पंतप्रधानांसह राष्ट्रपती खासदारांना किती मिळतो पगार? कोणत्या आहेत सुविधा? सविस्तर माहिती एका क्लिकवर
देशाच्या पंतप्रधानांना नेमका पगार (PM Salary) किती असतो? किंवा राष्ट्रपती, खासदार यांना पगार किती असतो? पाहुयात याबाबतची सविस्तर माहिती.
PM Salary News: भारताच्या (India) दृष्टीनं आजचा दिवस खूप महत्वाचा आहे. कारण आज नरेंद्र मोदी (Narendra Modi) हे तिसऱ्यांदा पंतप्रधान पदाची शपथ घेणार आहेत. त्यांच्यासोबत अनेक कॅबिनेट मंत्री देखील शपथ घेणार आहेत. दरम्यान, तुम्हाला हे माहित आहे का, की देशाच्या पंतप्रधानांना नेमका पगार (PM Salary) किती असतो? किंवा राष्ट्रपती, खासदार यांना पगार किती असतो? या पदावरील व्यक्तिंना नेमक्या कोणत्या सुविधा असतात? याबाबतची सविस्तर माहिती पाहुयात.
पंतप्रधान हे सर्वात महत्वाचे पद
भारताच्या लोकशाही व्यवस्थेत पंतप्रधान हे सर्वात महत्वाचे पद आहे. पंतप्रधान आणि त्यांचं मंत्रीमंडळ देशाच्या संबंधित असणारे सर्व निर्णय घेतात. अनेकांना पंतप्रधानांची सर्व कामे माहित असतात. पण, पंतप्रधानांना मिळणारा पगार आणि सुविधा याबाबत सर्वांनाच माहिती नसते. आज आपण पंतप्रधान, राष्ट्रपती आणि खासदारांना मिळणारे वेतन, भत्ते आणि इतर सुविधांबद्दल माहिती पाहणार आहोत.
पंतप्रधानांना किती पगार आणि इतर सुविधा काय?
भारतात पंतप्रधानांचे वेतन दरमहा 1.66 लाख रुपये आहे. यामध्ये मूळ वेतन 50,000 रुपये आहे. तर खर्च भत्ता 3,000 रुपये, संसदीय भत्ता 45,000 रुपये आणि 2,000 रुपये दैनिक भत्ता यांचा समावेश आहे. तर पंतप्रधानांना अनेक प्रकारच्या सरकारी सुविधा असतात. यामध्ये अधिकृत सरकारी निवासस्थान, स्पेशल प्रोटेक्शन ग्रुप (SPG) सुरक्षा, सरकारी वाहने आणि विमानांची सुविधा, आंतरराष्ट्रीय सहलींसाठी सरकारकडून भाडे, निवास आणि जेवणाचा खर्च देखील मिळतो. भारतात पंतप्रधान झालेल्यांना निवृत्तीनंतरही अनेक सुविधा मिळतात. या सुविधांपैकी सर्वात महत्त्वाची बाब म्हणजे माजी पंतप्रधानांना या कालावधीत पाच वर्षांसाठी मोफत सरकारी घर, वीज, पाणी आणि एसपीजीची सुविधाही मिळते.
राष्ट्रपतींना किती पगार आणि सुविधा काय?
भारताच्या राष्ट्रपतींनाही अनेक अधिकार असतात. राष्ट्रपती हे भारतीय लोकशाहीतील अत्यंत महत्वाचे पद आहे. भारतात राष्ट्रपतींना दरमहा 5 लाख रुपये पगार मिळतो. याशिवाय, त्यांना अनेक करमुक्त भत्ते देखील मिळतात. ज्यात जगभरातील ट्रेन आणि विमानाने मोफत प्रवास, मोफत घर, वैद्यकीय सेवा आणि कार्यालयीन खर्चासाठी वार्षिक 1 लाख रुपये मिळतात. माजी राष्ट्रपतींना दरमहा दीड लाख रुपये पेन्शन, सरकारी घर, दोन मोफत लँडलाइन फोन, एक मोबाइल फोन आणि पाच वैयक्तिक कर्मचाऱ्यांची सुविधाही मिळते.
खासदारांना किती मिळतो पगार?
भारतातील एका खासदाराला दरमहा 1 लाख रुपये पगार मिळतो. याशिवाय दैनंदिन भत्ताही मिळतो, जो दर पाच वर्षांनी वाढतो. भारतातील कोणत्याही खासदाराला संसदेची अधिवेशने, समितीच्या बैठकांना उपस्थित राहण्यासाठी दररोज 2,000 रुपये आणि प्रवासासाठी प्रति किलोमीटर 16 रुपये या प्रमाणे प्रवास भत्ता मिळतो. याशिवाय खासदारांना दरमहा 45,000 रुपये मतदारसंघ भत्ता आणि 45,000 रुपये कार्यालयीन खर्च भत्ता देखील मिळतो, ज्यामध्ये स्टेशनरी आणि टपालासाठी 15,000 रुपये समाविष्ट आहेत.
खासदाराला मिळतात 'या' सुविधा
पगाराव्यतिरिक्त, खासदाराला कुटुंबासाठी मोफत वैद्यकीय सुविधा, सरकारी निवास, स्वतःसाठी आणि त्याच्या जवळच्या नातेवाईकांसाठी दरवर्षी 34 मोफत देशांतर्गत विमान प्रवास देखील मिळतो. त्यांना ट्रेनमध्ये मोफत फर्स्ट क्लास ट्रेन प्रवासाची सुविधाही मिळते.
महत्वाच्या बातम्या:
महिना 25000 पगार असूनही तुम्ही करोडपती होऊ शकता, नेमकं कसं कराल नियोजन? सविस्तर माहिती एका क्लिकवर
महत्त्वाच्या बातम्या
ट्रेंडिंग न्यूज
