Devendra Fadnavis: उद्धव ठाकरेंसाठी दरवाजे उघडणार का?; देवेंद्र फडणवीस म्हणाले, 23 तारखेची वाट बघा...
Devendra Fadnavis: मुख्यमंत्रिपदाबाबत आम्ही ठरवलं आहे. जो काही निर्णय होईल तो निकालानंतर होईल, असंही देवेंद्र फडणवीसांनी स्पष्ट केलं आहे.
Devendra Fadnavis Maharashtra Vidhan Sabha Election 2024: सध्या राज्यात विधानसभा निवडणुकीची रणधुमाळी सुरु आहे. महायुती आणि महाविकास आघाडीने जोरदार तयारी सुरु केली आहे. याचदरम्यान उपमुख्यमंत्री देवेंद्र फडणवीस (Devendra Fadnavis) आज एबीपी माझाच्या 'माझा महाराष्ट्र, माझं व्हिजन' या कार्यक्रमाला उपस्थित होते. यावेळी देवेंद्र फडणवीसांनी विविध मुद्द्यांवर भाष्य केलं.
विधानसभा निवडणुकीच्या निकालानंतर जागा कमी पडल्या तर उद्धव ठाकरे (Uddhav Thackeray) की शरद पवार (Sharad Pawar), कोणासाठी दरवाजे उघडणार?, असा प्रश्न देवेंद्र फडणवीसांना विचारण्यात आला. यावर कुणाची गरज लागणार नाही, आम्ही तिघेच पुरेसे आहोत, तशी परिस्थितीची येणारच नाही...23 तारखेची वाट बघा, असं देवेंद्र फडणवीसांनी सांगितले. तसेच मुख्यमंत्रिपदाचा फॉर्म्युला आम्ही निकालानंतर ठरवू. सरकार म्हणून आम्ही निवडणुकीला सामोरे जात आहोत. मुख्यमंत्री एकनाथ शिंदे हेच आमचा चेहरा आहेत, असं देवेंद्र फडणवीसांनी यावेळी सांगितले. मुख्यमंत्रिपदाबाबत आम्ही ठरवलं आहे. जो काही निर्णय होईल तो निकालानंतर होईल. रोटेशनल मुख्यमंत्री अशी कोणतीही अट एकनाथ शिंदे यांनी ठेवली नाहीय, असंही देवेंद्र फडणवीस यांनी स्पष्ट केलं.
नवाब मलिकांबाबत आम्ही स्पष्टपणे सांगितलं होतं- देवेंद्र फडणवीस
महायुतीमध्ये सहभागी असलेले उपमुख्यमंत्री अजित पवार यांनी नवाब मलिक यांना राष्ट्रवादी काँग्रेसचा एबी फॉर्म दिल्यानं विरोधकांकडून भाजपला घेरण्याचा प्रयत्न केला जात आहे. यावर देखील देवेंद्र फडणवीस यांनी आपली भूमिका स्पष्ट केली. आम्ही नवाब मलिकांचा प्रचार करणार नाही. नवाब मलिक यांना तिकीट देऊ नका, हे आम्ही अजित पवारांना सांगितलं होतं. मात्र अजित पवारांनी त्यांना एबी फॉर्म दिला. अजित पवारांनी असं का केलं, हे तेच सांगू शकतात, त्यांना विचारा, असं देवेंद्र फडणवीस म्हणाले.
बाळासाहेबांनी दिलेलं हिंदुत्व उद्धव ठाकरे यांनी कधीच हरवलं- देवेंद्र फडणवीस
आमच्या हिंदुत्वाबद्दल बोलायची गरज नाही. स्वर्गीय बाळासाहेबांनी दिलेलं हिंदुत्व उद्धव ठाकरे यांनी कधीच हरवलं. आदित्य ना हिंदुत्व शिकवण्याची गरज नाही बरोबर आहे, कारण त्यांना शिकवण्यासाठी अबू आझमी आहेत. बाळासाहेबांना जनाब म्हटलं जातं, जे हिंदुत्व बाळासाहेबांचे होते, शिवसेनेचे होते ते हिंदुत्व उद्धव ठाकरेंनी संपवलं, अशी टीका देवेंद्र फडणवीसांनी केली. तसेच ना मला ठाकरे संपवू शकतात, ना मी त्यांना संपवू शकत. कोणाला संपवायचं हे जनता ठरवते, असंही देवेंद्र फडणवीसांनी सांगितले.
आम्हाला फेक नेरेटीव्हने हरवलं-
लोकसभेत तीन पक्षांनी आम्हाला हरवलं नाही. आम्हाला फेक नेरेटीव्हने हरवलं. तीन पक्ष आम्हाला हरवू शकलेच नसते. फेक नेरेटीव्ह कंट्रोल करण्यात आम्ही कमी पडलो. त्याचं आकलन नीट करु शकलो नाही. त्यामुळे या लोकसभा निवडणुकीतून आम्हाला चांगला अनुभव मिळाला, असं देवेंद्र फडणवीस म्हणाले.
मला कितीही शिव्या दिल्या तरी लोकांना फडणवीस काय आहे हे माहितीये, Video:
संबंधित बातमी:
महत्त्वाच्या बातम्या
