India GDP: भारताचा आर्थिक विकास दर घटण्याचा अंदाज; वाढत्या महागाईचा परिणाम
S&P Global Ratings: रशिया-युक्रेन युद्ध आणि वाढत्या महागाईचा परिणाम भारताच्या विकास दरावर होणार असल्याचा अंदाज S&P Global Ratings या आंतरराष्ट्रीय संस्थेने वर्तवला आहे.
S&P Global Ratings: वाढत्या महागाईचा फटका भारताच्या विकास दराला बसण्याची शक्यता आहे. मागील काही महिन्यांपासून असलेल्या महागाईमुळे भारताचा आर्थिक विकास दर 7.8 टक्क्यांऐवजी 7.3 टक्के राहणार असल्याचा अंदाज एस अॅण्ड पी ग्लोबल रेटिंगने व्यक्त केला आहे.
वाढती महागाई, दीर्घकाळ चालत असलेले रशिया-युक्रेन युद्धाचे परिणाम भारताच्या अर्थचक्रावर होत असल्याचे एस अॅण्ड पी ग्लोबल रेटिंग संस्थेने म्हटले आहे.
महागाईचा दर अधिक काळ राहणे ही चितेंची बाब आहे असल्याचे संस्थेने म्हटले आहे. भारताच्या मध्यवर्ती बँकेने सध्या असलेल्या दरापेक्षाही अधिक दर वाढवण्याची आवश्यकता असल्याचे संस्थेने अहवालात म्हटले. मात्र, यामुळे उत्पादन आणि रोजगाराला फटका बसण्याची शक्यता ही वर्तवण्यात आली आहे.
S&P Global Ratings आर्थिक वर्ष 2022-23 साठी किरकोळ महागाई दर 6.9 टक्के राहण्याचा अंदाज वर्तवला आहे. रिझर्व्ह बँकेने हा किरकोळ महागाई दर 5.7 टक्के राहण्याचा अंदाज वर्तवला होता.
डिसेंबरमध्ये भारताचा आर्थिक विकास दर 7.8 टक्के राहण्याचा अंदाज एस ॲंड पीनं वर्तवला होता. याआधी जागतिक बॅंकेने भारताचा विकास दर 8.7 टक्क्यांवरून चालू आर्थिक वर्ष 2022-23 साठी अंदाजित 8 टक्क्यांवर आणला होता.
आंतरराष्ट्रीय नाणेनिधी संघटनेनेदेखील भारताचा अंदाजित विकास दर हा 9 टक्क्यांवरून 8.2 टक्के राहणार असल्याचा अंदाज वर्तवला होता. आशियाई विकास बँकेनेदेखील भारताचा अंदाजित विकास दर 7.5 टक्क्यांपर्यंत खाली आणला आहे.
महागाईचा भडका; घाऊक महागाई दर 15.08 टक्क्यांवर
किरकोळ महागाई दर 8 वर्षांच्या उच्चांकावर पोहोचल्यानंतर एप्रिल 2022 मध्ये घाऊक महागाईनेही नवीन विक्रम प्रस्थापित केला आहे. सरकारी आकडेवारीनुसार, घाऊक महागाईचा दर गेल्या महिन्यात 15.08 टक्के होता. एक वर्षापूर्वी म्हणजेच एप्रिल 2021 मध्ये घाऊक महागाईचा दर 10.74 टक्के होता. या वाढीसह घाऊक महागाई दर नऊ वर्षातील सर्वोच्च पातळीवर पोहोचला आहे. इंधन आणि ऊर्जा घाऊक महागाई दर 34.52 टक्क्यांवरुन 38.66 टक्के तर अन्न धान्य महागाई दर 8.71 टक्क्यांवरुन 8.88 टक्के झाला आहे.
महत्त्वाच्या बातम्या
