Nalasopara Crime : नीट उत्तर न दिल्याने दोन भावांना दगडाने मारहाण, आरोपीने चक्क हातोडी उगारली!

विचारलेल्या प्रश्नावर नीट उत्तर न दिल्याने दोन आरोपींनी दोघा भावांना चक्क दगडाने मारहाण केली. कहर म्हणजे या भावांना मारण्यासाठी एका आरोपीने बॅगेतून हातोडी देखील काढली.

Nalasopara Crime

नालासोपारा : नालासोपाऱ्यात क्षुल्लक कारणावरुन हाणामारीची घटना घडली आहे. रस्त्याने चालत जाणाऱ्या दोन भावांना का रडत आहेस, असं विचारलं. मात्र त्यांनी नीट उत्तर दिलं नाही म्हणून त्यांना चक्क दगडाने मारहाण केली. कहर म्हणजे दोघां भावांना मारण्यासाठी एकाने बॅगेतून हातोडी देखील काढली. मात्र तिथल्या जमावाने त्याला पकडल्याने मोठा अनर्थ टळला. नालासोपारा पोलीस ठाण्यात दोघांविरोधात गुन्हा दाखल झाला आहे. पोलीस आरोपींचा शोध घेत आहेत. रविवारी (20 मार्च) रात्रीचा हा हायव्होल्टेज ड्रामा मोबाईल फोनच्या कॅमेऱ्यामध्ये कैद झाला आहे. पोलिसांनी दोघांविरोधात गुन्हा दाखल केला असून त्यांचा शोध सुरु आहे. 

नालासोपारा पश्चिमेच्या गुलमोहर अपार्टमेंटसमोर रविवारी (20 मार्च) रात्री 7:30 च्या सुमारास सुजित सिंग आणि त्याचा भाऊ अरुण सिंग हे दोघे रस्त्याने घरी जात होते. त्याचवेळी तिथून जाणारे आरोपी शशांक मुल्कराज आणि दीपक पांड्या यांनी या दोघांना थांबवून, तू का रडत आहेस, असं विचारलं. त्यावेळी सुजितने मी कशाला रडू, असं उत्तर दिलं. परंतु या उत्तराने दोघांनाही राग आला. त्यानंतर आरोपींनी सुजितला लाथाबुक्क्यांनी आणि दगडाने मारहाण केली. 

सुजितचा भाऊ अरुण सोडवायला गेल्यावर त्यालाही मारहाण केली. आरोपी एवढ्यावरच थांबले नाहीत. एकाने तर त्या दोघांना मारण्यासाठी बॅगेतून चक्क हातोडी काढली. मात्र सुदैवाने तिथल्या लोकांनी आरोपीच्या हातातून हातोडी काढून घेतली. परंतु यानंतर दोघेही पसार झाले. सुजितने नालासोपारा पोलीस ठाण्यात दोघांविरोधात तक्रार दाखल केली. यानंतर पोलिसांनी गुन्ह्याची नोंद केली. नालासोपारा पोलीस आता दोन्ही आरोपींचा शोध घेत आहेत.   

दरम्यान रविवारी रात्री घडलेल्या या घटनेचा व्हिडीओ व्हायरल झाल्याने, आज (21 मार्च) सकाळी व्हिडीओवरुन या घटनेचा सर्व थरार समोर आला आहे.

हे ही वाचा

Vasai Crime : वसईत प्रेयसीची हत्या करणाऱ्या प्रियकराची बिहारमधील हॉटेलमध्ये आत्महत्या