TOP 5 Entertainment News : दिवसभरातील पाच महत्त्वाच्या मनोरंजनविषयक बातम्या

Entertainment News : दिवसभरातील पाच महत्त्वाच्या मनोरंजनविषयक बातम्यांचा घेतलेला आढावा.

entertainment

TOP 5 Entertainment News : दिवसभरातील पाच महत्त्वाच्या मनोरंजनविषयक बातम्या -

'केजीएफ 2'च्या प्री-बुकिंगला सुरुवात

केजीएफ 2' सिनेमा लवकरच रिलीज होणार आहे. बॉक्स ऑफिसवर हा सिनेमा चांगलीच कमाई करेल, अशी शक्यता वर्तवली जात आहे. आता या सिनेमाच्या प्री-बुकिंगला सुरुवात झाली आहे. प्री-बुकिंग सुरु झाल्यापासून 12 तासांत या सिनेमाने पाच हजारांहून अधिक तिकिटे विकली आहेत. या सिनेमाची प्रेक्षक आतुरतेने वाट पाहत आहेत. सिनेमाची तिकिटे विकली गेल्याने हा सिनेमा अल्पावधीतच बॉक्स ऑफिसवर धुमाकूळ घालेल, असे म्हटले जात आहे. 

‘हा’ प्रसिद्ध डिझायनर बनवणार आलिया-रणबीरच्या लग्नाचा पेहराव

रणबीर कपूर आणि आलिया भट्टचे चाहते त्यांच्या लग्नाची आतुरतेने वाट पाहत होते. आता त्यांच्या लग्नाची तारीख समोर आली असून, प्रत्येक दिवसागणिक लग्नाबाबत नवनवीन माहिती समोर येत आहे. पाहुण्यांच्या यादीपासून ते स्थळापर्यंत सर्वच गोष्टी जाणून घेण्यासाठी चाहते उत्सुक असतात. दरम्यान, नववधूच्या वेशभूषेबाबत चर्चांना उधाण आले आहे. रिपोर्ट्सनुसार, आलिया भट्ट तिच्या लग्नात सब्यसाची मुखर्जीचा पोशाख परिधान करणार आहे.

मल्याळम सुपरस्टार श्रीनिवासन यांची प्रकृती चिंताजनक

प्रसिद्ध मल्याळम चित्रपट अभिनेते श्रीनिवासन यांची प्रकृती चिंताजनक आहे. त्यांना रुग्णालयात व्हेंटिलेटरवर ठेवण्यात आले आहे. राष्ट्रीय पुरस्कार विजेते श्रीनिवासन यांना 30 मार्च रोजी हृदयविकाराचा झटका आला होता, त्यानंतर 31 मार्च रोजी त्यांच्यावर इमर्जन्सी बायपास सर्जरी करण्यात आली. त्यांच्या प्रकृतीत कोणतीही सुधारणा होत नसल्याचे रुग्णालयाच्या डॉक्टरांनी सांगितले आहे, त्यामुळे त्यांना स्थिर करण्यासाठी व्हेंटिलेटरवर ठेवण्यात आले आहे. वैद्यकीय अहवालानुसार श्रीनिवासन ट्रिपल वेसल डिसीजने त्रस्त आहेत.

बंकिमचंद्र चटर्जींच्या ‘आनंदमठ’चा रिमेक येणार

आज 8 एप्रिल हा भारतातील प्रसिद्ध कादंबरीकार महर्षी बंकिमचंद्र चटर्जी यांची 128वी पुण्यतिथी आहे. या खास दिवसाचे औचित्य साधून, प्रसिद्ध लेखक आणि निर्माते राम कमल मुखर्जी आणि झी स्टुडिओचे माजी प्रमुख सुजॉय कुट्टी यांनी के. व्ही. विजेंद्र प्रसाद यांच्यासोबत त्यांच्या ‘1770 एक संग्राम’ या सुंदर कलाकृतीसाठी सहकार्य केले आहे. ही कथा कलाकृती चॅटर्जी यांच्या सुप्रसिद्ध राष्ट्रवादी बंगाली कादंबरी ‘आनंदमठ’पासून प्रेरित आहे.

‘नवे लक्ष्य’ मालिकेत अदिती सारंगधर आणि श्वेता शिंदे पुन्हा साकारणार गाजलेली भूमिका

'नवे लक्ष्य' या मालिकेत अभिनेत्री अदिती सारंगधर आणि श्वेता शिंदे यांची धमाकेदार एण्ट्री होणार आहे. 'नवे लक्ष्य'च्या पहिल्या पर्वात म्हणजेच लक्ष्य मालिकेत रेणुका राठोड आणि सलोनी देशमुख या दोन्ही व्यक्तिरेखा खूप गाजल्या होत्या. त्यामुळे ही गाजलेली पात्र मालिकेत पुन्हा पाहायला मिळतील. या निमित्ताने युनिट 8 आणि युनिट 9 एकत्र येऊन आठ वर्षांपूर्वींच्या केसचा गुंता सोडवणार आहेत. अभिनेत्री अदिती सारंगधर आणि श्वेता शिंदे जुनी भूमिका नव्याने साकारण्यासाठी सज्ज झाल्या असून 'नवे लक्ष्य'च्या टीमसोबत काम करण्यासाठी प्रचंड उत्सुक आहेत.

संबंधित बातम्या