Mumbai Rains: पश्चिम द्रुतगती महामार्गावर वाहतूक कोंडी, चाकरमान्यांना फटका

मुंबईत रात्रीपासून मुसळधार पाऊस सुरू आहे. यामुळे पश्चिम द्रुतगती महामार्गावर प्रचंड वाहतूक कोंडी झाली आहे. बोरिवलीहून वांद्र्याच्या दिशेने जाणाऱ्या मार्गावर विलेपार्ले, अंधेरी, जोगेश्वरी, गोरेगाव या दरम्यान वाहतुकीची कोंडी झाली आहे. पंधरा ते वीस मिनिटांचा प्रवास वाहन चालकांना एक ते दीड तासामध्ये करावा लागत आहे. आठवड्याचा पहिला दिवस असल्याने मोठ्या संख्येने चाकरमानी कामासाठी निघाले आहेत, मात्र त्यांना या वाहतूक कोंडीचा फटका बसत आहे. मुंबईच्या पश्चिम उपनगरात जोरदार पाऊस सुरू आहे. या पावसामुळे पश्चिम रेल्वे देखील पंधरा मिनिटे उशिराने धावत आहे. खाजगी गाड्या घेऊन कामासाठी निघालेल्या चाकरमान्यांना वाहतूक कोंडीचा मोठा सामना करावा लागत आहे. पश्चिम द्रुतगती महामार्गावर वाहनांच्या लांबच लांब रांगा लागल्या आहेत. वाहतूक पोलीस ही कोंडी काढण्याचे प्रयत्न युद्धपातळीवर करत आहेत.