CBSE :  सीबीएसईचा त्रिभाषा सूत्रासंदर्भात मोठा निर्णय, नववीपासून विद्यार्थ्यांना तीन भाषा शिकाव्या लागणार, दोन भारतीय भाषा अनिवार्य

CBSE : केंद्रीय माध्यमिक शिक्षण मंडळ म्हणजेच सीबीएसईनं नववीपासून तीन भाषा अनिवार्य केल्या आहेत. याचं अधिकृत नोटिफिकेशन जारी करण्यात आलं आहे. 

सीबीएसईचा मोठा निर्णय

Source : एबीपी माझा ग्राफिक्स टीम

नवी दिल्ली : केंद्रीय माध्यमिक शिक्षण मंडळानं म्हणजेच सीबीएसईनं इयत्ता नववीपासून तीन भाषांचं शिक्षण अनिवार्य केलं आहे. सीबीएसईनं 16 मे 2016 ला  यासंदर्भातील अधिकृत नोटिफिकेशन जारी केलं आहे. बोर्डाच्या अधिकृत नोटिफिकेशननुसार 1 जुलै 2026 पासून सुरु होणाऱ्या नववीच्या वर्गापासून तीन भाषांचं अध्ययन अनिवार्य करण्यात आलं आहे. या तीन भाषांमधील दोन भाषा भारतीय असाव्यात तर एक भाषा विदेशी असावी. मात्र, दहावीच्या बोर्ड परीक्षेत तिसऱ्या पेपरमधून सूट देण्यात आली आहे. तिसऱ्या भाषेचं मूल्यांकन फक्त शालेय पातळीवर मर्यादित असेल. 

सीबीएसईच्या परिपत्रकानुसार नववी आणि दहावीच्या विद्यार्ध्यांना तीन भाषा शिकवण्यासंदर्भात सूचना देण्यात आल्या आहेत. बोर्डानं स्पष्ट केलं की भाषा शिक्षण एनएसीईआरटीच्या नव्या अभ्यासक्रमानुसार केलं जाईल. बोर्डानं म्हटलं की, 1 जुलै 2026 पासून इयत्ता नववीसाठी तीन भाषाचं अध्ययन आवश्यक असेल. यापैकी दोन भाषा भारतीय असाव्यात. तर, एक भाषा विदेशी असावी. बोर्डानं वेगवेगळ्या भाषांची निवड करण्यासाठी R1, R2 आणि R3 चे पर्याय देण्यात आले आहेत. 

सीबीएसई बोर्डानं म्हटलं की मध्यम स्तरावर आणि  सेकेंडरी स्टेजवर अभ्यासासाठी रीडिंग कॉम्प्रिहेंशन, ओरल कम्युनिकेशन, व्याकरण आणि लेखन कौशल्य यामध्ये जवळपास 75 ते 80 टक्के ओवरलॅप आहे. जोपर्यंत R3 ची पुस्तकं येत नाहीत तोपर्यंत नववीचे विद्यार्थी 2026-27 च्या शैक्षणिक वर्षासाठी निवडलेल्या भाषेचं सहावीच्या वर्गाच्या R3 या पुस्तकाचा अभ्यास करतील.  शाळांना या पुस्तकांसोबत स्थानिक किंवा राज्यातील साहित्य देखील देण्यास सांगण्यात आलं आहे, ज्यात कविता, छोट्या गोष्टींचा समावेश असेल. 

सीबीएसईनं परिपत्रकात म्हटलं की अभ्यासावर लक्ष ठेवावं आणि विद्यार्थ्यांनी कोणत्याही प्रकारचा दबाव घेऊ नये. दहावीच्या विद्यार्थ्यांसाठी R3 मधील भाषेसाठी परीक्षा द्यावी लागणार नाही. म्हणजेच विद्यार्थ्यांना तिसऱ्या भाषेची बोर्ड परीक्षा द्यावी लागणार नाही. मात्र, शालेय मूल्यांकनातील गुण गुणपत्रकात दिसणार असल्यानं विद्यार्थ्यांनी दक्षता घेणं आवश्यक आहे.

दरम्यान, नव्या राष्ट्रीय शैक्षणिक धोरणानुसार तीन भाषा शिक्षण धोरण निश्चित करण्यात आलं आहे. त्यानुसार सीबीएसईकडून आता इयत्ता नववीपासून तीन भाषांचं अध्ययन जुलै 2026 पासून लागू करण्यात आलं आहे.