SIP तून म्युच्युअल फंडमध्ये गुंतवणूक करताना काय दक्षता घ्यावी? नुकसान टाळण्यासाठी कोणत्या गोष्टी टाळाव्यात?
SIP : भारतीय शेअर बाजारात गेल्या काही वर्षांपासून एसआयपीद्वारे गुंतवणूक करणाऱ्यांची संख्या वाढली आहे. मात्र, काही गुंतवणूकदार अशा चुका करतात त्यामुळं त्यांचं नुकसान होतं.
मुंबई : भारतीय शेअर बाजारात गेल्या काही वर्षांमध्ये एसआयपीद्वारे होणारी गुंतवणूक मोठ्या प्रमाणात वाढली आहे. मात्र, शेअर बाजारातील तेजी आणि घसरणीमुळं म्युच्युअल फंड गुंतवणूकदार त्रस्त असतात. अनेक महिने एसआयपीद्वारे गुंतवणूक करुन देखील त्यांच्या पैशात वाढ होत नाही. यामुळं काही गुंतवणूकदार निराश होतात.
शेअर बाजारातील तेजी आणि घसरणीमुळं काही गुंतवणूकदार एसआयपीच्या जागी बँकेच्या रिकरिंगमध्ये ठेव ठेवणे किंवा मुदत ठेव ठेवण्याचा विचार करत आहेत. अशावेळी एसआयपी गुंतवणूकदारांनी कोणत्या गोष्टींची दक्षता घेतली पाहिजे हे जाणून घेतलं पाहिजे.
एसआयपी करताना कोणत्या गोष्टी टाळाव्यात?
काही गुंतवणूकदार शेअर बाजारातील घसरणीमुळं एसआयपी बंद करण्याचा विचार करतात. बाजारात तेजी आल्यानंतर गुंतवणूक सुरु करु असा त्यांचा विचार असतो. मात्र, या चुकीमुळं मोठा फंड तयार करण्याची संधी तुमच्या हातू जाऊ शकते. एसआयपी गुंतवणूकदारांना बाजारातील तेजी आणि घसरणीच्या काळात फायदा मिळू शकतो. बाजारात तेजी असते तेव्हा यूनिटसचं मूल्य वाढतं. तर, बाजारातील घसरणीवेळी कमी किमतीवर यूनिट मिळतात.
एसआयपीद्वारे गुंतवणूक करणाऱ्यांनी बाजारातील तेजीची वाट पाहू नये.एसआयपीद्वारे हळू हळू पैशांची गुंतवणूक होते. यामुळं दीर्घ काळात गुंतवणुकीची अवरेज कॉस्ट खूप कमी राहते. यामुळं दीर्घ काळात मोठा फंड तयार करता येतो.
अनेकदा गुंतवणूक सुर केल्यानंतर गुंतवणूकदार प्रत्येक महिन्याला किंवा दर तिमाहीत रिटर्नची मोजणी करतात. एसआयपीद्वारे करण्यात आलेली गुंतवणूक दीर्घकाळासाठी असते. पाच वर्ष आणि 10 वर्षांच्या कालावधीनंतर रिटर्नचं कॅलक्यूलेशन करु शकता.
काही गुंतवणूकदार म्युच्युअल फंडामध्ये गुंतवणूक करताना त्या फंडनं दिलेला जुना परतावा पाहतात. त्याच प्रमाणं पुढील काळात परतावा मिळेल, असं अनेकांना वाटतं. मात्र, वेगवेगळ्या काळात स्टॉक मार्केटची कामगिरी वेगळी असते. गेल्या काही वर्षांचा परतावा पाहून गुंतवणूक सुरु केल्यास तुम्हाला फटका बसू शकतो.
म्युच्युअल फंडमध्ये गुंतवणूक करणाऱ्या गुंतवणूकदारांनी गुंतवणूक सुरु करण्यापूर्वी किती वर्षांसाठी गुंतवणूक सुरु करायची हे ठरवलं पाहिजे. तुमची गुंतवणूक दीर्घकाळासाठी असल्यास बाजारातील तेजी आणि घसरणीची चिंता करु नये. तुम्ही पाच वर्षांसाठी गुंतवणूक करणार असाल तर चौथ्या वर्षापासून तुम्ही सावध असणं आवश्यक आहे.
(टीप- शेअर बाजार, म्यूच्यूअल फंड हे जोखमीच्या अधीन असतात. या लेखात दिलेली माहिती ही प्राथमिक स्वरुपाची असून आम्ही कोणताही दावा करत नाही. या लेखामागचा गुंतवणुकीसाठी शिफारस, सल्ला देण्याचा उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)
महत्त्वाच्या बातम्या
