विधानसभेच्या निकालापूर्वी मुंबईतून मोठी अपडेट, काँग्रेसच्या नसीम खान यांच्या कार्यालयाबाहेर संशयास्पद हालचाली, मुंबई पोलीस अलर्ट मोडवर
Naseem Khan : काँग्रेस नेते नसीम खान यांच्या कार्यालयाबाहेर संशयास्पद हालचाली आढळल्याने मुंबई पोलीस अलर्ट मोडवर आले आहे.
मुंबई : महाराष्ट्र विधानसभा निवडणुकीसाठी (Vidhan Sabha Election 2024 Result) राज्यात 20 नोव्हेंबर 2024 मतदानाची प्रक्रिया पार पडली. त्यानंतर वेगवेगळ्या संस्थांचे एक्झिट पोल (Exit Poll 2024) आले आहेत. येत्या 23 नोव्हेंबर रोजी मतमोजणी होणार आहे. त्यातच काँग्रेस (Congress) नेते नसीम खान (Naseem Khan)यांच्या कार्यालयाबाहेर संशयास्पद हालचाली आढळल्या आहेत. त्यामुळे मुंबई पोलीस अलर्ट मोडवर आले असून नसीम खान यांच्या सुरक्षेत वाढ करण्यात आली आहे.
काही दिवसांपूर्वीच मुंबईत बाबा सिद्दिकी यांची हत्या करण्यात आली होती. यानंतर आता नसीम खान यांच्या देखील जीवाला देखील धोका असल्याची शक्यता वर्तवली जात आहे. त्यामुळे मुंबई पोलिसांनी त्यांच्या सुरक्षेत मोठ्या प्रमाणात वाढ केली आहे. बाबा सिद्दिकी प्रकरणानंतर मुंबई पोलीस प्रशासनाकडून विशेष खबरदारी घेतली जात आहे.
नसीम खान यांच्या सुरक्षेत वाढ
नसीम खान यांच्या कार्यालयात दोन संशयित आढळून आले होते. या दोन संशयितांच्या मोबाइलमध्ये नसीम खान यांच्याशी संबधित काही आक्षेपार्ह चॅटही आढळले होते. या घटनेची गंभीर दखल घेत मुंबई पोलीस दलातील वरिष्ठ पोलिस अधिकार्यांनी नसीम खान यांच्या घराबाहेर आणि कार्यालयाजवळ स्थानिक पोलीस ठाण्यांना बंदोबस्त ठेवण्याच्या सूचना दिल्या आहेत. तसेच नसीम खान यांच्या सुरक्षेत देखील वाढ करण्यात आली आहे.
चिपळूणमध्ये स्ट्राँग रुमच्या परिसरात संशयास्पद हालचाली
दरम्यान, विधानसभा निवडणुकीची 23 नोव्हेंबर रोजी मतमोजणी होणार आहे. त्याआधी मतपेट्या सुरक्षित ठिकाणी ठेवण्यात आल्या आहेत. मतपेट्यांना कुठलीही हानी पोहोचू नये म्हणून 24 तास सीसीटीव्हीची सुरक्षा पुरवण्यात आली आहे. चिपळूणमध्ये मात्र स्ट्राँग रुमच्या परिसरात मोठी घटना घडल्याचे दिसून आले. स्ट्राँग रुमच्या परिसरात फिरणाऱ्या संशियतांना पोलिसांनी ताब्यात घेतले आहे. चिपळूणमध्ये स्ट्राँग रूमच्या परिसरात काही लोक फिरत होते. ही बाब समोर आल्यानंतर अजित पवार गटाचे कार्यकर्ते आक्रमक झाले होते. त्यानंतर अजित पवार गटाचे कार्यकर्ते हजारोंच्या संख्येने चिपळूण पोलीस स्थानकाच्या बाहेर एकत्र जमले होते. पोलिसांनी संशयितांना ताब्यात घेतले आहे. पोलीस या प्रकरणाचा तपास करत आहेत.
नागपूरात मतमोजणी केंद्रांवर चोख सुरक्षा व्यवस्था
दरम्यान, नागपूरात मतमोजणी केंद्रांवर चोख सुरक्षा व्यवस्था करण्यात आली आहे. मतमोजणी केंद्रावर तीन लेअर सुरक्षा तैनात करण्यात आली आहे. स्ट्राँग रुमच्या सुरक्षेसाठी सीआरपीएफ, त्यानंतर राज्य राखीव पोलीस, मध्य प्रदेश पोलीस आणि तिसऱ्या लेअरला महाराष्ट्र पोलीस तैनात आहेत. तसेच संपूर्ण परिसराला सीसीटीव्हीचा 24 तास पहारा आहे. नागपूर दक्षिण पश्चिम मतदारसंघाचे ईव्हीएम असलेल्या मतमोजणी केंद्रावर सुरक्षा अलर्टवर आहे. सकाळी 8 वाजेपासून मतमोजणीला सुरुवात होणार आहे.
आणखी वाचा
महत्त्वाच्या बातम्या
