Virar Building Collapsed : विरारमधील इमारत दुर्घटनेत 15 जणांचा मृत्यू, 10 वर्ष जुनी बिल्डिंग का कोसळली?

विरार पूर्व नारंगी बायपास रोडवरील विजय नगर येथील रमाबाई अपार्टमेंट या चार मजली इमारतीचा काही भाग २६ ऑगस्टच्या रात्री पावणे बारा वाजता कोसळला. या दुर्घटनेत मृतांचा आकडा पंधरावर पोहोचला आहे. नऊ जखमींवर वेगवेगळ्या रुग्णालयात उपचार सुरू आहेत. दुर्घटनेच्या बत्तीस तासांनंतरही बचावकार्य सुरू आहे. इमारतीच्या ढिगाऱ्याखाली वीस ते पंचवीस रहिवाशी दबले गेल्याचा संशय होता. एनडीआरएफच्या दोन तुकड्या, पालिकेचं अग्निशमन दल, पोलिस आणि प्रशासनाचे अधिकारी घटनास्थळी दाखल झाले होते. सलग दोन दिवस रेस्क्यू ऑपरेशन सुरू आहे. जेसीबीच्या सहाय्यानं ढिगारा हटविण्याचं काम सुरू आहे. एनडीआरएफ टीमने आतापर्यंत चोवीस जणांना रेस्क्यू केले आहे. अजूनही दोन जणांचा शोध सुरू आहे. या प्रकरणी वसई विरार महापालिकेनं इमारतीचं बांधकाम करणाऱ्या बिल्डर नितीन गोपीनाथ साने याच्यावर विरार पोलीस ठाण्यात सदोष मनुष्यवधाचा आणि एमआरटीपी अंतर्गत गुन्हा दाखल केला आहे. बिल्डर नितीन गोपीनाथ साने याला विरार पोलिसांनी अटक केली आहे. जागा मालकावरही गुन्हा दाखल करण्यात आला आहे.