Gaurav Khanna: ना 50 लाख, ना कार... 'बिग बॉस 19'चा विजेता गौरव खन्नाला काहीच मिळालं नाही, म्हणाला...
आतापर्यंत केलेल्या इतर कोणत्याही शोपेक्षा ‘बिग बॉस 19’मुळे त्याला सर्वाधिक ओळख मिळाली आहे.
Gaurav Khanna: टीव्ही अभिनेता गौरव खन्ना (Gaurav Khanna) याला छोट्या पडद्यावरील ‘हँडसम हंक’ म्हणून ओळखलं जातं. बिग बॉस 19 (Bigg Boss 19) जिंकल्यानंतर त्याची लोकप्रियता आणखी वाढली आणि तो घराघरात ओळखला जाऊ लागला. मात्र शो जिंकल्यानंतर मिळणारी 50 लाख रुपयांची बक्षिसाची रक्कम अद्याप मिळाली नसल्याचा खुलासा गौरवने अलीकडील यूट्यूब व्लॉगमध्ये केला आहे. तीन महिन्यांहून अधिक काळ घरात राहिल्यानंतर गौरव खन्ना ‘बिग बॉस 19’चा विजेता ठरला. डिसेंबर 2025 मध्ये झालेल्या ग्रँड फिनालेमध्ये होस्ट सलमान खानने गौरवला विजेता घोषित केले. मात्र शो जिंकल्यानंतर मिळणारी 50 लाख रुपयांची बक्षिसाची रक्कम अजूनही मिळालेली नसल्याचं त्याने सांगितलं.
गौरवला अजून मिळाले नाहीत बक्षिसाचे पैसे
गौरव आपल्या नव्या व्लॉगमध्ये चाहत्यांच्या प्रश्नांना उत्तर देत होता. त्यावेळी एका चाहत्याने विचारलं की, शोमध्ये जिंकलेल्या रोख रकमेबरोबरच कार आणि कूपन मिळाले का? यावर गौरव म्हणाला, “खरं सांगायचं तर या सगळ्या गोष्टी यायला थोडा वेळ लागतो. अजूनपर्यंत काहीही मिळालेलं नाही. पण मिळेल याची मला खात्री आहे. कारण यासाठी एक प्रक्रिया असते.” तो पुढे म्हणाला, “साधारणपणे एक-दोन महिने लागतात. कंपन्यांची स्वतःची इंटरनल ऑडिट प्रक्रिया असते. त्यामुळे थोडा उशीर होतो, पण काही अडचण नाही. मी टीव्ही इंडस्ट्रीतला माणूस आहे, इथे थोडा डिले होणं सामान्य आहे.”
कानपूरच्या घरी चाहत्यांची गर्दी
शो जिंकल्यानंतर आयुष्यात काय बदल झाला, असा प्रश्नही चाहत्यांनी विचारला. यावर गौरवने सांगितलं की कानपूरमधील त्याच्या घरी रोज सुमारे 50 ते 60 लोक भेटायला येतात. प्रेक्षकांना त्याचा शांत आणि सन्मानाने खेळलेला गेम खूप आवडला, असंही त्याने सांगितलं. त्याच्या मते, आतापर्यंत केलेल्या इतर कोणत्याही शोपेक्षा ‘बिग बॉस 19’मुळे त्याला सर्वाधिक ओळख मिळाली आहे.
गौरवचा दुसरा रिअॅलिटी शो विजय
गौरव खन्नाने याआधी ‘सेलिब्रिटी मास्टरशेफ’ जिंकल्यानंतर ‘बिग बॉस 19’ची ट्रॉफीही आपल्या नावावर केली. या शोमध्ये त्याने फरहाना भट , तान्या मित्तल , प्रणीत मोरे आणि अमाल मलिक यांना मागे टाकत विजेतेपद मिळवलं. विशेष म्हणजे, अनावश्यक भांडणं किंवा वाद न घालत शांतपणे खेळ खेळून शो जिंकणाऱ्या मोजक्या स्पर्धकांमध्ये गौरवचा समावेश झाला.
हेही वाचा:
महत्त्वाच्या बातम्या
