Mumbai Crime News: दोघांच्या भांडणाचा तिसऱ्या प्रवाशाला फटका, एकाने रेल्वेच्या दिशेने दगड भिरकावला अन् अकाऊंटंटचा डोळा गेला; मुंबईतील धक्कादायक प्रकार
Mumbai Crime News: काही दिवसापूर्वी मालाड रेल्वे स्थानकात किरकोळ वादातून प्रवाशाने एका प्रोफेसरची हत्या केल्याची घटना ताजी असतानाच आणखी एक गंभीर प्रकार उघडकीस आलाय.
Mumbai Crime News: लोकल ट्रेनमध्ये (Local Train) झालेल्या किरकोळ वादाचा फटका थेट एका निरपराध प्रवाशाला बसल्याची धक्कादायक घटना वांद्रे रेल्वे स्थानकात (Bandra railway station) घडली आहे. दोन प्रवाशांमधील भांडण इतके टोकाला गेले की, त्यातील एकाने रेल्वे ट्रॅकवर उतरून धावत्या ट्रेनच्या दिशेने दगड भिरकावला. मात्र हा दगड भांडणात नसलेल्या तिसऱ्याच प्रवाशाच्या डोळ्याला लागल्याने त्याला गंभीर इजा झाली आहे.
या घटनेत अकाउंटंट असलेल्या निशांत खत्री यांना डोळ्याला जबर दुखापत झाली असून, डॉक्टरांनी संबंधित डोळा यापुढे काम करणार नसल्याचे स्पष्ट केले आहे. एका क्षणाच्या रागातून झालेल्या या कृतीमुळे एका निष्पाप व्यक्तीचे आयुष्य कायमचे बदलले आहे. ही घटना वांद्रे रेल्वे स्थानक परिसरात घडली असून, घटनेची माहिती मिळताच रेल्वे पोलिसांनी तातडीने घटनास्थळी धाव घेतली. याप्रकरणी संबंधित आरोपीविरोधात गुन्हा दाखल करण्यात आला असून, पुढील तपास सुरू आहे.
Mumbai Crime News: महिन्याभरातील दुसरी धक्कादायक घटना
विशेष म्हणजे, मालाड रेल्वे स्थानकात काही दिवसांपूर्वीच किरकोळ वादातून एका प्रवाशाने एका प्रोफेसरची निर्घृण हत्या केल्याची घटना ताजी असतानाच, आता वांद्रे स्थानकात हा गंभीर प्रकार उघडकीस आला आहे. दररोज लाखो प्रवासी लोकल ट्रेनमधून प्रवास करत असताना, क्षुल्लक कारणांवरून होणारे वाद आणि त्यातून घडणाऱ्या हिंसक घटना अत्यंत गंभीर ठरत आहेत. क्षणिक रागावर नियंत्रण ठेवण्याची गरज पुन्हा अधोरेखित होत असून, अवघ्या महिन्याभरातील ही दुसरी धक्कादायक घटना असल्याने प्रवाशांच्या सुरक्षेचा प्रश्न ऐरणीवर आला आहे. रेल्वे प्रशासन आणि पोलिसांकडून अशा घटनांना आळा घालण्यासाठी कठोर पावले उचलली जाण्याची मागणी प्रवाशांकडून होत आहे.
राज्य आणि देश-विदेशातील महत्त्वाच्या बातम्या; पाहा व्हिडीओ
इतर महत्त्वाच्या बातम्या
महत्त्वाच्या बातम्या
