31 जुलैपर्यंत आयटीआर दाखल न केल्यास काय परिणाम होईल? डेडलाइन चुकली तर किती दंड आकारला जाईल?

Income Tax Returns : यावर्षी आयटीआर भरण्याची अंतिम तारीख वाढवण्याचा सरकारचा कोणताही विचार नाही.

tax

Income Tax Returns : यावर्षी आयटीआर भरण्याची अंतिम तारीख वाढवण्याचा सरकारचा कोणताही विचार नाही. आर्थिक वर्ष 2021-22 किंवा मूल्यांकन वर्ष 2022-2023 साठी ITR दाखल करण्याची अंतिम तारीख 31 जुलै आहे. यावेळी सरकारने मुदतवाढ न देण्याचे संकेत दिले आहेत. मात्र, संकेतस्थळ व्यवस्थित काम करत नसल्याची तक्रार ट्विटरवरील अनेक युजर्स करत आहेत, त्यामुळे मुदत वाढवण्यात यावी अशी मागणी होत असल्याचं केंद्रीय महसूल सचिव तरुण बजाज यांनी सांगितलं आहे. 

जर तुम्ही अंतिम मुदतीपर्यंत ITR दाखल करू शकत नसाल, तर तुम्हाला ITR उशिरा दाखल करताना दंड भरावा लागेल. याशिवाय, तुम्हाला आयकर विभागाकडून प्राप्तिकर सूचना मिळू शकते. यानंतर, तुम्हाला कर भरावा लागेल, तसेच दंड भरावा लागेल.

किती दंड आकारला जाईल?

जे करदाते 31 जुलैपर्यंत ITR भरू शकत नाहीत ते 31 डिसेंबर 2022 पर्यंत रिटर्न भरू शकतात. पण लक्षात ठेवा की 2021-22 या वर्षासाठी, कोणताही न भरलेला कर व्याजासह दंडही भरावा लागेल. TaxManager.in या पोर्टलचे टॅक्स ई-फायलिंग आणि अनुपालन व्यवस्थापन पोर्टलचे मुख्य कार्यकारी दीपक जैन यांनी दिलेल्या माहितीनुसार तुम्ही देय तारखेपर्यंत तुमचा आयटीआर भरण्यात अयशस्वी झाल्यास, तुम्ही ३१ डिसेंबर २०२२ पर्यंत उशीर झालेला रिटर्न भरू शकता. शेवटच्या तारखेनंतर परंतु 31 डिसेंबर 2022 पूर्वी रिटर्न भरल्यास तुम्हाला 5,000 रुपये दंड भरावा लागेल.

या प्रकरणात 1000 रुपयांचा दंड भरावा लागणार

कलम 234F नुसार, शेवटच्या तारखेनंतर ITR भरण्यासाठी 5,000 रुपये दंड भरावा लागेल. मात्र, जर व्यक्तीचे एकूण उत्पन्न 5 लाख रुपयांपेक्षा जास्त नसेल, तर या प्रकरणात 1000 रुपये दंड भरावा लागेल. जर एखाद्या व्यक्तीचे एकूण उत्पन्न त्याने निवडलेल्या कर प्रणाली अंतर्गत मूलभूत सूट मर्यादेपेक्षा जास्त नसेल, तर त्याला विलंबित ITR भरताना कोणताही दंड भरावा लागणार नाही.

ही मंडळी दंडाशिवाय ITR भरू शकतात

आयकराशी संबंधित कायद्यानुसार, अंतिम मुदत संपल्यानंतर प्रत्येकाला आयटीआर भरण्यासाठी विलंब शुल्क भरावे लागत नाही. जर एखाद्या व्यक्तीचे एकूण उत्पन्न मूळ सूट मर्यादेपेक्षा जास्त नसेल, तर त्याला उशीरा ITR भरताना दंड भरावा लागणार नाही. जर एकूण उत्पन्न मूळ सूट मर्यादेपेक्षा जास्त नसेल, तर कलम 234F अंतर्गत ITR वर कोणतेही विलंब शुल्क आकारले जात नाही.