BJP : एकीकडे पश्चिम बंगालमध्ये भाजपची सत्ता येणार,तिकडे केरळमध्ये भाजपनं खातं उघडलं, डाव्या पक्षांच्या बालेकिल्ल्यात विजय मिळवला
BJP : केरळ विधानसभा निवडणुकीत भाजपचे उमेदवार बीबी गोपकुमार यांनी डाव्या पक्षांच्या उमेदवारांचा पराभव केला आहे. बीबी गोपकुमार चार हजार मतांनी विजयी झाले.
Kerala Election Result 2026 तिरुअनंतपुरम : केरळमध्ये गेल्या दहा वर्षांपासून सत्तेत असलेल्या डाव्या पक्षांचा पराभव झाला आहे. केरळ विधानसभा निवडणुकीत काँग्रेसप्रणित यूडीएफ सत्ता स्थापन करण्याच्या दिशेनं वाटचाल करत आहे. डाव्या पक्षांच्या एलडीएफचा यावेळी पराभव झाला आहे. केरळमध्ये भाजपनं (BJP) पहिला विजय मिळवला आहे. तर, आणखी दोन ठिकाणी भाजपचे उमेदवार आघाडीवर आहेत. डाव्या पक्षांचा बालेकिल्ला असलेल्या चथन्नूर मतदारसंघात भाजपनं विजय मिळवला आहे. 2021 मध्ये चथन्नूर विधानसभा मतदारसंघात डाव्या पक्षानं 17 हजार मतांनी विजय मिळवला होता. केजागारळमध्ये काँग्रेसच्या यूडीएफला 102 जागांवर आघाडी मिळाली आहे. तर, डाव्या पक्षांच्या एलडीएफला 35 जागांवर आघाडी मिळाली आहे. भाजपनं एका जागेवर विजय मिळवलाय तर दोन ठिकाणी ते आघाडीवर आहेत.
भाजपचे उमेदवार बीबी गोपकुमार यांनी डाव्या पक्षांचे उमेदवार अॅड. आर. राजेंद्रन यांचा 4398 मतांनी पराभव केला आहे. याशिवाय भाजपचे उमेदवार नेमोम आणि कझकोट्टम विधानसभा मतदारसंघातून आघाडीवर आहेत.
भाजपच्या बीबी गोपकुमार यांना चथनूर विधानसभा मतदारसंघात 51923 मतं मिळाली आहेत. त्यांच्या विरोधात लढणाऱ्या भाकपच्या आर राजेंद्रन यांना 47525 मतं मिळाली आहेत.तिसऱ्या क्रमांकावर काँग्रेसचे सूरज रवी आहेत, त्यांना 35276 मतं मिळाली आहेत. या मतदारसंघात आम आदमी पार्टीला 613 मतं मिळाली आहेत.
सायंकाळी पाचपर्यंतच्या आकडेवारीनुसार भाजप आणखी दोन जागांवर आघाडी मिळवत आहे. गोपकुमार यांनी विजय मिळवला आहे. तर नेमम विधानसभा मतदारसंघात राजीव चंद्रशेखर आघाडीवर आहेत. त्यांना जवळपास तीन हजार मतांची आघाडी आहे.
केरळमध्ये सत्तांतर
केरळमध्ये 9 एप्रिलला मतदान झालं होतं. आज केरळ विधानसभेचा निकाल जाहीर झाला. गेल्या दोन निवडणुकांमध्ये केरळमध्ये एलडीएफचा विजय झाला होता. मात्र, यावेळी एलडीएफचा पराभव झाला आहे. काँग्रेस प्रणितयूडीएफ 100 जागांच्या जवळ पोहोचली आहे. तर एलडीएफ 30 जागांपर्यंत पोहोचली आहे.
गेल्या दहा वर्षांपासून केरळमध्ये डावे पक्ष सत्तेत होते. केरळमध्ये दर पाच वर्षांनी सरकार बदललं जातं. मात्र, 2021 मध्ये झालेल्या विधानसभा निवडणुकीत पिनराई विजयन यांच्या नेतृत्त्वात एलडीएफनं विजय मिळवला होता. यावेळी मात्र काँग्रेस प्रणित यूडीएफनं सत्ता मिळवली आहे. केरळमधील संभाव्य निवडणूक निकालांचा अंदाज घेत मुख्यमंत्री पिनराई विजयन यांनी त्यांच्या सोशल मीडिया अकाऊंटस मधून मुख्यमंत्री पदाचा उल्लेख काढला होता. आता केरळमध्ये सत्ता बदल झाला असून काँग्रेसप्रणित यूडीएफ सत्तेत येईल. भाजपनं देखील केरळमध्ये खातं उघडलं आहे.
महत्त्वाच्या बातम्या
