Maharashtra Assembly Election 2024 : मतदानाच्या धामधुमीत कोऱ्याकरकरीत नोटांचं वाटप करणारी गाडी पकडली, चालक गाडी सोडून झाला फरार, नांदगावात पुन्हा खळबळ
Maharashtra Assembly Election 2024 : नांदगाव विधानसभा मतदारसंघात मतदारांना पैसे वाटप करणारी गाडी पकडल्याने मोठी खळबळ उडाली आहे.
नाशिक : महाराष्ट्र विधानसभेच्या (Maharashtra Vidhan Sabha Election 2024) 288 जागांसाठी आज मतदान पार पडत आहे. महायुती (Mahayuti), महाविकास आघाडी (Mahavikas Aghadi) आणि इतर पक्षांच्या एकूण 4136 उमेदवाराचे भवितव्य मतपेटीत बंद होणार आहे. सकाळी सात वाजेपासून मतदानाला सुरुवात झाल्यानंतर नांदगाव विधानसभा मतदारसंघाचे वातावरण चांगलेच तापल्याचे दिसून येत आहे. कारण अपक्ष उमेदवार समीर भुजबळ (Sameer Bhujbal) आणि शिवसेना ठाकरे गटाचे उमेदवार सुहास कांदे (Suhas Kande) यांच्या गटात जोरदार राडा झाल्याचे पाहायला मिळाले. या पाठोपाठ आता साकोऱ्यात मतदारांना पैसे वाटप करणारी गाडी पकडल्याने मोठी खळबळ उडाली आहे.
नेमकं काय घडलं?
नांदगाव मतदारसंघातील साकोऱ्यात मतदारांना पैसे वाटप करणारी गाडी आल्याची माहिती अपक्ष उमेदवार डॉ. रोहन बोरसे यांच्या समर्थकांना मिळाली. गाडी अडवल्यानंतर ड्रायव्हर गाडी सोडून फरार झाला. यानंतर कार्यकर्त्यांनी हातात नोटा दाखवल्या. एका उत्साही कार्यकर्त्याने गाडीच्या टपावर उभं राहत नोटा फाडल्या. आता घटनास्थळी पोलीस दाखल झाले आहेत. गाडी कोणाची व पैसे कोणाचे आहेत? याबाबत पोलिसांकडून चौकशी केली जात आहे. आता हे पैसे नेमके कुणाचे निघणार? हे पाहणे महत्त्वाचे ठरणार आहे.
नांदगावात भुजबळ-कांदेंमध्ये राडा
सुहास कांदेंनी आणलेल्या मतदारांची बस समीर भुजबळांनी अडवली. यानंतर समीर भुजबळ आणि सुहास कांदे यांचे कार्यकर्ते आमनेसामने आले. यानंतर मोठा राडा झाला. नांदगाव-मनमाड रस्त्यावर हा प्रकार घडला. कुठल्याही परिस्थितीत मतदार जावू देणार नाही, असा पवित्रा भुजबळांनी घेतला होता. यानंतर समीर भुजबळ आणि सुहास कांदे हे दोघेही आमनेसामने आल्याचे दिसून आले. आज तुझा मर्डर फिक्स आहे, असे म्हणत सुहास कांदेंनी समीर भुजबळांना थेट मारून टाकण्याची धमकी दिली. पोलिसांकडून दोन्ही गटाच्या कार्यकर्त्यांची समजूत काढण्याचा प्रयत्न करण्यात आला. काही वेळाने निवडणूक आयोगाने पथक या ठिकाणी दाखल झाले. त्यांनी बसमध्ये थांबविलेल्या मतदारांची चौकशी व बॅग तपासणी केली. निवडणूक आयोगाच्या बसमधील चौकशीत मतदार हे स्थानिक ढेकू गावचे असल्याचे सिध्द झाले. आता या प्रकरणाची चौकशी करून कारवाई करण्यात येत आहे. तर दुसरीकडे आम्हाला वेठीस धरले जात असल्याचा मतदारांनी आरोप केला. अडविलेल्या मतदारांमध्ये एक गरोदर महिला देखील असल्याचे समजते. निवडणूक आयोगाने चौकशी केल्यानंतर मतदारांना मतदान केंद्राकडे रवाना करण्यात आले.
आणखी वाचा
महत्त्वाच्या बातम्या
