात दिसतात म्हणतात तसं अतुलचं होतं. आम्ही सगळे बालमोहन शाळेचे विद्यार्थी. आम्ही शाळेत असतानाचा काळ असा होता की सिनेमाच्या जगातले राजेश खन्ना, अमिताभ बच्चन, विनोद खन्ना हे आमचे… pic.twitter.com/gDRD5tYHWK
— Raj Thackeray (@RajThackeray) October 14, 2024
ही बातमी वाचा :
महत्त्वाच्या बातम्या
ट्रेंडिंग न्यूज
