Chandrapur Deputy Mayor Election 2026: चंद्रपूर उपमहापौरपदाचा ईश्वर चिठ्ठीने फैसला, दोन्ही उमेदवारांना 32-32 मतं; ठाकरेंच्या शिवसेनेचे प्रशांत दानव विजयी, नेमकं काय घडलं?
Chandrapur Deputy Mayor Election 2026: उपमहापौर पदासाठी झालेल्या मतदानात पप्पू देशमुख आणि प्रशांत दानव यांना समसमान 32-32 मते मिळाली होती. अखेर ईश्वर चिठ्ठीने उपमहापौर पदाचा फैसला करण्यात आला.
Chandrapur Deputy Mayor Election 2026: चंद्रपूर महानगरपालिकेतील सत्तानाट्याचा मंगळवारी नाट्यमय शेवट झाला असतानाच, उपमहापौर पदाच्या निवडणुकीतही मोठा थरार पाहायला मिळाला. उपमहापौर पदासाठी झालेल्या मतदानात काँग्रेस समर्थित जनविकास सेनेचे उमेदवार पप्पू देशमुख आणि भाजप समर्थित शिवसेना ठाकरे गटाचे उमेदवार प्रशांत दानव (Prashant Danav) यांना समसमान 32-32 मते मिळाल्याने निवडणूक अडचणीत सापडली. अखेर ईश्वर चिठ्ठीने उपमहापौर पदाचा फैसला करण्यात आला.
उपमहापौर निवडणुकीपूर्वी एमआयएमचा एक नगरसेवक काँग्रेस समर्थित उमेदवार पप्पू देशमुख यांना पाठिंबा देण्याची शक्यता वर्तवली जात होती. त्यानुसार मतदान झाल्यास दोन्ही उमेदवारांना समान मते मिळण्याची शक्यता होती आणि प्रत्यक्षात तसेच घडले. दोन्ही बाजूंना प्रत्येकी 32 मते मिळाल्याने सभागृहात काही काळ गोंधळाचे वातावरण निर्माण झाले.
Chandrapur Deputy Mayor Election 2026: ठाकरेंच्या शिवसेनेचे प्रशांत दानव विजयी
नियमांनुसार मतांची बरोबरी झाल्यास ईश्वर चिठ्ठीद्वारे निर्णय घेण्यात येतो. त्यामुळे जिल्हाधिकारी तथा पिठासीन अधिकारी यांच्या उपस्थितीत ईश्वर चिठ्ठी काढण्यात आली. या चिठ्ठीत उद्धव ठाकरे गटाचे उमेदवार प्रशांत दानव यांचे नाव निघाल्याने ते चंद्रपूर महानगरपालिकेचे नवे उपमहापौर म्हणून विराजमान झाले.
Chandrapur Mayor Election 2026: महापौरपदी भाजपच्या संगीता खांडेकर
दरम्यान, महापौर पदाच्या निवडणुकीत भाजपने उद्धव ठाकरे गटाला सोबत घेत सत्ता स्थापन करत राजकीय चमत्कार घडवला. भाजपच्या संगीता खांडेकर यांनी अवघ्या एका मताच्या फरकाने महापौरपदाची निवडणूक जिंकली. त्यांना 32 मते मिळाली, तर काँग्रेस उमेदवाराला 31 मते मिळाली. वंचित बहुजन आघाडीचे दोन नगरसेवक गैरहजर राहिल्याने बहुमताचा आकडा 33 वर आला होता. एमआयएमने तटस्थ भूमिका घेतल्यामुळे निकालावर निर्णायक परिणाम झाला.
Chandrapur Mayor Election 2026: चंद्रपूरचे सत्तानाट्य राज्यभर चर्चेचा विषय
या सत्तास्थापनेत उद्धव ठाकरे गटाची भूमिका निर्णायक ठरली. भाजपकडे सुरुवातीला 24 नगरसेवकांचे संख्याबळ होते. यामध्ये भाजपचे 23 आणि शिवसेना शिंदे गटाचा एक नगरसेवक यांचा समावेश होता. त्यानंतर ठाकरे गटाचे जिल्हाध्यक्ष संदीप गिऱ्हे यांच्या नेतृत्वाखाली सहा नगरसेवक आणि दोन अपक्ष नगरसेवक भाजपसोबत आल्याने भाजपचे संख्याबळ 32 वर पोहोचले. एकूणच, चंद्रपूर महानगरपालिकेतील महापौर आणि उपमहापौर या दोन्ही पदांच्या निवडणुकांनी राजकीय थरार शिगेला पोहोचवला. एका बाजूला एका मताने महापौरपदाचा निर्णय, तर दुसऱ्या बाजूला चिठ्ठीद्वारे उपमहापौरपदाचा फैसला झाल्याने चंद्रपूरचे सत्तानाट्य राज्यभर चर्चेचा विषय ठरले आहे.
Chandrapur Mahanagarpalika Election 2026: चंद्रपूर महानगरपालिकेतील संख्याबळ
एकूण जागा 66
काँग्रेस 27
काँग्रेसशी निवडणूक पूर्व आघाडी असलेली जनविकास सेना 3
भाजप 23
शिंदेंसेना 1
उबाठा शिवसेना 6
वंचित 2
बसपा 1
अपक्ष (काँग्रेस बंडखोर) 2
एमआयएम 1
आणखी वाचा
महत्त्वाच्या बातम्या
