Drishyam 3 Box Office Collection: ‘दृश्यम 3’ नं बॉक्स ऑफिस हादरलं; 48 तासांत 6 सिनेमांना धोबीपछाड, अवघ्या 2 दिवसांत कमाईचे सर्व रेकॉर्ड मोडले

चित्रपटाची वाढती कमाई पाहता येत्या काही दिवसांत ‘दृश्यम 3’ आणखी मोठे रेकॉर्ड मोडणार का, याकडे आता सगळ्यांचं लक्ष लागलं आहे.

Drishyam 3

Source : ABPLIVE AI

Drishyam 3 Box Office Collection: मोहनलालचा बहुप्रतिक्षित ‘दृश्यम 3’( Drishyam 3) सिनेमा रिलीज होताच बॉक्स ऑफिसवर अक्षरशः वादळ घेऊन आला आहे. सस्पेन्स, थ्रिल आणि जबरदस्त कथानकामुळे प्रेक्षकांनी चित्रपटाला डोक्यावर घेतलं आहे. अवघ्या 48 तासांतच या सिनेमाने विक्रमी कमाई करत अनेक मोठ्या मल्याळम सिनेमांना मागे टाकलं आहे.(Box office collection) 

दृश्यम 3 चं 48 तासांचं कलेक्शन किती?

जीतू जोसेफ दिग्दर्शित ‘दृश्यम 3’ची रिलीजपूर्वीपासूनच मोठी चर्चा होती. अॅडव्हान्स बुकिंगमध्येही सिनेमाने दमदार कामगिरी केली होती. पहिल्याच दिवशी चित्रपटाने 15.85 कोटी रुपयांची कमाई करत शानदार ओपनिंग घेतली. दुसऱ्या दिवशी कमाईत थोडी घट झाली असली, तरी चित्रपटाने 11.05 कोटींचं नेट कलेक्शन केलं. सॅकनिल्कच्या रिपोर्टनुसार, दोन दिवसांत ‘दृश्यम 3’चं भारतातील नेट कलेक्शन 26.90 कोटींवर पोहोचलं आहे, तर ग्रॉस कलेक्शन 31.18 कोटी रुपये झालं आहे.

विदेशात ‘दृश्यम 3’चा जलवा

भारतात कमाईत किंचित घसरण झाली असली, तरी परदेशात मात्र मोहनलालच्या सिनेमाचा दबदबा कायम आहे. रिपोर्टनुसार, दुसऱ्याच दिवशी चित्रपटाने विदेशात जवळपास 20 कोटी रुपयांची कमाई केली. त्यामुळे ‘दृश्यम 3’ची एकूण ओव्हरसीज कमाई 45 कोटींवर पोहोचली आहे. याचबरोबर चित्रपटाचं वर्ल्डवाइड कलेक्शन अवघ्या दोन दिवसांत 76.18 कोटी रुपयांवर गेलं आहे.

6 सिनेमांना टाकलं मागे

‘दृश्यम 3’ने जगभरातील सर्वाधिक कमाई करणाऱ्या मल्याळम चित्रपटांच्या यादीत मोठी झेप घेतली आहे. अवघ्या 48 तासांतच या चित्रपटाने सहा सिनेमांना मागे टाकत चौथ्या क्रमांकावर झेप घेतली आहे. सध्या 2026 मधील सर्वाधिक कमाई करणाऱ्या मल्याळम चित्रपटांच्या यादीत ‘वाझा 2’, ‘आडू 3’ आणि ‘पैट्रियट’ या चित्रपटांनंतर ‘दृश्यम 3’ने स्थान मिळवलं आहे.

वर्ल्डवाइड 2026 च्या सर्वात जास्त कमाई करणाऱ्या टॉप 10 मल्याळम फिल्म..(जगभरातले ग्रॉस कलेक्शन )

वाझा 2: 238.46 कोटी
आडू 3: 121.31 कोटी
पैट्रियट: 80.51 कोटी
दृश्यम 3: 76 - 78 कोटी (2 दिवस )
अथिराडी: 54.69 कोटी
भरतनाट्यम 2 मोहिनीअट्टम: 40.63 कोटी
चथा पाचा: 33.47 कोटी
प्रकम्बनम: 20.86 कोटी
पल्लीचट्टंबी: 14.49 कोटी
आशाकाल आयराम: 12.71 कोटी

प्रेक्षकांकडून तुफान प्रतिसाद

सोशल मीडियावरही ‘दृश्यम 3’ची जोरदार चर्चा सुरू आहे. मोहनलालच्या अभिनयाचं कौतुक होत असून चित्रपटातील ट्विस्ट आणि क्लायमॅक्स प्रेक्षकांना भुरळ घालत आहेत. अनेकांनी या चित्रपटाला फ्रेंचायझीतील सर्वात दमदार भाग असल्याचं म्हटलं आहे. चित्रपटाची वाढती कमाई पाहता येत्या काही दिवसांत ‘दृश्यम 3’ आणखी मोठे रेकॉर्ड मोडणार का, याकडे आता सगळ्यांचं लक्ष लागलं आहे.