Kurla Bus Accident : कुर्ला बस अपघातामुळे कित्येकांची आयुष्यं उद्ध्वस्त; परिवहन महामंडळाचे अध्यक्ष भरत गोगावलेंनी दिल्या महत्त्वाच्या सूचना
Kurla Bus Accident : कुर्ल्यातल्या बेस्ट बसच्या अपघातात सात निष्पापांचा जीव गेला. या अपघातात कुणी आपली मुलं गमावली, तर कुणी आपली आई. त्या कुटुंबात अवघ्या एका क्षणात होत्याचं नव्हतं झालं.
Kurla BEST Bus Accident : मुंबईतल्या (Mumbai News) कुर्ल्यामध्ये काल रात्री नऊच्या सुमारास झालेल्या बेस्ट बसच्या अपघातानं अवघा महाराष्ट्र हादरला. कुर्ला एलबीएस मार्गावरून भरधाव वेगानं जाणाऱ्या बसवरचं चालकाचं नियंत्रण सुटून एक भीषण अपघात झाला. या अपघातात सात जणांचा जीव गेला तर 49 जण गंभीर जखमी झाले. त्याशिवाय बसच्या धडकेनं रस्त्यावरच्या 20-22 वाहनांचंही मोठं नुकसान झालं. या अपघातानंतर आता आरोप प्रत्यारोपांचं सत्र सुरु झालंय. हा अपघात नेमका का घडला? त्यात दोषी कोण? या प्रश्नांच्या उत्तराचा शोध सुरु झाला आहे. या अपघातामुळं बेस्ट प्रशासनाच्या कारभारावरही प्रश्नचिन्ह उपस्थित करण्यात येत आहे.
हे सगळं खरं असलं तरीसुद्धा अपघातात 7 निष्पापांनी जीव गमावला, तर तब्बल 48 जणांवर उपचार सुरू आहेत. त्यापैकी अनेकजण अत्यवस्थ आहेत. त्या दिवशी जेव्हा या 7 जणांनी घर सोडलं असेल, त्यावेळी तो आपल्या कुटुंबीयांसोबतचा शेवटचा क्षण असेल असा विचारही आला नसेल. या अपघातात मृत्यूमुखी पडलेल्या 7 जणांमध्ये कुणा आई होती, तर कुणाचा भाऊ, कुणाचे वडील होते, तर कुणी पोटची पोरं गमावली. पण याची जबाबदारी कुणाची? मृत्यूमुखी पडलेल्यांपैकी कुणी कामावरुन घरी परतत होतं. तर कुणी झेरॉक्स आणण्यासाठी गेलं होतं. मुलगी आणि वडील एका ठिकाणाहून घरी परतत होते. तर कुणी आपल्या मामाच्या लग्नासाठी दुसऱ्या शहरातून तिथे आलं होतं. अशा निष्पाप सात जणांचा जगण्याचा हक्क हिरावून घेण्याचा हक्क बेस्ट बसला कुणी दिला? चूक नेमकी कुणाची? हे सर्व प्रश्न आहेतच, पण निष्पापांच्या कुटुंबीयांचा आक्रोश मन हेलावणारा आहे.
कुर्ल्यातल्या बेस्ट बसच्या अपघातात सात निष्पापांचा जीव गेला. या अपघातात कुणी आपली मुलं गमावली, तर कुणी आपली आई. त्या कुटुंबात अवघ्या एका क्षणात होत्याचं नव्हतं झालं. त्यामुळं कुटुंबीयांची व्यथा, त्यांचं दु:ख हे कुणाच्याही हृदयाला पाझर फोडेल असंच आहे. अनेकजण तर रुग्णालयात मृत्यूशी झुंज देत आहेत, त्यांचा दोष काय? त्यांच्या वाट्याला हे भोग कुणामुळे? कुर्ल्यातील बस अपघातात ज्यांनी जीव गमावला, त्यांच्या कहाण्या सुन्न करणाऱ्या आहेत. तसेच, जे रुग्णालयात मृत्यूशी झुंज देतायत, त्यांची कहाणीही मनाला चटका लावणारी आहे. अचानक मृत्यूनं घातलेल्या तांडवामुळं कुणाला आपली लेक, कुणाला आई तर कुणाला पोटचा मुलगा गमवावा लागलाय. अशाच कुर्ला अपघातातील मन छिन्नविछिन्न करणाऱ्या काही कहाण्या...
मोबाईलच्या रिंगमुळे आईचा मृतदेह सापडला अन्...
