Jalgaon Crime News: जनक्रांती मोर्चाच्या प्रदेशाध्यक्षांवर दिवसाढवळ्या हल्ला, दुचाकीवर आलेल्या टोळक्याने गाडी अडवली अन्...; जळगावात खळबळ
Jalgaon Crime News: जळगाव शहरातील गजबजलेल्या रिंग रोड परिसरात जनक्रांती मोर्चाचे प्रदेशाध्यक्ष मुकुंद सपकाळे यांच्यावर प्राणघातक हल्ला करण्यात आल्याची धक्कादायक घटना घडली आहे.
Jalgaon Crime News: जळगाव (Jalgaon) शहरातील गजबजलेल्या रिंग रोड परिसरात आज शनिवारी (दि.11) दुपारी जनक्रांती मोर्चाचे प्रदेशाध्यक्ष मुकुंद सपकाळे (Mukund Sapkale) यांच्यावर प्राणघातक हल्ला करण्यात आला. दुचाकीवरून आलेल्या टोळक्याने सपकाळे यांची कार अडवून चारही बाजूंनी जोरदार दगडफेक केली. या भीषण हल्ल्यात सपकाळे यांच्या डोक्याला गंभीर दुखापत झाली असून शहरात खळबळ उडाली आहे.
Jalgaon Crime News: नेमकी घटना काय?
मुकुंद सपकाळे हे आपल्या काही कार्यकर्त्यांसह कारने रिंग रोड परिसरातून जात होते. यावेळी दुचाकीवर आलेल्या काही तरुणांनी त्यांची गाडी अडवली आणि काही कळण्याच्या आतच वाहनावर दगडांचा वर्षाव सुरू केला. हल्लेखोरांनी इतक्या जोराने दगडफेक केली की कारच्या काचा फुटून सपकाळे यांच्या डोक्याला गंभीर जखम झाली. हल्ल्यानंतर सपकाळे यांनी स्वतः जिल्हा पेठ पोलीस ठाणे गाठले. पोलिसांनी घटनेचे गांभीर्य ओळखून त्यांना तात्काळ जिल्हा रुग्णालयात उपचारासाठी दाखल केले आहे.
Jalgaon Crime News: हल्ल्याचे कारण काय?
मिळालेल्या प्राथमिक माहितीनुसार, हा हल्ला बॅनर छपाईच्या वादातून झाला असल्याचे समोर येत आहे. मुकुंद सपकाळे यांनी दिलेल्या माहितीनुसार, विशाल अहिरे नावाच्या तरुणासोबत त्यांचा वाद झाला होता. याच वादाचा राग मनात धरून विशालने आपल्या साथीदारांसह हा हल्ला केल्याचा आरोप सपकाळे यांनी केला आहे.
Jalgaon Crime News: पोलिसांची कारवाई
भरदिवसा शहराच्या मुख्य भागात हा हल्ला झाल्याने परिसरात काही काळ तणावाचे वातावरण निर्माण झाले होते. घटनेची माहिती मिळताच पोलिसांनी घटनास्थळी धाव घेतली. पोलिसांनी परिसरातील सीसीटीव्ही फुटेज गोळा करण्यास सुरुवात केली आहे. मुख्य संशयित आरोपी विशाल अहिरे आणि त्याच्या साथीदारांचा शोध घेण्यासाठी पोलिसांनी पथके रवाना केली आहेत. जळगावात गेल्या काही दिवसांपासून गुन्हेगारीच्या घटनांमध्ये वाढ होत असल्याने सर्वसामान्यांमध्ये भीतीचे वातावरण आहे. आता या राजकीय पदाधिकाऱ्यावरील हल्ल्यामुळे पोलीस प्रशासनासमोर आरोपींना तातडीने अटक करण्याचे आव्हान आहे.
इतर महत्त्वाच्या बातम्या
महत्त्वाच्या बातम्या
