Mumbai Crime : मुंबईच्या नामांकित मॉलमध्ये फिरायला गेला, अचानक तिसऱ्या मजल्यावरुन उडी टाकून तरुणाने आयुष्य संपवलं
Mumbai Crime: आधी मॉलमध्ये फिरला, नंतर तिसऱ्या मजल्यावरुन उडी मारली, व्यक्तीने जीवन संपवले, मुंबईतील एका नामांकित मॉलमधील धक्कादायक घटना. तरुणाच्या आत्महत्येने घाटकोपरमध्ये खळबळ
Mumbai Crime : मुंबई उपनगरातील घाटकोपर परिसरात असणाऱ्या नामांकित मॉलमध्ये सोमवारी सकाळी एका व्यक्तीने आत्महत्या केल्याची घटना घडली. मृत व्यक्तीचे नाव दीपक जोशी (वय 38) असे होते. दीपकने नामांकित मॉलच्या तिसऱ्या मजल्यावरुन उडी मारुन आत्महत्या केली. या घटनेनंतर पार्कसाईट (Parksite) पोलिसांनी घटनास्थळी येऊन पंचनामा करुन दीपकचा मृतदेह ताब्यात घेतला. याप्रकरणाचा पुढील तपास सध्या पोलिसांकडून सुरु आहे.
या मॉलमध्ये सोमवारी सकाळी घडलेल्या या प्रकारामुळे एकच खळबळ उडाली आहे. दीपक दोशी तिसऱ्या मजल्यावरुन खाली पडल्यानंतर त्याचा मृतदेह रक्ताच्या थारोळ्यात पडला होता. हे दृश्य पाहून मॉलमधील दुकानदार आणि ग्राहकांना धक्का बसला. या घटनेवेळी मॉलमध्ये उपस्थित असणाऱ्या प्रत्यदर्शीने 'मिड-डे'ला सांगितले की, सकाळी 11.30 च्या सुमारास या मॉलच्या मुख्य लॉबीमध्ये अचानक स्फोट झाल्यासारखा आवाज आला. त्यामुळे लोक प्रचंड घाबरले. मात्र, थोड्यावेळातच सगळा प्रकार लक्षात आला. आम्हाला लॉबीत एक तरुण जमिनीवर पडलेला दिसला. त्या तरुणाचं डोकं फुटलं होतं आणि त्यामधून रक्तस्राव सुरु होता. त्यानंतर पोलिसांनी येऊन त्याचा मृतदेह ताब्यात घेतला, अशी माहिती या प्रत्यक्षदर्शी तरुणाने दिली.
बनावट नोटा छापल्याप्रकरणी दीपकला झाली होती अटक, वाशी पुलावरुन आत्महत्येचा प्रयत्न
दीपक जोशी याचे कुटुंब घाटकोपरच्या कामा लेनमधील बारोटवाडी येथे वास्तव्याला आहे. दीपकच्या घरी त्याचे आई-वडील आणि पत्नीसह राहत होता. दीपकचा मुलगा कच्छमध्ये त्याच्या मामाच्या घरी राहतो आणि तिथे शिकतो. दीपक हा त्याच्या आई-वडिलांचा एकुलता एक मुलगा होता. दीपकने यापूर्वी दोन-तीन वेळा आत्महत्येचा प्रयत्न केला होता, अशी माहितीही समोर आली आहे.
बारोटवाडीतील रहिवाशांनी 'मिड-डे'ला सांगितले की, दीपक लहानपणापासूनच मानसिकदृष्ट्या कमकुवत होता. तो शक्य त्या मार्गाने पैसे कमविण्याचा प्रयत्न करायचा आणि त्याचा प्रयत्न फसायचा. दहा वर्षांपूर्वी बनावट नोटा छापल्याप्रकरणी दीपकलाही पोलिसांनी अटक केली होती. याशिवाय कर्ज घोटाळा आणि अनेक आर्थिक घोटाळ्यांमध्ये त्याचा सहभाग होता.
त्याचे वडील लहानसहान कामं करायचे. तर आई लोकांच्या घरी स्वयंपाक करायची. दीपक जोशी याची बायको कुटुंबाच्या उदरनिर्वाहासाठी हातभार लावण्यासाठी बायको लहान मुलांना सांभाळण्याचे काम करत होती. मात्र, दीपकला झटपट आणि खूप पैसा कमवायचा होता. यापूर्वीही त्याने वाशी पुलावरून उडी मारून आत्महत्येचा प्रयत्न केला होता, मात्र मच्छिमारांनी त्याला वाचवले होते.
आणखी वाचा
महत्त्वाच्या बातम्या
