Gold Silver Price Today : सोनं 400 तर चांदी 300 रुपयांनी महाग; जाणून घ्या आजचे दर
Gold Silver Price Today : सलग तिसऱ्या दिवशी सोन्याची किंमत वाढल्याचं पहायला मिळतंय. त्यामुळे सोन्याच्या किंमतीची पुन्हा एकदा पन्नास हजारांकडे वाटचाल सुरु झाली आहे.
मुंबई : काही दिवसांपूर्वी स्थिर असलेली सोन्याची किंमत आता हळूहळू वाढताना दिसत असून तिचा पन्नास हजारांकडे प्रवास सुरु झाला आहे. आज सलग तिसऱ्या दिवशी सोन्याच्या किंमतीमध्ये वाढ झाली आहे. गुरुवारी संध्याकाळी बाजार बंद होताना सोन्याच्या दरात 400 रुपयांची वाढ झाली आहे. मुंबई आणि पुण्यात आज 10 ग्रॅम 24 कॅरेट सोन्याचा भाव हा 48,480 रुपये इतका आहे तर 22 कॅरेट सोन्याचा भाव हा 47,480 रुपये इतका आहे. चांदीच्याही किंमतीत 300 रुपयांची वाढ झाली असून एक किलो चांदीसाठी आज 69,500 रुपये मोजावे लागणार आहेत.
सोमवारी सोन्याच्या किंमतीत 300 रुपयांची घसरण झाली होती. त्यानंतर मंगळवारी सोन्याच्या भावात 180 रुपयांची वाढ झाली तर बुधवारी त्यामध्ये 190 रुपयांची वाढ झाली होती. आज पुन्हा त्यामध्ये 400 रुपयांची वाढ झाल्याचं दिसून येतंय. गेल्या दोन महिन्यांमध्ये सोन्याच्या भावात घसरण झाल्याचं पहायला मिळालं होतं. पण येत्या काळात सोन्याची किंमत वाढण्याची शक्यता आहे असा अंदाज व्यक्त केला जातोय. त्यामुळे सध्या सोन्याच्या किंमती आवाक्यातील असून त्यामध्ये गुंतवणूक करण्याचा हाच योग्य काळ असल्याचं मत काही तज्ज्ञांनी व्यक्त केलंय.
गेल्या काही दिवसांपासून चांदीच्या भावात सातत्याने चढ-उतार होत असल्याचं पहायला मिळतंय. मंगळवारी चांदीच्या भावात 300 रुपयांची वाढ झाली होती तर त्या आधी सोमवारी 200 रुपयांची घट झाली होती. आज चांदीच्या दरात 300 रुपयांची वाढ झाली आहे. 7 जुलै रोजी चांदीच्या भावाने 70 हजार रुपयांचा टप्पा ओलांडला होता.
मुंबईतील सोन्याच्या भावावर आंतरराष्ट्रीय दराचा जरी फरक पडत असला तरी काही स्थानिक गोष्टीही प्रभाव टाकतात. इंडियन बुलियन ज्वेलर्स असोसिएशनकडून मुंबईतील सोन्याचा दर ठरवला जातोय. त्यामध्ये स्थानिक आयात कर आणि MCX या कमोडिटी मार्केटचा विचार केला जातो. MCX हे देशातील सर्वात मोठे कमोडिटी मार्केट असून या ठिकाणी सोन्याचा भाव ठरवला जातो.
गेल्या वर्षी ऑगस्ट 2020 मध्ये सोन्याच्या भावाने प्रती 10 ग्रॅमसाठी 56 हजार रुपयांचा विक्रमी आकडा गाठला होता. त्यामध्ये आता जवळपास सात हजार रुपयांची घसरण झाल्याची पहायला मिळतंय. कोरोनाच्या प्रादुर्भावाचा सोन्याच्या दरावर चांगलाच परिणाम झाल्याचं दिसून आलंय.
महत्वाच्या बातम्या :
महत्त्वाच्या बातम्या
ट्रेंडिंग न्यूज