आपल्या लेकाचं लग्न हा कुठल्याही आईच्या आयुष्यातल्या एक अनमोल क्षण. पंचावन्न वर्षांच्या कणीस फातिमा अन्सारी हाच क्षण आयुष्यभर हृदयात साठवून ठेवण्याच्या तयारीत होत्या. घरी मुलाच्या लग्नाची तयारी सुरु होती. मात्र आता त्या हे लग्न त्या कधीच पाहू शकणार नाहीत. बेस्ट बसचा अपघात झाला, त्याच रस्त्यावर असलेल्या देसाई रुग्णालयात त्या काम करायच्या. ड्युटीवर जात असताना त्यांना बसनं जोरदार धडक दिली आणि त्यातच त्यांचा मृत्यू झाला. लगीनघाई सुरु असणाऱ्या या कुटुंबावर फातिमा यांच्या दुर्दैवी मृत्युमुळं अक्षरशः दुःखाचा डोंगर कोसळला. आपली आई आता या जगात नाही, यावर त्यांच्या दोन मुलांचा आणि दोन मुलींचा अजूनही विश्वास बसत नाही.
लेक गेली, वडील अत्यवस्थ...
आपल्या कामासाठी सीएमएमटीला गेलेली वीस वर्षांची अनम जेव्हा काम संपवून कुर्ल्याला परतली, तेव्हा रेल्वे स्टेशनवर प्रचंड गर्दी होती. रिक्षाही मिळत नसल्यामुळं तिनं वडिलांना स्टेशनला बोलावलं. आपल्या लाडक्या लेकीला तिच्या वडिलांनी काही वेळातच पिक-अप केलं. मात्र, अनमला ते घरी पोहोचवू शकले नाहीत. वाटेत याच बसनं दिलेल्या जोरदार धडकेत तिचा मृत्यू झाला. आपली अनम या जगात नाही, याची अद्याप तिच्या वडिलांना कल्पनाही नाही. गंभीर जखमी झालेले तिचे वडीलही सध्या मृत्यूशी झुंज देतायत. आता तरी प्रशासनानं अनधिकृत फेरीवाल्यांना उठवावं, अशी कळकळीची विनंती अनमचे मामा अजगर यांनी केली आहे.
नोकरीचा पहिला दिवस, आयुष्याचाच पहिला दिवस ठरला...
जी कथा अनमची तीच विशीच्या उंबरठ्यावर असणाऱ्या आफरिनची. आफरिनचा नोकरीचा पहिला दिवस होता. अनमप्रमाणं तिलाही कुर्ला स्टेशनवर रिक्षा मिळत नव्हती. तिनं वडिलांना फोन केला, मात्र वडिलांनी तिला चालत यायला सांगितलं. त्यानंतर काही वेळानं तिच्या वडिलांना एक फोन आला. मुलीच्या अपघाताची बातमी ऐकून त्यांच्या पायाखालची जमीनच सरकली. धावतपळत ते हॉस्पिटलला पोहोचले. मात्र, तोपर्यंत आफरिन या जगातून निघून गेली होती. नोकरीचा पहिला दिवस कसा गेला, हे न सांगताच आफरिन या जगातून निघून गेली.
भूक लागली म्हणून खायला आणायला गेला अन् काळरुपी बेस्ट बसच्या चाकाखाली आला...
अठरा वर्षांचा हा शिवमदेखील आता या जगात नाही. वडिलांसोबत त्यांच्या मित्राच्या दुकानात गेलेल्या शिवमला भूक लागली होती. खायला काहीतरी आणावं, यासाठी रस्त्यावर गेलेल्या शिवमला या काळरुपी बसनं गाठलं. अपघाताचा आवाज ऐकून त्याचे वडील आणि मित्र इतरांच्या मदतीसाठी धावले. बसखाली आलेल्या एका व्यक्तीला त्यांनी बाहेर काढलं. आणि तेवढ्यात आपलाच शिवम बाजूला निपचित पडल्याचं त्यांना दिसलं. रुग्णालयात उपचारादरम्यान शिवमनं अखेरचा श्वास घेतला. शिवमच्या वडिलांचे मित्र बाबर सर्फुद्दिन हे आपल्या डोळ्यासमोर घडलेल्या या घटनेविषयी सांगताना भावुक होतात. तर शिवमचे वडील बुधराज यांना इतका जबर मानसिक धक्का बसलाय की त्यांच्या तोंडून शब्दही फुटत नाहीत.
नोकरी करुन कुटुंबाला हातभार लावायचं स्वप्न अधुरं, काळानं गाठलं, सध्या रुग्णालयात मृत्यूशी झुंज...
