Lalbaugcha Raja : 'लालबागचा राजा'ला एकीकडे व्हीआयपी दर्शनाची रीघ, दुसरीकडे बॉलिवुड कलाकार सर्वसामान्यांच्या रांगेतून दर्शनाला; पाहा व्हिडीओ
Randeep Hooda at Lalbaugcha Raja : बॉलिवूड अभिनेता रणदीप हुड्डा या सध्या एका वेगळ्या कारणामुळे चर्चेत आल्याचं पाहायला मिळतंय.
Randeep Hooda at Lalbaugcha Raja : 'स्वातंत्र्यवीर सावरकर' या सिनेमामुळे अभिनेता रणदीप हुड्डा (Randeep Hooda) हा बराच चर्चेत आला होता. त्याच्या सिनेमाचं अनेक स्तरातून बरंच कौतुकही झालं. त्याचा अभिनय, दिग्दर्शन या सगळ्याचीच दखल घेण्यात आली. पण सध्या एका वेगळ्या कारणामुळे रणदीप हुड्डा चर्चेत आल्याचं पाहायला मिळतंय. तसेच त्याच्यासोबत परिणीती चोप्राही (Parineeti Chopra) बरीच चर्चेत आली आहे.
सध्या मुंबईत गणेशोत्सवाचा उत्साह पाहायला मिळत असून अनेक प्रसिद्ध गणपती मंडळांमध्ये व्हीआयपींची रीघ लागली आहे. लालबागचा राजाच्या चरणी तर अंबानी कुटुंबापासून अनेक दिग्गज मंडळी लीन झालीत. पण नुकतच या मंडपात एका अभिनेत्रीला मिळालेल्या वागणुकीमुळे बरीच चर्चा झाली. याच सगळ्यात रणदीप हुड्डाने मात्र सगळ्यांचचं लक्ष वेधून घेतलं.
रणदीपने रांगेत उभं राहून घेतलं दर्शन
दरम्यान लालबागच्या राजाला रणदीप हुड्डा त्याच्या पत्नीसह लालबागच्या राजाच्या दर्शनाला गेला होता. पण व्हीआयपी दर्शन न घेता रणदीपने रांगेत उभं राहून दर्शन घेणं पसंत केलं. सोशल मीडियावर सध्या याच व्हिडीओची बरीच चर्चा सुरु आहे. रांगेत उभं असताना अनेकजण त्याच्यासोबत फोटो काढताना दिसले.
परिणीती चोप्रानेही घेतलं रांगेतून दर्शन
दरम्यान रणदीप लालबागच्या राजाच्या दर्शनाला गेला असताना त्याच रांगेत परिणीती चोप्रा देखील उभी होती. त्यामुळे परिणीती चोप्रानेही साऱ्यांचं लक्ष वेधून घेतलं. जवळपास संपूर्ण महाराष्ट्रातून लालबागच्या राजाचं दर्शन घेण्यासाठी लोकं अनेक तास रांगेत उभे राहतात. त्यातच व्हीआयपी दर्शनामुळे याच रांगा कितीतरी तास खोळंबतात. या सगळ्यात रणदीप आणि परिणीतीच्या या निर्णयाचं सगळ्यांकडून स्वागत केलं जातंय.
लालबागचा राजाला व्हीआयपींची रिघ
दरम्यान लालबागचा राजाला आतापर्यंत अनेक कलाकारांनी व्हीआयपी दर्शन घेतलं आहे. कार्तिक आर्यन, शिल्पा शेट्टी असे अनेक कलाकार लालबागच्या राजाच्या चरणी लीन झाले. तसेच अमित शाह, उद्धव ठाकरे या राजकीय नेत्यांनीही राजाचं दर्शन घेतलं. संपूर्ण अंबानी कुटुंबियांनी देखील लालबागचा राजाचं दर्शन घेतलं आहे. इतकचं नव्हे तर अंबानी कुटुंबियांकडून सोन्याचा मुकूट अर्पण करण्यात आला आहे.
View this post on Instagram
ही बातमी वाचा :
महत्त्वाच्या बातम्या
ट्रेंडिंग न्यूज
