Companies Shutdown : पाच वर्षांत देशातील 1 लाखाहून अधिक कंपन्या बंद, 1168 दिवाळखोरीत

Companies Shutdown : मागील पाच वर्षात भारतात 1 लाखाहून अधिक कंपन्या बंद झाल्या आहेत.

Companies Shutdown in India

Companies Shutdown in India: गेल्या 5 वर्षात देशातून एक लाखाहून अधिक कंपन्या कमी झाल्या आहेत. यातील बहुतांश कंपन्यांनी कंपनी कायद्यानुसार आत्मसमर्पण केले आहे. केंद्र सरकारच्या म्हणण्यानुसार, या काळात अनेक कंपन्यांनी दिवाळखोरीची प्रक्रियाही सुरू केली. केंद्रीय मंत्री राव इंद्रजित सिंह यांनी लोकसभेत ही माहिती दिली. त्यांनी सांगितले की, 2018-19 ते 2023-24 या आर्थिक वर्षात 1,06,561 कंपन्या कोणत्या ना कोणत्या कारणाने बंद झाल्या आहेत. व्यवसाय बंद करण्यासाठी त्यांनी कंपनी कायदा, 2013 चा वापर केला. 

1168 कंपन्या दिवाळखोरीत 

केंद्रीय मंत्री राव इंद्रजित सिंह म्हणाले की, गेल्या पाच वर्षांत 1168 कंपन्या दिवाळखोरीत निघाल्या आहेत. त्यापैकी 633 दिवाळखोर घोषित करण्यात आले असून उर्वरित प्रकरणांमध्ये प्रक्रिया सुरू आहे. बहुतेक प्रकरणांमध्ये, कंपन्या बंद होण्यासाठी 6 ते 8 महिने लागले तर काही प्रकरणांमध्ये ही वेळ 12 ते 18 महिन्यांपर्यंत पोहोचली. राव इंद्रजित सिंग यांच्या म्हणण्यानुसार, कंपनीच्या निर्मिती आणि विघटन प्रक्रियेला गती देण्यासाठी सर्व प्रयत्न केले जात आहेत. आम्ही ही प्रक्रिया सुलभ करू, असेही म्हटले.

5 वर्षात 7946 विदेशी कंपन्या भारतात 

दुसरीकडे, अर्थमंत्री निर्मला सीतारामन यांनी एका उत्तरात सांगितले की, गेल्या पाच वर्षांत 7946 विदेशी कंपन्यांनी भारतात त्यांच्या उपकंपन्या स्थापन केल्या आहेत. त्यामुळे भारतात व्यवसायाच्या संधी वाढल्या असून परदेशी गुंतवणूकदार देशात गुंतवणूक करण्यास उत्सुक असल्याचे स्पष्ट होते.

कोविड महासाथीनंतर आकड्यात वाढ

कोविड-19 नंतर संपूर्ण जगाला मंदीचा फटका बसला. या महासाथीमुळे कंपन्यांचे कोट्यवधी रुपयांचे नुकसान झाले आहे. यामुळे त्यांना दरवाजे बंद करावे लागले. कॉर्पोरेट व्यवहार मंत्रालयाने 2021 मध्ये सांगितले होते की एप्रिल 2020 ते जून 2021 या कालावधीत एकूण 16,527 कंपन्या बंद करण्यात आल्या आहेत. तामिळनाडूमध्ये सर्वाधिक कंपन्या बंद झाल्या. त्याचा परिणाम प्रत्येक राज्यात सुरू असलेल्या कंपन्यांवर दिसून आला. याशिवाय तोट्यात असलेल्या 19 सरकारी कंपन्याही बंद झाल्या.

कंपन्या कधी बंद केल्या जातात?

तज्ञांच्या मते, नियमांचे पालन न केल्यामुळे कंपनी सरकारच्या अधिकृत रेकॉर्डमधून काढून टाकली जाते. जर एखादी कंपनी 2 वर्षांपर्यंत व्यवसाय करत नसेल किंवा व्यवसाय सुरू करण्यासाठी अर्ज करत नसेल तर ती कंपनी रजिस्ट्रार बंद करू शकते.