कुर्ला बस अपघातात मेहेरबान आलम खान हा 22 वर्षीय तरुण गंभीर जखमी झाला. मेहेरबान यानं दादर येथून कॉम्प्युटर हार्डवेअरचा डिप्लोमा केरला होता. मंगळवारी त्याला बोरीवली हुये नोकरीच्या मुलाखतीसाठी जायचं होतं. मात्र, त्याआधीच सोमवारी तो बस अपघातामध्ये गंभीर जखमी झाला. सायन रुग्णालयात त्याच्यावर अतिदक्षता विभागात उपचार सुरू आहेत. तो बेशुद्धावस्थेत असल्याचं त्याचे नातेवाईक अक्रम शेख म्हणाले. त्याचे आई-वडील बिहारमध्ये शेतमजुरी करतात. मुंबईमध्ये नोकरी करून गावी पैसे पाठवायचे, असं मेहेरबानचे स्वप्न आहे, असेही लेख पुढे म्हणाले.
मामाच्या लग्नासाठी गेला, पण वाटेतच काळाचा घाला
19 वर्षांचा इंझामाम उल हक मामाच्या लग्नासाठी गोवंडीहून कुर्लाला आला होता. पण वाटेतच त्यांना बसनं गाठलं. गोवंडी परिसरातून अनेक जण निघाले होते. हॉलवर पोहचणार तितक्यात बसनं त्यांना 12 जणांना धडक दिली. त्यावेळी त्यांच्यासोबत असलेला त्याचा दहा वर्षांचा लहान भाऊ अम्मान रस्त्याच्या दुसऱ्या पलीकडे पडला. मात्र त्याला फार दुखापत झाली नाही. पण इंझामामला गंभीर दुखापत झाली. मोहम्मद साजिद आणि इंझामाम उल हक है दोघे कुर्ता येथे एका टोपी बनवण्याच्या कारखान्यात काम करतात. अपघातात मौहम्मदव्या हाताला आणि पायाला मुक्का मार लागला आहे. तर इंझामाम उल हक रोखच्या कंबरेला दुखापत झाली आहे.
परिवहन महामंडळाचे अध्यक्ष भरत गोगावलेंनी दिल्यात महत्त्वाच्या सूचना
खाजगी बस पुरवठादाराकडून पुरवण्यात आलेल्या बसचा बेस्ट मध्ये झालेला गंभीर अपघात या पार्श्वभूमीवर परिवहन महामंडळाचे अध्यक्ष भरत गोगावले यांनी दिलेल्या सूचना...
1. बस इच्छित स्थळी सुखरूपपणे पोहोचवण्यासाठी सर्वात महत्त्वाचे घटक म्हणजे, कोणत्याही प्रकारचा यांत्रिक बिघाड नसलेली सुस्थितीतील बस आणि अत्यंत महत्त्वाचं म्हणजे, सदर बस चालवणारा चालक थोडक्यात सांगायचं तर बस आणि त्यावरचा चालक या दोघांचीही स्थिती अत्यंत निरोगी असणं गरजेचं आहे.
2. बसचा चालक योग्य प्रकारे प्रशिक्षित तर असला पाहिजेच परंतु त्याची शारीरिक प्रमाणेच मानसिक स्थिती देखील बस चालवण्यासाठी सक्षम असली पाहिजे यामध्ये त्यांनी किती वेळ ड्युटी केली आहे तो कोणत्या तणावात आहे का त्याचा स्वभाव कसा आहे त्याची झोप पुरेशी झाली आहे का? हे देखील तेवढेच महत्त्वाचे आहे.
3. अपघात झाला म्हणून चालकाला लगेच काढून टाका किंवा सर्विस वाईट आहे असे आम्हाला म्हणायचे नाही परंतु महामंडळाकडून चालवल्या जाणाऱ्या बसेस यावर जनतेचा विश्वास आहे अपघात हा शेवटी अपघात असतो तो कोणी मुद्दाम करत नाही हे जरी खरं असलं तरी देखील यामध्ये काळजी घेणं आवश्यक आहे आणि म्हणूनच एका एक्सीडेंट मध्ये तू ड्रायव्हर बाद आहे त्याला पुन्हा वापरू नका असे आम्ही म्हणत नाही परंतु चूक सुधारण्यास वाव दिला तर ती चूक सुधारू शकेल अशी व्यक्तीच तुम्ही नेमली पाहिजे केवळ 20 20 तास, पंधरा-पंधरा तास काम करायला तयार आहेत म्हणून कमी पैशात मिळणारी माणसं ड्रायव्हर म्हणून वापरणे योग्य नाही. आपल्याला माणसांकडून काम करून घ्यायचे आहे केवळ यंत्रांकडून नाही हे समजून घेतलं पाहिजे.
4.जेव्हा महामंडळाच्या बसेसचे असे अपघात होतात तेव्हा आम्ही चालकाला तात्काळ ट्रेनिंगला पाठवतो त्याच्यावर डिपार्टमेंटल ॲक्शन ही सुद्धा घेतो त्याला शिक्षा दिली जाते तसं तुमच्या ड्रायव्हरच्या बाबतीत होत नाही खाजगी ड्रायव्हर काही दिवस काम करतात वापरणे बंद केले जाते किंवा तो दुसऱ्या एखाद्या ठिकाणी वापरला जातो त्यामुळे त्याला सुधारण्याला वावच मिळत नाही.
