मोठी बातमी! सगळ्या बॅग खोलून पाहिल्या, बारामतीत शरद पवारांच्या साहित्याची तपासणी!
शरद पवार बारामतीत हेलिकॉप्टरमधून उतरल्यानंतर त्यांच्या समानाची तपासणी करण्यात आली. याआधी उद्धव ठाकरे यांची बॅग तपासल्यामुळे वेगवेगळ्या राजकीय प्रतिक्रिया उमटल्या होत्या.
पुणे : विधानसभा निवडणुकीचा (Vidhan Sabha Election 2024) प्रचार आता शेवटच्या टप्प्यात आहे. त्यानंतर 20 नोव्हेंबर रोजी मतदान तर 23 नोव्हेंबर रोजी मतमोजणी होईल. दरम्यान, या निवडणुकीत नेतेमंडळींच्या साहित्य तपासणीचा मुद्दा चांगलाच गाजला आहे. माजी मुख्यमंत्री उद्धव ठाकरे यांच्या साहित्याची तपासणी होत असल्याचा व्हिडीओ समोर आल्यानंतर चांगलाच गजहब उडाला होता. त्यानंतर आता खासदार शरद पवार (Sharad Pawar) यांच्याही साहित्याची तपासणी होत असल्याचा व्हिडीओ समोर आला आहे.
नरेंद्र मोदी यांचीही तपासणी होणार का?
राज्यात आचारसंहिता लागू असल्यामुळे निवडणूक अधिकारी नेत्यांच्या साहित्याची तपासणी करतात. काही दिवसांपूर्वी अशीच तपासणी उद्धव ठाकरे यांच्या साहित्याची करण्यात आली होती. एकीकडे तपासणी चालू असताना दुसरीकडे उद्धव ठाकरे यांनी निवडणूक अधिकाऱ्यांना वेगवेगळे प्रश्न विचारत धारेवर धरलं होतं. माझी ज्या पद्धतीने तपासणी केली जात आहे, तशीच तपासणी भाजपाचे नेते अमित शाह आणि पंतप्रधान नरेंद्र मोदी यांची होणार का? असा सवाल त्यांनी केला होता. ठाकरेंच्या साहित्याच्या या तपासणीनंतर राजकीय वर्तुळात वेगवेगळ्या प्रतिक्रिया उमटल्या होत्या.
शरद पवार यांच्याही साहित्याची तपासणी
उद्धव ठाकरेंच्या साहित्याची तपासणी झाल्यानंतर मुख्यमंत्री एकनाथ शिंदे आणि उपमुख्यमंत्री अजित पवार यांच्याही साहित्याची तपासणी केली जात असल्याचे काही व्हिडीओ समोर आले होते. निवडणुकीच्या काळात अधिकाऱ्यांना ही तपासणी करावीच लागते. त्यामुळे सर्वांनी सहकार्य करावे, असे मत महायुतीच्या नेत्यांनी मांडले होते. त्यानंतर आता शरद पवार यांच्याही साहित्याची तपासणी झाल्याचे समोर आले आहे.
बॅग तपासताना शरद पवार बाजुले उभे
मिळालेल्या माहितीनुसार शरद पवार आज पश्चिम महाराष्ट्रात वेगवेगळ्या ठिकाणी सभा घेणार आहेत. या सभांसाठी शरद पवार आज (17 नोव्हेंबर) बारामतीत हेलिकॉप्टरने पोहोचले होते. हेलिपॅडवर उतरताच निवडणूक अधिकाऱ्यांनी शरद पवार यांच्या साहित्याची तपासणी केली. या तपासणीदरम्यान बाजूला शरद पवार हेदेखील उपस्थित होते. दरम्यान, शरद पवार यांनी शेवटच्या टप्प्यात पश्चिम महाराष्ट्रावर लक्ष केंद्रित केलं आहे. त्यामुळे या निवडणुकीत नेमकं काय होणार? याकडे सर्वांचच लक्ष लागलं आहे.
हेही वाचा :
आनंद दिघे माझे गुरुवर्य, केदार दिघे कधीच..., कोपरी पाचपाखाडी मतदारसंघावर बोलताना एकनाथ शिंदे कडाडले!
महत्त्वाच्या बातम्या
