Marathi Movie : 'शिवाजी अंडरग्राऊंट इन भीमनगर मोहल्ला' फेम अभिनेत्याचा नवा सिनेमा प्रेक्षकांच्या भेटीला, ‘गाभ’ मधून नवी जोडी रुपेरी पडद्यावर
Kailas Waghmare : अभिनेता कैलास वाघमारेचा नवा सिनेमा प्रेक्षकांच्या भेटीला येणार आहे. या सिनेमात कैलास मुख्य भूमिकेत आहे.
Kailas Waghmare : असं म्हणतात की, ‘लग्नाच्या गाठी या स्वर्गात बांधल्या जातात’ मात्र ‘गाभ’ चित्रपटातील कैलास आणि सायलीच्या प्रेमाची अनोखी रेशीमगाठ चक्क एका रेड्याने जुळवली आहे. चित्रपटातील दादू अभिनेता कैलास वाघमारे आणि फुलवा म्हणजे अभिनेत्री सायली बांदकर या दोघांच्या प्रेमामध्ये रेडा कशी महत्त्वपूर्ण भूमिका बजावतो याची रंजक कथा या चित्रपटात पहायला मिळणार आहे. अभिनेता कैलास वाघमारे (Kailash Waghmare) आणि अभिनेत्री सायली बांदकर ही फ्रेश जोडी 21 जूनला येणाऱ्या ‘गाभ’ या मराठी चित्रपटाच्या निमित्ताने रुपेरी पडद्यावर झळकणार आहे. ‘गाभ’ चित्रपटाची संकल्पना, लेखन आणि दिग्दर्शन अनुप जत्राटकर यांचे आहे. टाईम लॅप्स प्रोडक्शन आणि एजे मल्टिमीडिया प्रोडक्शनची निर्मिती असलेल्या या चित्रपटाचे निर्माते सुमन नारायण गोटुरे आणि मंगेश नारायण गोटुरे आहेत. सहनिर्माते अनुप जत्राटकर आहेत.
‘गाभ’ चित्रपटातील कैलासचा रोमँटिक अंदाज त्याच्या ‘दादू’ या व्यक्तिरेखेतून पहायला मिळणार आहे. ‘या चित्रपटाच्या निमित्ताने आम्ही दोघांनी पहिल्यांदाच एकत्र काम केलं असून चित्रपटातील आमची केमेस्ट्री प्रेक्षकांना नक्कीच भावेल’, असा विश्वास या दोघांनी व्यक्त केला. चित्रपटात या दोघांसोबत विकास पाटील, उमेश बोळके, वसुंधरा पोखरणकर, श्रद्धा पवार, चंद्रशेखर जनवाडे यांच्या भूमिका आहेत. छायाचित्रण वीरधवल पाटील यांचे तर संकलन रविंद्र चांदेकर यांचे आहे. गीते आणि संगीत आणि साउंड डिझाइनची जबाबदारी चंद्रशेखर जनवाडे यांनी सांभाळली असून पार्श्वसंगीत रविंद्र चांदेकर यांचे आहे. आनंद शिंदे, प्रसन्नजीत कोसंबी, सावनी रविंद्र यांचा स्वरसाज चित्रपटातील गाण्यांना लाभला आहे.
सिनेमा कधी येणार प्रेक्षकांच्या भेटीला?
आपल्या माजाला आलेल्या म्हशीसाठी रेडा शोधताना नायकामध्ये माणूस म्हणून होणारा बदल आणि त्याची गावच्या रांगड्या मातीच्या पार्श्वभूमीवरील ‘ गाभ’ ही कथा आपल्याला नक्कीच भावेल. 21 जूनला ‘गाभ’ सर्वत्र प्रदर्शित होणार आहे. 'शिवाजी अंडरग्राउंड इन भीमनगर मोहल्ला' या नाटकातून कैलास वाघमारे चर्चेत आला. 'मनातल्या उन्हात' या चित्रपटातून सिनेसृष्टीत नायक म्हणून पदार्पण केले. हाफ टिकीट, भिकारी आदी चित्रपटातील त्याच्या भूमिका लक्षात राहिल्या. तानाजी-द अनसंग वॉरियर, भोंसले आदी चित्रपटातही भूमिका साकारल्या आहेत. सध्या कैलास हा अभिनेत्री हुमा कुरेशी आणि चंकी पांडे सोबत काम करत आहे. तर, विविध चित्रपट महोत्सवात गौरवण्यात आलेला 'गाभ'चित्रपट आता प्रदर्शित होणार आहे.
ही बातमी वाचा :
महत्त्वाच्या बातम्या
ट्रेंडिंग न्यूज