5. ड्रायव्हरने रस्त्यावरच्या रहदारीकडे लक्ष दिले आहे का त्याचा स्पीड योग्य प्रकारे मेंटेन केलेला होता का तो भरधाव गाडी चालवतोय का रस्त्यावरून जाणारे येणारे लोकांकडे त्याचं लक्ष आहे का या सगळ्या बाबी महत्त्वाच्या आहेत महामंडळ स्तरावर आम्ही सगळ्या सूचना प्रसारित करत असतो परंतु या सूचना आमच्या लोकांना माहिती असतात तुमच्या लोकांना याविषयीची माहिती नसते बऱ्याचदा खाजगी चालक हे एसटी आपलं काही वेगळं होऊ शकत नाही अशा अविर्भावात लोकांना जुमानत नाहीत सूचनांचा पालन करत नाहीत असं जर होत असेल तर याकडे संबंधित कंपनीने लक्ष दिलं पाहिजे.
6. प्रवाशांचा जीवाबरोबरच चालकाचा जीव ही तेवढाच महत्त्वाचा आहे हे देखील तितकंच लक्षात घेतलं पाहिजे जरी आमची सहानुभूती असली तरी अख्ख्या महाराष्ट्रातील जनतेचा जो विश्वास आहे तो राखण्यासाठी या गोष्टीकडे खूप कटाक्षाने लक्ष दिलं पाहिजे जर जसा काळ बदलेल तसतसं अधिकाधिक खाजगी वाड्या गाड्या महामंडळाच्या ताफ्यामध्ये दाखल होणार आहेत त्यामुळे तुम्ही आणि आम्ही मिळून प्रवासी सेवा द्यायची आहे ही गोष्ट तुम्ही लक्षात घेतली पाहिजे आणि म्हणून महामंडळ जे काही नियम ड्रायव्हरच्या बाबतीत बसेसच्या बाबतीत लावते ते तुम्ही समजून घेऊन त्यानुसार आमच्या बरोबरीने काम करायची आणि आमच्या पद्धतीने काम करायचे तुमची तयारी असली पाहिजे.
7. महामंडळाच्या बसच्या कामकाजावर लक्ष ठेवणाऱ्या यंत्र अभियांत्रिकी खात्याने आणि वाहतुकीचे एकूण काम बघणाऱ्या वाहतूक खात्याने याबाबत सविस्तर सूचना तातडीने काढाव्यात तसेच खाजगी वाहतूकदारांची वेळोवेळी बैठक घेऊन याबाबत चर्चा विचारविनिमय करून सूचना द्याव्यात.
8. अपघाताचे जे प्रमुख स्पॉट किंवा ठिकाण असतात मग ते मुंबईत असतील किंवा मुंबईच्या बाहेर वेगवेगळ्या ठिकाणी असतील वेगवेगळ्या जिल्ह्यांमध्ये असतील प्रत्येक विभागाला त्याची कल्पना असते ते सगळे वाहतूक खात्याने संकलित करा एकमेकांसोबत ते शेअर करा आणि त्याच्यावर लवकरात लवकर खाजगी संस्थांनी बस पुरवठा करणाऱ्यांनी त्यांचं काय नियोजन आहे ते सादर करायचे यामध्ये इम्प्रूमेंट नाही झाली तर मात्र नेमकं काय करायचं काही दंडात्मक कार्यवाही करायची का याबाबत वाहतूक खात्याचे आणि यंत्र अभियांत्रिकी खात्याचे जे काही नियोजन असेल जे काही विचार असतील ते त्यांनी अध्यक्षांना सादर करावे.
9. गाडीला स्पीड लिमिट करण्यासाठी स्पीड लॉक असला पाहिजे. त्याचा नीट वापर केला पाहिजे आजकाल व्हेईकल ट्रेकिंग सिस्टीम सुद्धा असते ती असली पाहिजे. गाडीमध्ये सीसीटीव्ही चालू स्थितीत जर असतील तर ह्या अशा घटनांवर प्रतिबंध करता येऊ शकेल. ड्रायव्हर मद्यपान वगैरे कोणत्या नशेच्या अमलाखाली गाडी चालवणार नाही स्पीड व्यवस्थित ठेवेल, नंतर काही दुर्दैवाने घडलं तर आपल्याकडे पुरावा राहू शकेल या गोष्टींचा पण योग्य विचार बस पुरवणाऱ्या कंपनीने केला पाहिजे.
पाहा व्हिडीओ : Kurla Bus Accident : कुणी आई.. तर कुणी लेक गमावली; बस अपघातनंतरच्या कथा आणि व्यथा Special Report
महत्त्वाच्या बातम्या
ट्रेंडिंग न्यूज
