Gold Silver Price Today: FD मोडून लोक धावतायत सोन्या-चांदीकडे! सुवर्णनगरीत नवनवे उच्चांक, आज सोनं- चांदी किती रुपयांवर?
कमी व्याजदरामुळे बँकांतील गुंतवणूक तोट्याची ठरत असल्याचं जाणवत असल्याने अनेकांनी आपल्या मुदतठेवी मोडून सोनं-चांदीत गुंतवणूक करण्याचा निर्णय घेतला आहे.
Gold silver Rates today: देशात एकीकडे बँकांच्या ठेवींवरील व्याजदरात सातत्याने कपात होत असताना, दुसरीकडे सोनं-चांदीच्या दरात दररोज नवे उच्चांक गाठले जात असल्याचं चित्र पाहायला मिळत आहे. विशेषतः जळगावच्या सुवर्ण नगरीत सोनं-चांदीच्या किमती दिवसेंदिवस वाढत असल्याने त्याचा थेट परिणाम सर्वसामान्य ग्राहक आणि गुंतवणूकदारांवर होत आहे. कमी व्याजदरामुळे बँकांतील गुंतवणूक तोट्याची ठरत असल्याचं जाणवत असल्याने अनेकांनी आपल्या मुदतठेवी मोडून सोनं-चांदीत गुंतवणूक करण्याचा निर्णय घेतला आहे.( Gold Silver Price)
जागतिक बाजारातील अस्थिरता, अमेरिकेच्या नव्या आर्थिक धोरणांचा परिणाम आणि सुरक्षित गुंतवणुकीकडे वाढलेला कल यामुळे सोनं-चांदीच्या दरात ही प्रचंड वाढ होत आहे. गेल्या काही आठवड्यांत सोनं-चांदीच्या किमतीत झालेल्या उसळीमुळे जळगावसह राज्यभरातील बाजारपेठा चांगल्याच तापल्या आहे. दररोज बदलणारे दर, वाढता गुंतवणूकदारांचा ओघ आणि बाजारातील बदलती मानसिकता यामुळे सोनं-चांदीचा हा ट्रेंड नेमका कसा आहे, कोणाला फायदा होतोय, कोणावर परिणाम होतोय आणि यामागची कारणं काय आहेत? पाहूया
सोन्याचांदीचे आजचे दर किती ?
अमेरिकेचे राष्ट्राध्यक्ष डोनाल्ड ट्रम्प सत्तेवर आल्यानंतर त्यांनी विविध देशांसंदर्भात राबवलेल्या आर्थिक धोरणांचा परिणाम जागतिक बाजारपेठेवर दिसून येत आहे. विशेषतः सोनं आणि चांदीच्या दरात मोठी उसळी पाहायला मिळत आहे. गेल्या एका महिन्याचा विचार केला तर सोन्याच्या दरात तब्बल 20 हजार रुपयांची वाढ झाली असून, आज जीएसटीसह सोन्याचा दर 1 लाख 56 हजार रुपयांवर पोहोचला आहे. तर चांदीच्या दरातही मोठी वाढ झाली असून, 1 लाख 11 हजार रुपयांची वाढ होऊन चांदीचा दर थेट 3 लाख 32 हजार रुपयांवर गेला आहे.या दरवाढीचा थेट फायदा गुंतवणूकदारांना झाला आहे. अवघ्या एका महिन्यात सोन्याच्या गुंतवणुकीत सुमारे 14 टक्के तर चांदीत तब्बल 50 टक्क्यांपर्यंत परतावा मिळाल्याने गुंतवणूकदार अक्षरशः मालामाल झाल्याचं चित्र आहे. एकूणच, बँक व्याजदरातील घट आणि मौल्यवान धातूंमधील वाढता परतावा यामुळे जळगावसह राज्यभरात सोनं-चांदी गुंतवणुकीचा ट्रेंड पुन्हा जोर धरताना दिसत आहे.
बुलियन मार्केटच्या ताज्या आकडेवारीनुसार, 24 कॅरेट सोन्याचा दहा ग्रॅममागे असणारा दर 156,700 रुपये एवढा आहे. तर एक किलो चांदीसाठी ग्राहकांना 335,420 रुपये मोजावे लागत आहेत.
सोन्या चांदीच्या वाढीमागची कारणं काय?
किंमतींमध्ये झालेल्या या नाट्यमय वाढीमागे अनेक प्रमुख आंतरराष्ट्रीय घटकांचा उल्लेख केला जात आहे. सर्वात महत्त्वाचे म्हणजे ग्रीनलँड संकट आणि त्याशी संबंधित भू-राजकीय तणाव, ज्यामुळे जागतिक स्तरावर अनिश्चिततेचे वातावरण निर्माण झाले आहे. जेव्हा जेव्हा युद्ध किंवा मोठ्या संघर्षाचा धोका वाढतो तेव्हा गुंतवणूकदार शेअर बाजारासारख्या धोकादायक गुंतवणुकीतून पैसे काढून सोन्यासारख्या सुरक्षित पर्यायांकडे वळतात. याला सुरक्षित आश्रय मागणी म्हणून ओळखले जाते, ज्यामुळे सोन्याच्या किमतींना मोठा आधार मिळाला आहे.
अमेरिकन डॉलरची कमकुवतता आणि जपानी सरकारी रोख्यांमध्ये झालेली घसरण देखील सोन्याची चमक वाढवण्यात महत्त्वपूर्ण भूमिका बजावली आहे. जेव्हा चलने आणि रोखे कमकुवत होतात तेव्हा गुंतवणूकदार सोन्याला सुरक्षित गुंतवणूक मानतात. दरम्यान, कर आणि अमेरिका आणि युरोपमधील संभाव्य व्यापार युद्धाची भीती यामुळे बाजारात भीतीची भावना निर्माण झाली आहे. मोठे संस्थात्मक गुंतवणूकदार जोखीम घेण्याऐवजी सोन्यात त्यांची गुंतवणूक वाढवत आहेत, ज्यामुळे मागणी सातत्याने जास्त राहिली आहे.
महत्त्वाच्या बातम्या
