Ye Re Ye Re Pavasa : ‘येरे येरे पावसा’ सिनेमाचा चिंब करणारा ट्रेलर प्रदर्शित

Ye Re Ye Re Pavasa : ‘येरे येरे पावसा’ या सिनेमाचा ट्रेलर नुकताच आऊट झाला आहे.

Ye Re Ye Re Pavasa

Ye Re Ye Re Pavasa : आपण एखाद्या मित्राची वाट बघत असतो, पण ठरल्यावेळी तो येत नाही. तो उद्या येईल असं आपण आपल्या मनाला समजावतो पण तो दुसऱ्या दिवशीही येत नाही. आपली निराशा होते. त्याला आपण जवळजवळ विसरतो. पण आतल्या आत मनाची घालमेल होतच राहते. मग बहुतेक तो उशिरा येईल किंवा येणारच नाही अशी मनाची अटकळ करतो आणि मग एके दिवशी अचानक अगदी ध्यानीमनी नसताना तो येतो. बेधुंद होऊन अशा मित्रासारखाच पहिला पाऊस येतो तेव्हा आपण त्या आनंदाने सुखावून जातो. 

धमाकेदार ट्रेलर प्रदर्शित

एका छोटयाशा दुर्गम खेडेगावातल्या चिमुकल्यांनाही या पावसाची अशीच प्रतिक्षा आहे. त्यासाठी ते आभाळाकडे डोळे लावून बसले आहेत. त्यांच्या आशा निराशेच्या खेळाची रंगतदार गोष्ट म्हणजे ‘येरे येरे पावसा’ हा मराठी सिनेमा. आशावादाच्या सरी घेऊन या सिनेमाचा धमाकेदार ट्रेलर नुकताच प्रदर्शित करण्यात आला आहे. येत्या 17 जूनला चित्रपटगृहांत मनसोक्त भिजवायला हा पाऊस सज्ज झाला आहे. या सिनेमाची निर्मिती शारीक खान यांची असून दिग्दर्शन शफक खान यांनी केलं आहे.

आपलं आणि पावसाचं नातं अगदी जवळचं असतं. हेच नातं अधोरेखित करताना पावसाची हलकी-फुलकी कथा आम्ही मांडण्याचा प्रयत्न केला असून ही गोष्ट प्रत्येकाला खूप काही देऊन जाईल, असा विश्वास दिग्दर्शक शफक खान यांनी व्यक्त केला आहे.

राष्ट्रीय आणि आंतराष्ट्रीय चित्रपट महोत्सवांमध्ये मोहोर उमटविणारा सिनेमा

‘जीफोनी’, ‘हॉलीवूड नॉर्थ फिल्म’, ‘टोकियो इंडी फिल्म’ या आणि अशा अनेक राष्ट्रीय आणि आंतराष्ट्रीय चित्रपट महोत्सवांमध्ये मोहोर उमटविणारा हा चित्रपट 17 जूनला तुमच्या भेटीला येतो आहे. 14 देशातल्या 31 चित्रपट महोत्सवांमध्ये अधिकृत निवड झालेल्या या चित्रपटाने 22  नामांकन आणि 16 पुरस्कार आतापर्यंत पटकावले आहेत.

येरे येरे पावसामध्ये दिसणार 'हे' कलाकार

छाया कदम, मिलिंद शिंदे, संदेश जाधव,  चिन्मयी साळवी, विनायक पोतदार, आर्या आढाव, प्रदीप नवले, प्राजक्ता वाड्ये, वैभव जेऊघाले पाटील, हृषीकेश करळे, नकुल चौधरी, वैष्णवी रानमाळे, उत्कर्ष करळे, अचला पांचाळ, प्रज्ञा गोपाले हे कलाकार या सिनेमात प्रमुख भूमिकेत आहेत.

संबंधित बातम्या