NTPC ला ग्रीन एनर्जीमध्ये 20 हजार कोटींपर्यंत गुंतवणूक करता येणार,केंद्र सरकारचा मोठा निर्णय,कारण समोर
NTPC : केंद्र सरकारनं एनटीपीसीला 20 हजार कोटी रुपयांच्या ग्रीन एनर्जीतील गुंतवणुकीला मान्यता दिली आहे. यापूर्वी ही मर्यादा 7500 कोटी रुपये होती.
नवी दिल्ली : केंद्र सरकारनं सार्वजनिक क्षेत्रातील ऊर्जा कंपनी एनटीपीसीला ग्रीन एनर्जीची क्षमता वाढवण्यासाठी 20 हजार कोटी रुपयांच्या गुंतवणुकीला मान्यता दिली आहे. यापूर्वी एनटीपीसी ग्रीन एनर्जीसाठी 7500 कोटी रुपयांची गुंतवणूक करु शकत होतं. आज पंतप्रधान नरेंद्र मोदी यांच्या अध्यक्षतेखालील आर्थिक व्यवहारविषयक मंत्रिमंडळाच्या समितीची बैठक पार पाडली. या बैठकीत महारत्न दर्जा प्राप्त सार्वजनिक क्षेत्रातील कंपनी एनटीपीसीबाबत मोठा निर्णय घेण्यात आला. एनटीपीसीला आजच्या बैठकीतील निर्णयानुसार अधिकार वाढवून देण्यात आले.
केंद्र सरकारच्या वतीनं आज घेण्यात आलेल्या निर्णयानुसार एनटीपीसीला त्यांची उपकंपनी असलेली एनटीपीसी हरित ऊर्जा ( NTPC Green) कंपनीत गुंतवणूक करण्यासाठी आणि त्याद्वारे एनजीईएलला एनटीपीसी नवीकरणीय ऊर्जा (एनआरईएल) या कंपनीत तसेच तिच्या इतर संयुक्त उपक्रमांमध्ये किंवा उपकंपन्यांमध्ये गुंतवणूक करण्यासाठी यापूर्वी मंजूर असलेल्या 7,500 कोटी रुपयांच्या मर्यादेपलीकडे जाऊन आता 20,000 कोटी रुपयांपर्यंत गुंतवणूक करता येईल. नवीकरणीय ऊर्जा क्षमतेत भर घालण्याच्या उद्देशाने घेतलेल्या या निर्णयामुळे देशाला वर्ष 2032 पर्यंत 60 गिगावॅट नवीकरणीय ऊर्जा क्षमतेचे उद्दिष्ट गाठण्यासाठी हा निर्णय घेण्यात आला आहे.
रोजगाराच्या संधी वाढणार
कॅबिनेटच्या निर्णयानुसार नवीकरणीय ऊर्जा क्षेत्रातील प्रकल्पाची उभारणी आणि त्यानंतर ते प्रकल्प सुरु होणे आणि देखभाल यामुळं स्थानिक लोकांना प्रत्यक्ष आणि अप्रत्यक्ष रोजगाराची संधी मिळेल. यामुळं स्थानिक पुरवठादार, स्थानिक उद्योग, लघू उद्योग या क्षेत्राला प्रोत्साहन मिळेल. देशातील उद्योजकतेच्या संधी वाढतील. याशिवाय रोजगार आणि सामाजिक, आर्थिक विकासाला देखील प्रोत्साहन मिळेल, असं सांगण्यात आलं आहे.
नॅशनल थर्मल पॉवर कॉर्पोरेशन आणि एनटीपीसी ग्रीन या दोन्ही कंपन्या शेअर बाजारात लिस्टेड आहेत. एनटीपीसी ग्रीन एनर्जी लिमिटेड ही एनटीपीसीची उपकंपनी आहे. आज शेअर बाजारात एनटीपीसीचा शेअर 342.50 रुपयांवर पोहोचला आहे. तर, या कंपनीचा 52 आठवड्यांचा उच्चांक 448.45 रुपये इतका आहे. तर, 52 आठवड्यांचा निचांक 292.80 रुपये इतका होता. एनटीपीसी ग्रीनचा आयपीओ जेव्हा आलेला तेव्हा एनटीपीसीच्या शेअरमध्ये मोठी वाढ झालेली पाहायला मिळाली होती.
दरम्यान, एनटीपीसी ग्रीनच्या स्टॉकमध्ये 2 रुपयांची वाढ आज पाहायला मिळाली. एनटीपीसी ग्रीनच्या स्टॉक आज 112.20 रुपयांवर पोहोचला. केंद्र सरकारनं एनटीपीसीच्या गुंतवणूक मर्यादेत तब्बल साडे बारा हजार कोटींची वाढ केल्यानंतर उद्या शेअर बाजार सुरु झाल्यानंतर गुंतवणूकदारांची प्रतिक्रिया कशी येते ते पाहावं लागेल.
(टीप- शेअर बाजार, म्यूच्यूअल फंड हे जोखमीच्या अधीन असतात. या लेखात दिलेली माहिती ही प्राथमिक स्वरुपाची असून आम्ही कोणताही दावा करत नाही. या लेखामागचा गुंतवणुकीसाठी शिफारस, सल्ला देण्याचा उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)
महत्त्वाच्या बातम्या
