Rupali Thombare: मी नाही त्यातली अन्..., रुपाली चाकणकरांनीच अशोक खरातचं प्रकरण दाबलं; भोंदूबाबा राज्य महिला आयोग चालवत होता, रूपाली ठोंबरेंचा चाकणकरांवर घणाघात
Rupali Thombare: चाकणकर अतिशय निच आहेत आणि त्यांना या प्रकरणाची सावली माहिती होती, त्यांचं म्हणजे मी नाही त्यातली आणि कडी लावा आतली असं वागणं असा घणाघात रूपाली ठोंबरे यांनी केला आहे.
पुणे : नाशिकमध्ये भोंदूबाबा अशोक खरात (Ashok Kharat) प्रकरणात अडचणीत सापडलेल्या रूपाली चाकणकर यांच्यावरती विरोधकांसह त्यांच्याच पक्षाच्या नेत्या रूपाली ठोंबरेंनी हल्लाबोल केला आहे. रूपाली ठोंबरे (Rupali Thombre) यांनी चाकणकरांवरती गंभीर आरोप केला आहे. रूपाली पाटील चाकणकर या महाराष्ट्रातील सर्वात मोठ्या सेक्स रॅकेटच्या सूत्राधार असल्याचा आरोप ठोंबरे यांनी केला आहे. याप्रकरणात रूपाली चाकणकर (Rupali Chakankar) यांना आरोपी करावे, असे पत्र मुख्यमंत्री देवेंद्र फडणवीस यांना पाठवले आहे.
राज्य महिला आयोगाच्या माजी अध्यक्षा नाशिक मधील सेक्स रॅकेट प्रकरणात रूपाली चाकणकर या मुख्य आरोपी आहेत. कायद्याला धरून करण्यात आलेली ही मागणी आहे आणि या प्रकरणात कलम १२० अंतर्गत त्या मुख्य आरोपी होतात असं सांगत ठोंबरे यांनी थेट मुख्यमंत्री देवेंद्र फडणवीस यांना पत्र लिहिलं आहे. रुपाली चाकणकर अतिशय निच आहेत आणि त्यांना या प्रकरणाची सावली माहिती होती, त्यांचं म्हणजे मी नाही त्यातली आणि कडी लावा आतली असं वागणं असा घणाघात रूपाली ठोंबरे यांनी केला आहे. या प्रकरणात पुण्यातील एका महिला समाजसेविका सुद्धा आहेत त्यांच्यासोबत त्यांची तडजोड झाली असा सुद्धा आरोप ठोंबरे यांनी केला आहे.
रूपाली ठोंबरे यांनी मुख्यमंत्री एकनाथ शिंदे आणि गृहमंत्री देवेंद्र फडणवीस यांना पत्र लिहून रुपाली चाकणकर यांना या संपूर्ण 'सेक्स रॅकेट'च्या मुख्य सूत्रधार ठरवून कलम १२० (ब) अंतर्गत तातडीने अटक करण्याची मागणी केली आहे. खरातच्या अघोरी कृत्यांमध्ये आणि या रॅकेटमध्ये चाकणकर यांच्या सहभागाशिवाय हे सर्व घडणे अशक्य आहे, असा दावा त्यांनी केला. खरातवर गेल्या वर्षभरापासून कारवाई होऊ नये म्हणून चाकणकर यांनी आपल्या संवैधानिक पदाचा (महिला आयोग अध्यक्ष) गैरवापर करून त्याला राजकीय पाठबळ दिले आणि गुन्हे दाबण्याचा प्रयत्न केला. खरातला ब्लॅकमेल करणाऱ्या दोन मुलांनी जेव्हा एका सामाजिक कार्यकर्त्या महिलेला भेटून पुरावे दिले, तेव्हा त्या महिलेने खरातशी (गुरुमाऊली) आर्थिक तडजोड करून हे प्रकरण दुसऱ्यांदा दाबले. या सामाजिक कार्यकर्त्या महिलेचे नाव लवकरच समोर येईल, असेही त्यांनी सांगितले.
खरातच्या मोबाईलमधील आक्षेपार्ह व्हिडिओंचा आकडा आता २५० च्या वर गेला आहे. यात गोरगरिबांपासून हाय-प्रोफाईल महिलांपर्यंत अनेकांचा समावेश आहे.अनेक महिला प्रतिष्ठेपोटी समोर यायला घाबरत आहेत, कारण त्यांना या भोंदू बाबाने अत्यंत अघोरी आणि निंदनीय प्रकार (उदा. मूत्र पाजणे) करायला लावले आहेत. रुपाली चाकणकर यांनी राजीनामा दिला असला, तरी तो आनंदाने दिलेला नाही. मुख्यमंत्री एकनाथ शिंदे यांनी त्यांना "आधी राजीनामा द्या आणि मगच बोला, अन्यथा मी पत्र काढून हकालपट्टी करेन" अशा कडक भाषेत तंबी दिली होती, असा दावा ठोंबरे यांनी केला. राजीनामा देताना चाकणकर हसत होत्या, यावरून ठोंबरे यांनी टीका केली की, "ज्या पदावर बसून महिलांचे रक्षण करायचे होते, त्या पदाचा राजीनामा देताना किमान लाज वाटायला हवी होती" असंही त्यांनी म्हटलं आहे.
मुख्यमंत्री एकनाथ शिंदे किंवा राधाकृष्ण विखे पाटील यांचे खरातसोबतचे फोटो हे केवळ शिर्डीत दर्शनाला गेले असतानाचे आहेत. कार्यकर्त्यांनी सांगितले म्हणून ते तिथे गेले होते, त्यांचा या अघोरी कृत्यांशी संबंध नाही. मात्र, रुपाली चाकणकर यांना खरातचे सर्व कारनामे माहित होते आणि त्यांनीच त्याला राजकीय वलय मिळवून दिले. खरातला ३९ लाख लिटर पाणी आरक्षित करून देणे किंवा सरकारी सोयीसुविधा मिळवून देण्यासाठी कोणी प्रेशर टाकले, याचा सखोल तपास व्हावा अशी मागणी त्यांनी केली. राजकारण्यांनी कोणत्याही भोंदू बाबाच्या नादाला लागू नये. "तुम्हाला मंत्रीपद देतो किंवा अप्सरा देतो" असे सांगून वश करणाऱ्या लोकांपासून आणि अशा महिलांपासून लांब राहावे, असा सल्ला त्यांनी दिला. जर पोलिसांनी चाकणकर यांच्यावर ठोस कारवाई केली नाही, तर आपण उच्च न्यायालयात याचिका दाखल करणार असल्याचेही त्यांनी स्पष्ट केले.
रूपाली ठोंबरे पाटील यांनी या प्रकरणाचा छडा लावण्यासाठी एसआयटी (SIT) प्रमुख तेजस्वी सातपुते यांच्या तपासावर विश्वास व्यक्त केला असून, शेवटच्या गुन्हेगाराला शिक्षा होईपर्यंत लढा सुरू ठेवणार असल्याचे सांगितले.
महत्त्वाच्या बातम्या
