Bigg Boss Marathi 6: आईच्या आठवणीत राखी सावंत ढसाढसा रडली, अनुश्री अन् प्राजक्ता फिदीफिदी हसल्या; सुप्रसिद्ध मराठी अभिनेत्रीचा राग विकोपाला, म्हणाली...
Bigg Boss Marathi 6: बिग बॉसनं दिलेल्या एका टास्कमध्ये घरातील सदस्यांना पुरून उरणारी राखी सावंत मात्र, ढसाढसा रडताना दिसली. पण, प्राजक्ता आणि अनुश्री मात्र फिदीफिदी हसताना दिसल्या.
Bigg Boss Marathi 6: 'बिग बॉस मराठी'चा सहावा सीझन (Bigg Boss Marathi 6) सध्या चांगलाच चर्चेत आहे. सीझन सुरू होऊन आता तब्बल सहा आठवडे उलटले आहेत. अशातच आता या शोमध्ये ड्रामा क्वीन राखी सावंतची (Rakhi Sawant) एन्ट्री झाली आहे. राखीच्या येण्यानं घरातली पूर्ण समीकरणंच पार बदलून गेलीत. राखी सतत घरात काहीतरी करते आणि सदस्यांना धारेवर धरते. पण, बिग बॉसनं दिलेल्या एका टास्कमध्ये घरातील सदस्यांना पुरून उरणारी राखी सावंत मात्र, ढसाढसा रडताना दिसली. राखीला रडताना पाहून घरातील सदस्यांच्या डोळ्यांतही अश्रू तराळले, एवढंच काय तर प्रेक्षकही भावूक झाले. पण, त्याचवेळी घरातील प्राजक्ता शुक्रे (Prajakta Shukre) आणि अनुश्री माने (Anushri Mane) या दोघीजणी हसत होत्या.
बिग बॉसच्या कॅमेऱ्यांनी नेमकं हेच हेरलं. प्राजक्ता आणि अनुश्रीचं वागणं अनेकांना खटकलं आहे. दोघींवर जोरदार टीका होत असतानाच आता मराठी अभिनेत्रीनं दोघींना फटकारलं आहे. मराठी अभिनेत्री रुपाली भोसलेनं (Rupali Bhosale) सोशल मीडियावर पोस्ट करुन दोघींचा समाचार घेतला आहे.
राखी सावंत आईच्या आठवणीनं व्याकूळ होऊन रडत असताना अनुश्री माने आणि प्राजक्ता शुक्रे फिदीफिदी हसत होत्या. ते पाहून मराठी अभिनेत्री रुपाली भोसलेला राग अनावर झाला. रुपालीनं सोशल मीडियावर यासंदर्भात एक पोस्ट केली आहे.
View this post on Instagram
रुपाली भोसले चिडली, काय म्हणाली?
रुपाली भोसले राग व्यक्त करताना म्हणाली की, "खरंच... अनुश्री-प्राजक्ता? प्राजक्ता तू तर खूप बोलतेस, माणुसकीबद्दल... मग आता कुठे गेली गं? आणि अनुश्री तू खरंच हार्टलेस आहेस का? राखी कॉमेडी करत होती का? अगं मग तू विशालला बाद केलंस तेव्हा का रडलीस? ते ही हसण्यासारखंच होतं. प्राजक्ता तुझ्याकडून ही अपेक्षा नव्हती..." पुढे रुपालीनं त्याच टास्कचा एक फोटो शेअर केलाय.
राखीनंतर अनुश्री कन्फेशन रुममध्ये जाऊन तिच्या बाबांना फोन लावते. हा फोटो रुपालीनं शेअर केलाय आणि म्हणाली की,"प्राजक्ता आता हस आणि अनुश्री तूही हसत हसत बोल. किती खोटे आहात तुम्ही? एखाद्याचं व्यक्त होणं तुमच्यासाठी मस्करी? आणि तुम्ही जेव्हा व्यक्त होता ते मात्र खरं... हा विनोद आहे का तुमच्यासाठी?", असं म्हणत रुपालीनं अनुश्री आणि प्राजक्ताचा समाचार घेतला आहे.
टास्कदरम्यान नेमकं घडलं काय?
बिग बॉस मराठीच्या घरात एक टास्क दिला जातो. ज्यात घरातील कन्फेशन रूममध्ये एक खोटा टेलिफोन ठेवला गेला. त्यानंतर घरातील प्रत्येक सदस्यानं कन्फेशन रूममध्ये जाऊन आपल्या जवळच्या व्यक्तीला फोन करून त्याच्याबद्दलच्या भावना व्यक्त करायच्या असतात. यादरम्यान बिग बॉस राखी सावंतला कन्फेशन रूममध्ये बोलावतात. राखी कन्फेशन रुममध्ये जाऊन तिच्या आईला फोन लावते. काही वर्षांपूर्वीच राखीच्या आईचं निधन झालंय. राखी तिच्या आईला फोन लावते आणि ढसाढसा रडू लागते. राखीला रडताना पाहून घरातील अनेक सदस्यांच्या डोळ्यांत अश्रू तराळतात, पण त्यावर प्राजक्ता शुक्रे आणि अनुश्री माने हसू लागतात.
महत्त्वाच्या इतर बातम्या :
महत्त्वाच्या बातम्या
