गोलमाल है भाई, सब गोलमाल है! भ्रष्टाचाराचा आरोप असलेल्या डॉ. पल्लवी सापळेच पुणे अपघात प्रकरणातील SIT च्या अध्यक्ष

Pune Sassoon SIT Enquiry : पुणे पोर्शे अपघात प्रकरणात ससून रुग्णालयातील गैरप्रकारासंबंधित चौकशीसाठी एसआयटी समिती स्थापन करण्यात आली आहे.

Pune Accident Case Sassoon SIT Enquiry

Source : ABP Majha/Sanketvarak

पुणे : पोर्शे अपघात प्रकरणात (Pune Porsche Accident) ससून रुग्णालयात (Sassoon Hospital) आरोपीचे नमुने बदलून त्याचा बचाव करण्याचा प्रयत्न करण्यात आला. पुण्यातील कल्याणीनगरमध्ये बिल्डरच्या अल्पवयीन मुलाने भरधाव कार चालवत दोन जणांना चिरडलं. यानंतर अल्पवयीन आरोपीच्या वडीलांनी पुरावे नष्ट करण्यासाठी ससून रुग्णालयातील डॉक्टरांना पैसे पुरवले. या प्रकरणात ससून रुग्णालयातील गैरप्रकारासंबंधित चौकशीसाठी एसआयटी समिती स्थापन करण्यात आली आहे. दरम्यान, पुणे पोर्शे अपघात प्रकरणातील SIT समितीच्या अध्यक्षावरच भ्रष्टाचाराचा आरोप असल्याचं समोर आलं आहे.

SIT समितीच्या अध्यक्षावर भ्रष्टाचाराचा आरोप

पुणे पोर्शे अपघात प्रकरणात ससून हॉस्पिटलमधील वैद्यकीय तपासणी आणि उपचारासंदर्भात झालेल्या गैरप्रकारासाठी एसआयटी समिती गठीत करण्यात आली आहे. या एसआयटी समितीच्या अध्यक्षा डॉ. पल्लवी सापळे आहेत. याशिवाय, या समितीमध्ये डॉ. गजानन चव्हाण आणि डॉ. सुधीर चौधरी यांची नियुक्ती करण्यात आली आहे. दरम्याऩ, या SIT समितीच्या अध्यक्षा डॉ. पल्लवी सापळे यांच्यावर आधीच भ्रष्टाचाराचा आरोप आहे. त्यामुळे एसआयटी समितीच्या निवडीवरही प्रश्नचिन्ह उपस्थित करण्यात आलं आहे.

डॉ. पल्लवी सापळेंवर भ्रष्टाचाराचा आरोप

डॉ. पल्लवी सापळे यांच्यावर पुणे पोर्शे अपघात प्रकरणातील SIT समितीच्या अध्यक्षपदाची जबाबदारी देण्यात आली आहे. डॉ. पल्लवी सापळे या ग्रॅन्ट शासकीय वैद्यकीय महाविद्यालय आणि सर जे. जे हॉस्पिटल रुग्णालयाच्या अधिष्ठाता (Dean) आहेत. जेजे रुग्णालयाच्या अधिष्ठाता डॉ. पल्लवी सापळे यांच्या विरोधात करण्यात आलेल्या भ्रष्टाचार आणि गैरव्यवहारांचे आरोप आहेत. डॉ. पल्लवी सापळे यांनी मिरज शासकीय वैद्यकीय महाविद्यालयात असताना तसेच आता जेजे रुग्णालयात अनेक प्रकरणात भ्रष्टाचार आणि गैरव्यवहार केल्याचा आरोप शिवसेना शिंदे गटाच्या आमदार यामिनी जाधव यांनी केला होता. जेजे रुग्णालयात औषध, यंत्रसामग्री खरेदीच्या बिलांवर 5 ते 10 टक्के कमिशन घेतल्याशिवाय सह्या करत नाहीत, असा आरोप त्यांच्यावर करण्यात आला होता. हा मुद्दा विधानसभेत सुद्धा चर्चेत आला होता.

डॉ. पल्लवी सापळे यांच्यावर असलेले आरोप कोणते?

डॉ. पल्लवी सापळे यांच्यावर आरोप करण्यात आले होते की, डॉ. सापळे भाड्याची गाडी वापरतात आणि महिन्याला त्याचं एक लाख रुपयांचे बिल शासनाला सादर करतात. हा खर्च 70 ते 80 लाख रुपये आहे. मिरज शासकीय वैद्यकीय महाविद्यालयात रक्तसंक्रमण शास्त्र विभागात असताना रक्तातील प्लाझ्मा विकून शासनाच्या परवानगीशिवाय त्यांनी 13 लाख रुपये जमा केले. या पैशातून रुग्णवाहिका खरेदी करून ती आईने दान दिल्याचं सांगितलं. असे आरोप डॉ. पल्लवी सापळे यांच्यावर आहेत.