Hingoli Rain : हिंगोली जिल्ह्यात पावसाची जोरदार हजेरी, सोयाबीनसह कापसाचं मोठं नुकसान

Hingoli Rain : परतीच्या पावसाचा हिंगोली जिल्ह्यात शेतकऱ्यांच्या पिकांना मोठा फटका बसला आहे.

Hingoli Rain

Hingoli Rain : सध्या राज्यात पावसाचा (Rain) जोर कमी झाला आहे. मात्र, काही ठिकाणी जोरदार पाऊस पडत आहे. हिंगोली (Hingoli) जिल्ह्यात पावसानं जोरदार हजेरी लावली आहे. जिल्ह्यांमध्ये रात्रीपासूनच जोरदार पावसाला सुरुवात झाली आहे. सकाळी देखील मोठा पाऊस झाला. या परतीच्या पावसानं शेतकऱ्यांच्या पिकांना मोठा फटका बसला आहे. सोयाबीनसह कापसाचं मोठं नुकसान झालं आहे. त्यामुळं शेतकऱ्यांना मोठा आर्थिक फटका बसला आहे.
   

सोयाबीनसह कापसाला मोठा फटका

अनेक ठिकाणी शेतामध्ये कापून टाकलेल्या सोयाबीनच्या सुड्या भिजल्या आहेत. तर ज्या ठिकाणी जोरदार पाऊस झाला आहे अशा ठिकाणी तर संपूर्ण कापसाची झाडे खाली पडली आहेत. अनेक ठिकाणी काढलेला कापूस सुद्धा भिजला आहे. त्यामुळं शेतकऱ्यांच्या हातात आलेला घास या पावसानं हिरावून घेतला आहे. सध्या राज्यात परतीच्या पावसासाठी पोषक वातावरण तयार झालं आहे. अशा स्थितीत परतीचा पाऊस काही ठिकाणी जोरदार हजेरी लावत आहे. याचा शेतकऱ्यांना मात्र मोठा फटका बसत असल्याचे चित्र दिसत आहे.

नांदेड आणि परभणी जिल्ह्यात पावसाची जोरदार हजेरी

 नांदेड (Nanded) आणि परभणी (Parbhani) जिल्ह्यात पावसानं जोरदार हजेरी लावली आहे. या परतीच्या पावसानं हजेरी लावल्यामुळं शेतकरी मात्र चिंतेत आहेत. कारण या पावसामुळं हाताशी आलेली पिकं वाया जाण्याची शक्यता निर्माण झाली आहे. कारण, सध्या पिकांच्या काढणीचा हंगाम सुरु आहे, अशातच पावसानं हजेरी लावल्यानं शेती पिकांना मोठा फटका बसण्याची शक्यता आहे. नांदेड जिल्ह्यात रात्रभर मुसळधार पाऊस झाला आहे. तर सकाळपासून पुन्हा पावसाची रिपरिप सुरु झाली आहे. दरम्यान, कालपासून सुरु असलेल्या या जोरदार पावसामुळं शेतकरी मात्र, चिंतेत आहेत. कारण या पावसामुळं हाताशी आलेली पिकं जाण्याची शक्यता निर्माण झाली आहे. सोयाबीन, उडीद, मूग ही पिकं मातीमोल होण्याच्या मार्गावर आहेत. कालपासून सुरु असलेल्या या पावसामुळे शेतांना तळ्याचे रुप आलं आहे. शेतातील पिकात पाणीच पाणी झालं आहे. तर सुरुवातीला अवकाळीनंतर अतिवृष्टी त्यानंतर आता परतीच्या पावसाच्या तडाख्यामुळं शेतकऱ्यांच्या हातात यावर्षी पीक म्हणून काही तरी पडेल की नाही, हा प्रश्न निर्माण झाला आहे.

परतीच्या पावसाने परभणीला झोडपलं

परतीच्या पावसाने परभणीला अक्षरश झोडपून काढले आहे. रात्रभर शहर आणि परिसरात विजांच्या गडगडाटासह मुसळधार पाऊस झाला आहे. तर पहाटेपासून पुन्हा पावसाची रिपीरिप सुरू झाली आहे. सध्या सोयाबीन काढणीचा हंगाम सुरु असताना झालेल्या या मुसळधार पावसाने अनेक ठिकाणी काढलेल्या आणि काढणी सुरू असलेल्या सोयाबीनचे मोठे नुकसान होण्याची शक्यता निर्माण झाली आहे. त्यामुळं शेतकरी चिंतेत आहेत.

महत्त्वाच्या बातम्या: