Ashok Kharat Case Nashik Crime News: अशोक खरात शेकडो खात्यांचा नॉमिनी? अनेकांचे आधार, पॅनकार्ड घेतले अन्...; भोंदूबाबाचा आणखी एक हादरवणारा कारनामा समोर
Ashok Kharat Case Nashik Crime News: महिलांचे लैंगिक शोषण करणाऱ्या भोंदू अशोक खरात याच्या पापाचा घडा आता आर्थिक व्यवहारांच्या बाबतीतही भरू लागला आहे.
Ashok Kharat Case Nashik Crime News: महिलांचे लैंगिक शोषण करणाऱ्या भोंदू अशोक खरात (Ashok Kharat) याच्या पापाचा घडा आता आर्थिक व्यवहारांच्या बाबतीतही भरू लागला आहे. अनेक नागरिकांची आधार कार्ड आणि पॅन कार्डची माहिती वापरून खरातने मोठ्या आर्थिक व्यवहारांचे जाळे उभे केल्याचा संशय एसआयटी (SIT) ला आहे.
तपास यंत्रणांच्या प्राथमिक माहितीनुसार, खरातने विविध पतसंस्थांमध्ये शेकडो खात्यांवर स्वतःला ‘नॉमिनी’ म्हणून नोंदवले असल्याची शक्यता वर्तवली जात आहे. या खात्यांमधून कोट्यवधी रुपयांचे व्यवहार झाल्याचा संशय असून, हे व्यवहार स्वतः खरातनेच हाताळले असल्याचे संकेत मिळत आहेत. विशेष म्हणजे, काही खात्यांना एकाच मोबाईल नंबरची लिंक असल्याचेही उघड होत आहे. हा नंबर स्वतः अशोक खरात वापरत असल्याचा संशय असून, यामुळे संपूर्ण आर्थिक व्यवहारांवर त्याचे नियंत्रण असल्याचे तपासात समोर येत आहे.
Ashok Kharat Case Nashik Crime News: रुपाली चाकणकरांच्या संपर्कातील व्यक्तीच्या नावानेही खाते?
तपासात आणखी एक महत्त्वाचा धागा समोर आला आहे. रुपाली चाकणकर यांच्या संपर्कातील व्यक्तीच्या नावानेही खाते उघडण्यात आल्याची माहिती समोर आली आहे. त्यामुळे या प्रकरणाला राजकीय रंग चढण्याची शक्यता व्यक्त केली जात आहे. दरम्यान, खरातशी संबंधित असलेल्या विविध पतसंस्थांची एसआयटीकडून सखोल चौकशी सुरू आहे. या संस्थांमधील व्यवहार, खातेधारकांची माहिती आणि निधीचा प्रवाह याचा तपशील तपासला जात आहे. आता या प्रकरणात नेमकी काय माहिती समोर येणार? हे पाहणे महत्त्वाचे ठरणार आहे.
Ashok Kharat Nashik Crime News: अशोक खरातचा आणखी एक गोरखधंदा
दरम्यान, भोंदूगिरी प्रकरणात अडकलेल्या अशोक खरात याच्याविरोधात आता आणखी एक गंभीर गोरखधंदा उघडकीस येत असल्याचा दावा करण्यात येत आहे. बनावट ‘फार्मर प्रोड्यूसर कंपन्या’ स्थापन करून शेतकऱ्यांची फसवणूक केल्याचा आरोप समोर आला आहे. मिळालेल्या माहितीनुसार, केंद्र सरकारच्या NAFED (नाफेड) मार्फत शेतमाल खरेदी प्रक्रियेचा गैरफायदा घेत, खरातने बनावट कंपन्यांच्या माध्यमातून व्यवहार केल्याचा संशय व्यक्त केला जात आहे. अधिकाऱ्यांशी असलेल्या कथित संबंधांचा वापर करून या कंपन्या उभ्या केल्याचा आरोपही करण्यात येत आहे.
या प्रकरणात ‘व्यंकटेश फार्मर प्रोड्यूसर कंपनी’ विशेष चर्चेत आली आहे. या कंपनीमध्ये अशोक खरात आणि त्याची पत्नी संचालक असल्याची माहिती समोर आली आहे. याशिवाय आणखी 15 ते 16 कंपन्यांमध्ये खरातची भागीदारी असण्याची शक्यता तपास यंत्रणांकडून व्यक्त केली जात आहे. शेतकऱ्यांकडून कांदा, मका यांसारख्या पिकांची खरेदी करण्याच्या नावाखाली फसवणूक केल्याचा आरोप असून, या माध्यमातून मोठ्या प्रमाणावर आर्थिक व्यवहार झाल्याची शक्यता आहे.
या संदर्भात निलेश शेडगे (श्रीरामपूर, स्वतंत्र भारत पक्ष) यांनी पोलिसांत तक्रार अर्ज दाखल केला आहे. तसेच, या प्रकरणात खरातसह संबंधित अधिकाऱ्यांची ईडीमार्फत चौकशी करून कठोर कारवाई करण्याची मागणी करण्यात आली आहे. एकूणच, आधीच गंभीर असलेल्या अशोक खरात प्रकरणात आता शेतकरी फसवणुकीचा नवा कोन समोर आल्याने तपास अधिकच गडद होत असून, पुढील काळात आणखी मोठे खुलासे होण्याची शक्यता वर्तवली जात आहे.
आणखी वाचा
महत्त्वाच्या बातम्या
