Monsoon News : मान्सूनसाठी अनुकूल वातावरण, अंदमान, निकोबार बेटांसह 'या' ठिकाणी पावसाची शक्यता
आज मान्सून अंदमान, निकोबार बेटांसह अनेक ठिकाणी पावसाची शक्यता वर्तवण्यात आली आहे. पुढच्या दोन दिवसात केरळ आणि लक्षद्वीपमधील काही ठिकाणी मुसळधार पावसाची शक्यता हवामान विभागानं वर्तवली आहे.
Monsoon News : पुढच्या 2 दिवसात केरळ आणि लक्षद्वीपमधील काही ठिकाणी मुसळधार पावसाची शक्यता हवामान विभागानं वर्तवली आहे. केरळात पश्चिमी वाऱ्यांमुळे पाऊस पडणार असल्याचा अंदाज वर्तवण्यात आला आहे. काही भागांमध्ये अतिमुसळधार पाऊस पडण्याची शक्यता असल्याचे हवामान विभागाने म्हटले आहे. दरम्यान, बंगालच्या उपसागरात विषववृत्त ओलांडून नैऋत्येकडे झेपवणारे बळकट दमदार पावसाळी वारे तसेच ताशी 45 किमी झटक्याखाली पुढील 5 दिवस वाहणाऱ्या वाऱ्यामुळे आज अंदमान, निकोबार बेटे, व आग्नेय बंगालच्या उपसागरात मान्सून दाखल होण्याची शक्यता जाणवत असल्याचे मत जेष्ठ हवामान तज्ञ माणिकराव खुळे यांनी सांगितले. दरम्यान, राज्यातही पावसाची शक्यता हवामान विभागाने वर्तवली आहे.
पश्चिम बंगाल आणि ईशान्यकडील 7 राज्यात पुढील 5 दिवस जोरदार पूर्वमोसमी पावसाची शक्यता जाणवत असल्याचे माहिती देखील माणिकराव खुळे यांनी दिली. पावसासाठी अनुकूल स्थितीमुळे नैऋत्य मोसमी वाऱ्यांचा प्रवास सुकर झाला आहे. येत्या दोन दिवसात हे वारे दक्षिण अंदमान समुद्र, निकोबार बेटांसह बंगालच्या उपसागरातील दक्षिणपूर्व भागात दाखल होणार असल्याचा अंदाज वर्तवण्यात येत आहे. विजांच्या कडकडाटासह मुसळधार पावसाची शक्यता आहे. वाऱ्यांचा वेग ताशी 40 ते 50 किलोमीटरपर्यंत राहणार असल्याचा अंदाज आहे.
दरम्यान, दक्षिण मध्य कर्नाटकावर जमिनीपासून उंच आकाशात 4 ते 5 किमी अंतरापर्यंत असलेल्या चक्रीय वाऱ्याच्या स्थितीमुळे अरबी समुद्रावरुन येणाऱ्या आर्द्रतायुक्त वाऱ्यामुळे पुढील 5 दिवस तामिळनाडू व कर्नाटक किनारपट्टी, केरळ व माही क्षेत्रात जोरदार पावसाची शक्यता जाणवत असल्याचे खुळे यांनी सांगितले आहे. दरम्यान पुढच्या दोन दिवस विदर्भात उष्णतेच्या लाटेशी शक्यता देखील खुळे यांनी वर्तवली आहे. त्यानंतर हळूहळू ही लाट विरळ होईल असे त्यांनी म्हटले आहे.
या सर्व अनुकूलता जरी असल्या तरी प्रत्यक्षात मान्सूनचा पाऊस तळ कोकण व घाट ओलांडून मध्य महाराष्ट्रात जूनच्या दुसऱ्या आठवड्याच्या सुरुवातीला येतो. तर पूर्व मोसमी अवकाळी पाऊस मे महिन्याच्या शेवटच्या आठवड्याच्या सुरवातीला दोन ते चार दिवसांच्या फरकाने अपेक्षित असल्याचेही खुळे यांनी यावेळी सांगितले.
महत्वाच्या बातम्या:
महत्त्वाच्या बातम्या
