Mahima Chaudhry : पहिला सिनेमा सुपरहिट...लग्न, दोनदा गर्भपात, घटस्फोट अन् कॅन्सरची लढाई; जाणून घ्या अभिनेत्रीच्या संघर्षाची कहाणी

Mahima Chaudhry : अभिनेत्री महिमा चौधरीने वैयक्तिक आयुष्यात अनेक गोष्टींचा सामना केला आहे.

Mahima Chaudhry

Mahima Chaudhry : अभिनेत्री महिमा चौधरी (Mahima Chaudhry) अनेक सुपरहिट सिनेमाचा भाग आहे. पण गेल्या काही दिवसांपासून वैयक्तिक आयुष्यामुळे ती मनोरंजनसृष्टीपासून दूर आहे. आता कंगना रनौतच्या (Kangana Ranaut) 'इमर्जन्सी' या सिनेमाच्या माध्यमातून ती रुपेरी पडद्यावर कमबॅक करत आहे. लग्न, दोनदा गर्भपात, घटस्फोट आणि कॅन्सर अशा सर्व गोष्टींचा सामना केल्यानंतर आता अभिनेत्री रुपेरी पडदा गाजवायला सज्ज आहे. 

महिमाने 1997 मध्ये आलेल्या 'परदेस' या सिनेमाच्या माध्यमातून अभिनयक्षेत्रात पदार्पण केलं. पहिल्याच सिनेमाने ती लोकप्रियतेच्या शिखरावर पोहोचली. त्यावेळी अभिनेत्री टेनिसपटू लिअँडर पेसला डेट करत होती. पण त्यांचं नातं फार काळ टिकलं नाही. त्यानंतर महिमाचं नाव अजय देवगणसोबत जोडलं गेलं.

करिअर पीकवर असताना महिमाचा भीषण अपघात झाला. 1994 मध्ये ती 'दिल क्या करे' या सिनेमाचं शूटिंग करत होती. या शूटिंगदरम्यान महिमाचा अपघात झाला होता. तिच्या चेहऱ्यालाही मोठी दुखापत झाली होती. त्यानंतर महिमा 2006 मध्ये बॉबीसोबत लग्नबंधनात अडकली. महिमाने 2007 मध्ये अरियाना जन्म दिला. त्यानंतर दोनदा गर्भपात करण्यात आला. पुढे बॉबी आणि तिचं
नातं फार काळ टिकू शकलं नाही. 2013 मध्येच त्यांचा घटस्फोट झाला. महिमाची कर्करोगाशी झुंझ यशस्वी झाली आहे.  

महिमा चौधरीबद्दल जाणून घ्या... (Who Is Mahima Chaudhry)

महिमा चौधरी एक लोकप्रिय सिने-अभिनेत्री आहे. महिमाचं खरं नाव रितू चौधरी असं आहे. सुभाष घईंच्या 'परदेस' या सिनेमाच्या माध्यमातून महिमाने सिनेसृष्टीत पदार्पण केलं. या सिनेमातील भूमिकेसाठी तिला सर्वोत्कृष्ट पदार्पणासाठी फिल्मफेअर पुरस्कारदेखील मिळाला. त्यानंतर अनेक अनेक हिंदी सिनेमांत काम केलं. आता अभिनेत्रीच्या आगामी सिनेमांची प्रेक्षकांना उत्सुकता आहे.

महिमाने 'धडकन','दिल है तुम्हारा','लज्जा' आणि 'बागवान' अशा अनेक सुपरहिट सिनेमांत काम केलं आहे. पण 2008 नंतर तिने निवडक प्रोजेक्टलाच होकार दिला. 2016 मध्ये आलेल्या 'चॉकलेट' या बंगाली सिनेमात ती मध्यवर्ती भूमिकेत होती. 

बॉलिवूड अभिनेत्री कंगना रनौतच्या 'इमर्जन्सी' या सिनेमाच्या माध्यमातून महिमा चौधरी पुन्हा एकदा प्रेक्षकांच्या भेटीला येणार आहे. नुकताच या सिनेमातील महिमा चौधरीचा लूकही समोर आला आहे. या सिनेमात अभिनेत्री प्रसिद्ध लेखक पुपुल जयकर यांची भूमिका साकारत आहे. महिमाचा लूक हुबेहूब पुपुल जयकरसारखा आहे. कॅन्सरमधून बरी झाल्यानंतर महिमा या सिनेमाच्या माध्यमातून पहिल्यांदाच पडद्यावर कमबॅक करत आहे.

संबंधित बातम्या