Ashok Kharat Case Nashik Crime News: पिंक टी-शर्ट, वाढलेली दाढी अन् स्क्रीनवर 'भोंदू' खरात; VC सुनावणीत सरकारी वकिलांनी मांडला क्रूरतेचा पाढा, कोर्टात नेमकं काय-काय घडलं?
Ashok Kharat Case Nashik Crime News: नाशिकचा भोंदूबाबा अशोक खरात याला गुरुवारी पुन्हा एकदा न्यायालयासमोर उभे करण्यात आले होते.
Ashok Kharat Case Nashik Crime News: शेकडो महिलांचे लैंगिक शोषण आणि फसवणुकीचा आरोप असलेला नाशिकचा भोंदू बाबा अशोक खरात (Ashok Kharat) याला गुरुवारी पुन्हा एकदा न्यायालयासमोर उभे करण्यात आले. मात्र, यावेळी दृश्य काही वेगळे होते. सुरक्षेच्या कारणास्तव खरातला प्रत्यक्ष कोर्टात न आणता व्हिडीओ कॉन्फरन्सिंग (VC) द्वारे हजर करण्यात आले. स्क्रीनवर दिसणारा खरात आणि सरकारी वकिलांनी मांडलेला त्याच्या क्रूरतेचा पाढा, यामुळे कोर्टातील वातावरण चांगलेच तापले होते.
न्यायालयाच्या आदेशानुसार दुपारी सुनावणी सुरू झाली. कोर्ट रूममध्ये लावलेल्या चार मोठ्या स्क्रीनवर अशोक खरात अवतरला. गुलाबी (Pink) रंगाचा टी-शर्ट, वाढलेली दाढी आणि दोन्ही हात एकमेकांवर धरून निपचित उभा असलेला खरात यावेळी उपस्थितांना पाहायला मिळाला. न्या. बी. एन. ईचपुरानी यांनी त्याचे नाव विचारले असता, त्याने अत्यंत धीम्या आवाजात उत्तर दिल्याचे दिसून आले.
Ashok Kharat Case Nashik Crime News: सरकारी वकिलांचा खळबळजनक युक्तिवाद
सुनावणीदरम्यान सरकारी वकील ॲड. शैलेंद्र बागडे आणि तपास अधिकाऱ्यांनी खरातच्या कृत्यांचा पाढा वाचला. खरातने आमिष दाखवून पिडितेवर अत्याचार केला, ज्यामुळे ती गर्भवती राहिली. त्यानंतर त्याने तिला काही गोळ्या आणि जडीबुटीचे औषध देऊन तिचा गर्भपात घडवून आणला. या गोळ्या कुठून आणल्या आणि त्या औषधात काय होते, याचा तपास करणे बाकी आहे. खरात पिडितेला "तू अप्सरा आहेस" असे सांगून भुरळ घालत असे आणि तिचे शोषण करत असे. खरात पिडितेच्या नातेवाईकांकडून आधार कार्ड आणि पॅन कार्डची मागणी करत होता. तपासासाठी 7 दिवसांची पोलीस कोठडी मिळावी, असा युक्तिवाद करण्यात आला.
Ashok Kharat Case Nashik Crime News: बचाव पक्षाचा पवित्रा
तर खरातच्या वकिलांनी 7 दिवसांच्या वाढीव कोठडीला जोरदार विरोध केला. हा दुसरा गुन्हा आहे. एक प्रकारचा गुन्हा आहे. याआधी 14 दिवस पोलीस कोठडी झाली आहे. माझ्याकडे अद्याप या प्रकरणाची फिर्याद आली नाही. गर्भपात झाले असे म्हणतात, त्याचा कालावधी काय होता? काही व्हिडीओ सोशल मीडियावर व्हायरल होत आहे. त्यावर गुन्हा दाखल झाला आहे. काळी जादूचे आरोप करण्यात आले. आधारकार्ड पॅन कार्ड मागण्यात आले. पण, आरोपीने कोणते पाणी दिले हे तपासायचे आहे, असे कारण सांगतात. ही 2022 ची घटना आहे. याआधी 14 दिवस पोलीस कोठडी दिली आहे. आता पुन्हा 7 दिवस कोठडीची गरज नाही, असा युक्तिवाद त्यांनी केला.
Ashok Kharat Case Nashik Crime News: 8 एप्रिलपर्यंत कोठडीत वाढ
यानंतर सरकारी पक्षाने खरात हा 'मास्टरमाईंड' असून तो तपासात सहकार्य करत नसल्याचे न्यायालयाच्या निदर्शनास आणून दिले. दोन्ही बाजूंचा युक्तिवाद ऐकल्यानंतर, न्यायालयाने गुन्ह्याचे गांभीर्य लक्षात घेता अशोक खरातला 8 एप्रिल 2026 पर्यंत पोलीस कोठडी सुनावली आहे. आता 8 एप्रिलपर्यंतच्या कोठडीत SIT खरातच्या कोणत्या काळ्या कृत्यांचा पर्दाफाश करते? याकडे सर्वांचे लक्ष लागले आहे.
आणखी वाचा
महत्त्वाच्या बातम्या
