‘मोहिनी’ मालिकेत हृदय पिळवटून टाकणारा सीन! आईसाठी तडफडणारा RK मारतोय चाबकाचे फटके, प्रेक्षकही हेलावले!

या प्रसंगातून आरकेचं आईवरील अतूट प्रेम, असहाय्यता आणि तिच्याबद्दलची काळजी अत्यंत तीव्रतेने व्यक्त होते.

Mohini Serial

Source : ABPLIVE AI

Mohini Marthi Serial:गेल्या अनेक दिवसांपासून छोट्या पडद्यावर मोहिनी या नव्या मालिकेची जोरदार चर्चा आहे. ‘मोहिनी - प्रेमाची फिल्मी कहाणी’ मालिकेत एक भावनिक वळण प्रेक्षकांना पाहायला मिळणार आहे. आरके (Sameer Pranjpe) ची आई चारधाम यात्रेदरम्यान भूस्खलनात अडकते आणि तिच्याबाबत कोणतीही ठोस माहिती मिळत नसल्याने आरके पूर्णपणे हतबल होतो. तिच्याशी संपर्क साधण्याचे आणि स्वतः तिथे पोहोचण्याचे त्याचे सर्व प्रयत्न अपयशी ठरतात. आईचं अस्तित्वच अनिश्चित झाल्याने आरके मानसिकदृष्ट्या खचून जातो.

भावनांचा कळस गाठणारा सीन प्रक्षकांना भिडणार 

अशाच अवस्थेत शूटिंगसाठी जात असताना त्याला रस्त्यावर ‘पोतराज’ दिसतो स्वतःलाच फटके मारत असलेला. ते दृश्य पाहून आरकेच्या मनात दडलेली वेदना उफाळून येते. क्षणाचाही विचार न करता तो कारमधून उतरतो, पोतराजच्या हातातील चाबूक घेतो आणि स्वतःलाच फटके मारू लागतो. बंटीच्या नजरेतून दिसणारा हा प्रसंग अत्यंत भावनिक वाटतो जिथे पोतराजच्या रूपातच आरके स्वतःला शिक्षा करताना दिसतो. या प्रसंगातून आरकेचं आईवरील अतूट प्रेम, असहाय्यता आणि तिच्याबद्दलची काळजी अत्यंत तीव्रतेने व्यक्त होते. भावनांचा हा कळस गाठणारा सीन प्रेक्षकांच्या मनाला नक्कीच भिडणार आहे.

समीर परांजपे मुख्य भूमिकेत 

या मालिकेत मुख्य भूमिका साकारणारा अभिनेता समीर परांजपे आहे. ‘कलर्स मराठी’वरील ‘सुंदरा मनामध्ये भरली’ या मालिकेमुळे त्याला प्रेक्षकांची विशेष पसंती मिळाली आणि तो घराघरांत पोहोचला. त्यानंतर त्याने ‘स्टार प्रवाह’वरील ‘थोडं तुझं आणि थोडं माझं’ या मालिकेतही मुख्य भूमिका साकारून आपली वेगळी ओळख निर्माण केली.

आता ‘मोहिनी - प्रेमाची फिल्मी कहाणी’ या मालिकेत समीर ‘आरके’ ही महत्त्वाची भूमिका साकारताना दिसणार आहे. या कथेत मोहिनीचा स्वाभिमान आणि आरकेचा अहंकार यांच्यातील संघर्ष केंद्रस्थानी आहे. सुरुवातीला सेटवर सुरू झालेली ही गोष्ट हळूहळू वास्तव आयुष्यातही उमटताना दिसेल. या नात्यात पुढे काय वळण येणार आणि दोघांमधील हा संघर्ष कुठे नेणार, हे पाहणं प्रेक्षकांसाठी नक्कीच रंजक ठरणार आहे.