Rajya Sabha Election 2022: राज्यसभेसाठी मविआची ऑफर भाजपने धुडकावली; चंद्रकांत पाटील म्हणतात...
Rajya Sabha Election 2022: भाजप राज्यसभेच्या तिसऱ्या जागेसाठी आग्रही असल्याचे स्पष्ट झाले आहे. भाजप नेत्यांनी महाविकास आघाडीला बिनविरोध निवडणूक करण्यासाठीचा आपला प्रस्ताव दिला आहे.
Rajya Sabha Election 2022: राज्यसभेची निवडणूक बिनविरोध करण्यासाठी महाविकास आघाडी आणि भाजपच्या नेत्यांमध्ये झालेल्या चर्चेबाबत भाजपचे प्रदेशाध्यक्ष चंद्रकांत पाटील यांनी पक्षाची भूमिका स्पष्ट केली आहे. राष्ट्रीय पक्ष असल्याने भाजपसाठी राज्यसभा महत्त्वाची असून महाविकास आघाडीने ही तिसरी जागा आमच्यासाठी सोडावी आणि विधान परिषदेची पाचवी जागा न लढवण्याबाबत विचार करू असे भाजपने मविआ शिष्टमंडळाला सांगितले असल्याचे पाटील यांनी सांगितले. त्यामुळे आता शिवसेना आपली दुसरी जागा लढवण्याच्या भूमिकेवर ठाम राहिली तर निवडणूक होणार आहे. याबाबतचे चित्र दुपारी तीन वाजता स्पष्ट होणार आहे.
राष्ट्रवादी काँग्रेसचे नेते छगन भुजबळ, शिवसेनेचे नेते खासदार अनिल देसाई, काँग्रेस नेते सुनिल केदार यांनी विरोधी पक्षनेते देवेंद्र फडणवीस यांची भेट घेतली. यावेळी भाजपचे प्रदेशाध्यक्ष चंद्रकांत पाटील देखील उपस्थित होते. महाविकास आघाडीच्या शिष्टमंडळाने भाजपने तिसरा उमेदवार मागे घ्यावा आणि राज्यसभा निवडणूक बिनविरोध करण्यासाठी प्रयत्न करावेत अशी विनंती केली.
राज्यसभा निवडणुकीतून उमेदवार मागे घेतल्यास विधान परिषदेला एक जागा आणखी देऊ असा प्रस्तावही महाविकास आघाडीने भाजपला दिला. या चर्चेत भाजपने तिसऱ्या जागेसाठीचा दावा कायम ठेवला आहे. भाजपकडे सहा सहयोगी अपक्ष आमदारांसह 30 मते अतिरिक्त असल्याचा मुद्दा मांडण्यात आला. आमचा पक्ष राष्ट्रीय पक्ष असून राज्यसभा आमच्यासाठी महत्त्वाचा आहे. त्यामुळे आम्ही विधान परिषदेच्या निवडणुकीत पाचवी जागा लढवणार नसल्याचे भाजपच्यावतीने या बैठकीत सांगण्यात आले. भाजपच्या केंद्रीय नेतृत्वाने ही प्रदेश भाजपच्या भूमिकेवर समाधान व्यक्त केले असल्याचे चंद्रकांत पाटील यांनी सांगितले.
मविआची भाजपला ऑफर काय?
सूत्रांनी दिलेल्या माहितीनुसार, महाविकास आघाडीने भाजपला ऑफर दिली आहे. भाजपने राज्यसभा निवडणूक बिनविरोध करण्यास मदत केल्यास त्याची परतफेड विधान परिषद निवडणुकीत केली जाईल. त्यानुसार, विधान परिषद निवडणुकीत मविआकडून भाजपला आणखी एक जागा देण्याचा प्रस्ताव आहे. सध्याच्या आकडेवारीनुसार भाजपचे चार उमेदवार विधान परिषेदत विजयी होऊ शकतात. तर, मविआने भाजपला राज्यसभेच्या बदल्यात आणखी एक जागा देण्याची ऑफर दिली आहे.
संख्याबळानुसार काय स्थिती?
विधानसभेतील आमदार या निवडणुकीसाठी मतदान करतात. सध्या असलेल्या विधानसभा आमदारांच्या संख्याबळानुसार, भाजपचे दोन उमेदवार सहज विजयी होऊ शकतात. तर, शिवसेना, राष्ट्रवादी काँग्रेस आणि काँग्रेस यांचा प्रत्येकी एक उमेदवार सहज विजयी होऊ शकतो. शिवसेना आणि राष्ट्रवादी काँग्रेसकडे असलेले अतिरिक्त मते आणि महाविकास आघाडीला पाठिंबा देणाऱ्या अपक्षांच्या बळावर शिवसेना सहावी जागा जिंकण्याच्या प्रयत्नात आहे. तर, भाजपलादेखील सहावी जागा जिंकण्यासाठी 13 च्या आसपास मतांची आवश्यकता आहे. त्यामुळे ही निवडणूक झाल्यास ती अटीतटींची होणार असल्याचे म्हटले जात आहे.
महत्त्वाच्या बातम्या
