एक्स्प्लोर

Lok Sabha Election Result 2024: भाजप प्रदेशाध्यक्षाच्याच बालेकिल्ल्यात महायुतीला फटका; शहर अध्यक्षांना पदावरून हटवलं

Maharashtra Politics : रामटेक मतदारसंघात कामठी भाजप शहर अध्यक्षांना पदावरून हटवल्या गेले आहे. रामटेकच्या पराभवानंतर भाजपकडून ही कारवाई करण्यात आली आहे.

By : रजत वशिष्ट, एबीपी माझा, नागपूर | Edited By: Vishal Deokar | Updated at : 06 Jun 2024 10:53 AM (IST)

Lok Sabha Election Result 2024

Maharashtra Politics : देशातील सार्वत्रिक लोकसभा निवडणुकीच्या निकालांनी देश आणि राज्य पातळीवर भाजपला चांगलाच धक्का दिला आहे. केंद्रात आणि राज्यात भाजप्रणित (BJP) आघाड्यांची मोठी पिछेहाट झाल्याचे चित्र आहे. राज्यातील एकूण 48 लोकसभा मतदारसंघांपैकी भाजपप्रणित महायुतीला (Mahayuti) अवघ्या 17 जागांवर विजय मिळाला आहे. तर महाविकास आघाडीची (MVA Alliance) 30 जागांवर सरशी झाली आहे. या निकालांनी महायुती आणि भाजपचे नेते प्रचंड अस्वस्थ झाले आहेत. कारण लोकसभेचा हाच ट्रेंड आगामी विधानसभा निवडणुकीत (Maharashtra Assembly Election 2024) कायम राहिला तर महायुतीची सत्ता जाणे अटळ आहे.

दुसरीकडे विदर्भातील भाजपची बऱ्यापैकी पकड असलेल्या मतदारसंघातही महायुतीचा दारुण पराभव झाला आहे. विशेष म्हणजे, विदर्भात काँग्रेसने (Congress) घरवापसी करत दहा पैकी 7 ठिकाणी महाविकास आघाडीला यश मिळवून दिले आहे. तर भाजप 2 आणि शिंदेच्या शिवसेनेला अवघ्या 1 ठिकाणी असे महायुतीला यश आले आहे. त्यामुळे विदर्भात महाविकास आघाडीने चांगलीच मुसंडी मारली असून काँग्रेस विदर्भातही सर्वत मोठा पक्ष ठरला आहे. अशातच रामटेक मतदारसंघात (Ramtek Constituency Election) कामठी भाजप शहर अध्यक्षांना पदावरून हटवल्या गेले आहे. रामटेकच्या पराभवानंतर भाजपकडून ही कारवाई करण्यात आली आहे.

भाजप प्रदेशाध्यक्षाच्याच बालेकिल्ल्यात महायुतीला फटका

रामटेक लोकसभा मतदारसंघात महायुतीचे उमेदवार राजू पारवे यांचा पराभव झाल्याने भाजपची नामुष्की झालीय. त्यामुळे पक्षाने पदाधिकाऱ्यावर कारवाई सुरू केली आहे. कामटी शहर मंडळाध्यक्ष चंद्रशेखर तुप्पट यांना बुधवारी त्यांच्या पदावरून हटवण्यात आले आहे. भाजपचे जिल्हाध्यक्ष सुधाकर कोहळे यांनी ही कारवाई केली आहे. रामटेक लोकसभा मतदारसंघातील सर्वच मतदारसंघात काँग्रेसच्या उमेदवारांनी आघाडी घेतलीय. रामटेक लोकसभा मतदारसंघातील कामठी मतदारसंघ हा चंद्रशेखर बावनकुळे यांचा मतदारसंघ आहे. भाजप प्रदेश अध्यक्षाच्या मतदारसंघातही महायुतीला फटका बसल्याने भाजपने ही बाब गांभीर्याने घेतली आहे. परिणामी ही कारवाईचा बडगा उगारण्यात आला आहे.

फडणवीस आज दिल्लीला जाणार

उपमुख्यमंत्री देवेंद्र फडणवीस आज दिल्लीला जाण्याची शक्यता आहे. आज पंतप्रधान नरेंद्र मोदी व गृहमंत्री अमित शहा यांची भेट घेण्याची शक्यता आहे. राज्यातील पराभवाची जबाबदारी घेत देवेंद्र फडणवीस यांनी उपमुख्यमंत्रीपद सोडण्याचा निर्णय घेतलाय. याबाबत ते चर्चा करण्याची शक्यता आहे. केंद्रीय नेतृत्व देवेंद्र फडणवीस यांची विनंती मान्य करणार का? याबाबत राजकीय चर्चा सुरु आहे.